Kommune Kujallermi meeqqanik inuusuttunillu sullissineq nalinginnaannaq ingerlanneqanngilaq!

Sermitsiap nittartagaani inuk atorfimmik aalajangersimasumik perusussimassagunaraluartoq naatsorsuutigisamisulli atorfinitsinneqarsimannginnami ajuallassimasoq oqaaseqartinneqarpoq, taamaasillunilu Sermitsiap nittartakamigut taassuma oqaaseqartinnerata kingorna Kommune Kujalliup meeqqanik inuusuttunillu sullissineranik apeqqusiinera pissusissamisuunngilluinnarpoq, taamaanneraanerlu utertinneqartariaqarluni!
7. april 2017

Siullertut Kommune Kujallermi atorfinitsitsinermut malitassat aalajangersimasut malinneqartartut Kommune Kujalleq erseqqissaateqassaaq.  Suliat ataasiakkaat eqqartunngikkaluarlugit kommunimit erseqqissaatigineqassaaq atorfinnik inuttassarsiuisoqartillugu atorfiit inuttassarsiorneqartut soorunami avammut saqqummiunneqartarmata, taamaasillutik kikkulluunniit atorfimmut soqutiginnittut qinnuteqarnissaminnik periarfissaqartarlutik. Kommune sulisussat amerlassusilerneqarsimanerat aammalu aningaasat siunertamut atugassiissutigineqartut qaavisigut immikkut atorfinitsitsineq ajorpoq, taamatuttaaq avammut saqqummiussisoqartinnagu atorfinitsitsineq ajorpoq.   Assersuutigalugu pisortatut atorfiit inuttassarsiuunneqartut saqqummiunneqanngitsut inunnut ataasiakkaanut tunniunneqaannarneq ajorput.  

  • Kommune Kujallermi meeqqanik inuusuttunillu sullissinerup sukumiisumik pitsanngorsarneqarnissaa anguniarneqarpoq, taamaammallu sullissisunik isumaginninnermullu siunnersortinik atorfinitsitsiniarneq ilungersunarsimaqaaq, tamatuma kingunerisaanik kommune Namminersorlutik Oqartussanut kommunillu illoqarfittut ikinngutaanut Aarhusip kommunianut saaffiginnissimalluni. Taakkulu kommunip nuannaarutigeqisaanik atorfissaqarteqisaanillu ikiuussimapput taamaasillutillu suliassarpassuit ikilisimallutik, ikiuussimanerallu assut qujanarpoq, Kommunimi pisortaaneq Frank Hedegaard Jørgensen oqarpoq, nangillunilu:
    Ukiuni kingullerni Namminersorlutik Oqartussaniit nakkutilliisut Kommune Kujallermut nakkutilliiartortarsimapput. Nakkutilliiviup immikkoortut arlallit taakkartorpai isumaqarlunilu kommunip sulinera pitsaanerusinnaasoq, Kommunillu isornartorsiuinerit tusaatissatut tigullugit pissutsit aaqqiiviginiarsarai. Nakkutilliiviup kingullermik pulaarnerani paasinarsivoq Kommunip isumaginninnerup tungaatigut aqutsinerata ineriartornera pitsanngoriarsimasoq, tamannalu nuannaarutigaarput, isumaginnittoqarfimmimi sulisut akornanni sulinermi toqqissisimanermik pilersitsimmat. Eqqaamaneqassaaq sulisut amigarnikuummata taamaakkaluartorli ullut tamaviisa innuttaasut pitsaanerpaamik kiffartuukkusullugit sulinerminni ilungersortarput. 
  • Isumaginnittoqarfimmi sulisut ulapissimaqaat sulilu ulapeqalutik.  Ullut tamaviisa ilungersunartunik suliaqartarput sulinermili toqqissisimanissaq pisariaqartitartik pisinnaanngilaat, tusagassiutinit tusagassiuutillu aqqutigalugit avoqqaariniarneqartuarneq malersorneqartutullu nalilerneqarsinnaasumik pissusilersorfigitinneq pissutaalluni. Tamanna nukippassuarnik atuiffiuvoq, taamaammat piffissanngorpoq tapersersorneqarlutik tatigineqarlutillu sulisinnaanissaminnut periarfissinneqarnissaat piffissanngorpoq, erseqqissaatigissavaralu ullut tamaviisa ilaqutariinnut meerartalinnut kommunimit ikiorneqarnissamik pisariaqartitsisunut sulillutik ikiuuttarmata, soorlu tamanna inatsisit naapertorlugit pisussaaffigigaat, Isumaginninnermi Pisortaagallartoq Peter Sonberg, taama oqarpoq.

