TUSAGASSIORFINNUT NALUNAARUT

Meeqqat illersuisuata Kujataani angalanerminit nalunaarusiaa Kommune Kujallermi borgmesteritut qujaruppara.

Inuiaqatigiinni, aammalu kommunitsinni, meeqqat inuusuttuaqqallu illersorniarlugit meeqqat illersuisuata suliaa annertooq nuannaarutigaara.
15. marts 2017

Nalunaarusiaq kaammattuutinik soqutiginartunik pitsaasunillu qassiinik imaqarpoq, taakkulu suliareqqinnissaat qilanaaraarput, aamma kommunalbestyrelsimi nutaami.

Nalunaarusiami oqaatigineqartutut pissutsinik taakkuninnga allanngortitsinissamut kommunip kisimiilluni akisussaannginnera erseqqissassallugu pingaaruteqarluinnarpoq, ajornartorsiutimmi taakku inuiaqatigiit tamarmik akisussaaffigimmatigit tamatta akisussaaqataavugut. Minnerunngitsumik angajoqqaat akisussaaffimmik angisuumik tigummiarput. Ilaqutariit amerlasuut ingerlalluarput, nassuerutigisariaqarparpulli ilaqutareeqarmat ingerlalluanngitsunik. Taamamammat pissutsit tamakku allanngortinniarlugit tamatta ikiuuttariaqarpugut, ilaqutariinnillu sanngiinnerusunik ikiuinissamut pikkorinnerusariaqarluta.

Meeraq qitiutissavarput eqqaamallugulu meeqqat siunissarigatsigit. Tassa siunissaq ataatsimoorluta kisitta pilersissinnaasarput.

Ukiuni amerlavaallaani ajornartorsiutit ersiutaat kisiisa iluarsiniartarsimavavut, ajornartorsiutilli pingaarnersaat, tassa angajoqqaat ilaasa angajoqqaatut pisussaaffimminnik naammassinnittannginnerat meeqqanminnullu saaffissatut inissisimasannginnerat, sumiginnarsimavallaarparput - aamma maligassiuisuugaluaruttaluunniit. Taamaammat suut tamaasa ataatsimut isigalugit suliniartariaqalerpugut, ajornartorsiutip ersiutai pinnagit ajornartorsiutillli aallaavippiaat sammilertariaqarlugit. Ullormiit ullormut tamakku aaqqinneqarsinnaanngillat, ajornartorsiutilli nassuerutigineqarnera aaqqiiniarnermi aallarniutissaavoq taamalu meerartatta siunissaannut pitsaanerusumut toqqammavissamik pilersitsissalluta.

Taamaammat kommunalbestyrelsit nutaat qinnuginiarpakka suliniuteqaqqullugit meeqqallu pillugit isumasioqatigiisitsinissamut aggersaaqqullugit, tassanilu nalunaarusiami kaammattuutit misissuataassavavut taavalu MIO-mik attuumassuteqartunillu suleqateqarnerput nangissavarput tigussaasunik suliniuteqarnissarput ilaqutariillu meerartallit iluaquserneqarnissaat sulissutigilissallutigu.

Tassallu Peqatigiiffik Kalaallit Meerartaat suleqatigilereerparput meerartavut iluaquserniarlugit taamalu tamatta siunissarput iluaquserniarlugu siunissaq isigalugu suleqatigiikkumalluta.

Kommunitsinni meeqqat inuusuttuaqqallu pitsaanerusumik atugassaqarnissaat pillugu pitsaasumik isumatusaarlutalu suleqataanissamut qilanaarpugut.


Inussiarnersumik inuulluaqqusillunga,

 

Jørgen Wæver Johansen

Borgmesteri