Paasissutissat nalinginnaasut
Arlaannik pissuteqartumik suliffiit annaasimagukku imaluunniit ilinniagaqareernerpit kingorna suliffissaaleqiguit, suliffissaaleqisutut nalunaarsorneqarnissat isumagissavat. Taamatut nalunaarsugaaguit pisinnaatitaaffeqarlutillu pisussaaffeqassaatit. Pisussaaffivit ilagissavaat suliffeqarnermut piareersimasussaatitaanissat. Ilaatigut tamanna isumaqarpoq suliffissamut innersuunneqarsinnaasutit.
Suliffissaq innersuunneqartoq tassaavoq utaqqiisaagallartumik atorfik Majoriamit innersuussaq. Taanna assersuutigalugu meeqqeriviusinnaavoq, utoqqaat illuanni imaluunniit allarluinnarmi. Suliffik innersuunneqartoq aqqutigalugu sulisitsisunut attaveqalissaatit taamaaliornikkullu aalaakkaasumik suliffittaarnissannut periarfissatit pitsaanerulersillugit.
Suliffissamut innersuunneqartussanngoruit Majoriap toqqaannartumik imaluunniit oqarasuaatikkut attaveqarfigissavaatit.
Piumasaqaatit
Suliffissamik suugaluartumiluunniit tigusisinnaassaatit, ukua aporfiunngippata:
- Peqqissutsikkut ajornartorsiuteqaruit
- Meeqqanik paarsisussaqarnikkut aporfeqaruit
- Inuttut allatigut ajornartorsiuteqaruit
Peqqissutsikkut ajornartorsiuteqarnerit pissutigalugu suliffissatut innersuussami sulisinnaanngikkuit, piginnaanngorsaqqinnermik ingerlataqarnissamik neqeroorfigineqassaatit.
Suliffissatut innersuussamik pissutissaqarnak itigartitsissutigissagukku, sapaatit akunnerini sisamani suliffissarsiortunut ikiorsiissutisiassavit affaannai tunniunneqartassapput. Tamanna killilersuiffigisaalernermik taaneqartarpoq.
Pinerluuteqarsimannginnermut aamma meeqqanik pinerluuteqarsimannginnermut uppernarsaatit
Atorfiit ilaat, assersuutigalugu meeqqerivimmi ikiortitut sulissagaanni, pinerluuteqarsimannginnermut aamma meeqqanik pinerluuteqarsimannginnermut uppernarsaatit piumasaqaataasarput. Majoriami immersuiffissamik pissarsisinnaavutit politiinullu taanna tunniullugu pinerluuteqarsimannginnermut uppernarsaat pissarsiariniarlugu. Iluaqutaassaaq Majoriamut suliffissaaleqisutut nalunaarsorneqarumallutit saaffiginneqqaarninni immersuiffissaq pissarsiarereerukku.
Aningaasaqarneq
Piffimmi sulinerpit nalaani aningaasarsiaqassaatit. Aningaasarsiaqartillutit suliffissarsiortunut ikiorsiissutinik qaavatigut pissarsisinnaanngilatit.
Pisortanit ikiorsiissutinik pisartagaqaruit, ikiorsiissutit annertussusileriikkat unitsinneqassapput.
Aamma atuarsinnaasatit
Kommune Kujalleq
Postboks 514
3920 Qaqortoq
Oqarasuaat: 704 100
Fax: 704 177
E-mail: kommune@kujalleq.gl
Nittartagaq: www.kujalleq.gl
Isumaginninnermut, Ilaqutariinnut, Sulisoqarnermut Nunamullu Namminermut Naalakkersuisoqarfik
Imaneq 1A, 701
Postboks 970
3900 Nuuk
Oqarasuaat: (+299) 345000
E-mail: ISN@nanoq.gl