Aammattaaq kommunalbestyrelse angusassamik siunnerfeqaqqissaarluni isumaginnittoqarfik pitsaanerpaanik sinaakkutassaqartikkumallugu sulisimavoq, isumaginninnermilu ataatsimiititaliaq isumaginnittoqarfimmi aqutsisut peqatigalugit, isumaginnittoqarfiup aaqqissuussaanikkut pilersaarutaata pitsanngorsarnissaanik suliaqarsimallutik.   Pilersaarut taanna novembarimi 2016-imi akuerineqarpoq januaarillu aallaqqaataanni 2017-imi atuutilertinneqarluni.  Isumaginnittoqarfimmi sulisut taamaalillutik 70 %-inik amerlipput atorfiillu amerlanersaat meeqqanut inuusuttunullu sullissivimmiillutik. 

Isumaginninnerup tungaatigut suli unammilligassarpassuaqarpugut - pingaartumik meeqqanut inuusuttunullu sullissinermi, ilimagilluinnarparalu kommunalbestyrelse nutaaq maajip aallaqqaataanni 2017-imi ivertinneqartussaq kommunalbestyrelsiusi maanna atorunnaalersoq assigalugu ilaqutariit meerartallit pitsaasunik toqqammavissaqarluarnissaannut eqiingasumik sulissasoq, kommunitsinni ilaqutariit nukittuut imminnullu pilersortut amerlinissaannut tunngavissiisumik, kommunip pisortaanera Frank Hedegaard Sørensen naggasiivoq.

Inunnik isumaginninnerup iluani sullissinermi iliuutsit maanna timitalersorneqartut allat makkuupput:

Ilaqutariinnut sullissivinni tarnip pissusaanik ilinniarsimasut nutaat pingasut atorfinitsinneqassapput.

Angajoqqaarsiaasartunut siunnersortimik atorfinitsitsisoqassaaq.

Meeqqanik inuusuttunillu sullissisut amerlariaateqartinneqangaatsiarput.

Politikerit inunnillu isumaginnittoqarfimmi sulisut majimi isumasioqatigiitsinneqassapput.

Oqartussaasut ingerlatsinerullu immikkoortinneqarnissaat immikkut aallunneqarpoq.

Illoqarfinni pingasuusuni angajoqqaarsiaasartut majimi isumasioqatigiissinneqassapput.

Isumaginnittoqarfimmi sullissisut siunnersortinut ikiortitut ilinniartinneqarnerat ingerlavoq. (allaffimmiutut HK´eritut ilinniarsimasut tamarmik  siunnersortinut ikiortitunngussapput)

Angerlarsimaffimmi ikiortit pikkorissartinneqarnissaat Aarhus Kommune peqatigalugu ingerlanneqassaaq.

Suliassanik isumaginninnermi pisortaq Narsamiippoq sivisuumik sulilluni kingusinnerusukkullu Nanortalimmiissalluni.

Nunaqarfinnut tikeraartarnerit annertusarneqarput.

Sukumiinerusumik paasisaqarusukkussi saaffissarsi:

Inunnik isumaginnittoqarfimmi pisortaagallartoq Peter Sonberg 490147