Jørgen Lund toqukkut qimaguppoq
Narsap kommunerisimasaani borgmesteriusimasoq, savaatillit siulersuisuani ilaasortaasimasoq, Nunaqarfinni Aqutsisut siulittaasuat, Landbrugsrådimi siulittaasoq, savaatilik Jørgen Lund sivikitsumik napparsimareerluni tamatsinnut ajoraluaqisumik artornaqisumillu toqukkut qimaguppoq.

Kommune Kujallermi kommunalbestyrelsi sinnerlugu, meerai, nulia ilaqutaalu tamaasa pisumut alianartumut misiginneqatiginnissummik matumuuna apuusiffigaakka.

Jørgen Lund nalunngisaraarput politikkeritut silassorissutut pikkorissutullu; eqqaamaneqaatigiuassavaa politikkikkut suliaminut suliaminullu allanut pimoorussilluni ilungersuuteqartarnini, inuunermini sivikikkaluartumi eqqaamaneqaatissaasa ilagilluinnarpaat savaateqarnermik inuussutissarsiuteqarnerup siuarsarneqartuarnissaanut pimoorussilluni pingaartitsillunilu suliniuteqartuarnini.

Jørgen Lund ikinngutaavoq suleqatikkuminartoq qiimasoq maligassiuilluartorlu.

Jørgen Lundip eqqaaneqarnera ataqqinartuuli.

Simon Simonsen
Borgmester