Tusagassiuutitigut nalunaarut

Meeqqat nunagisartik qimallugu atuariartortartut angerlarsimaffiini (elevhjemmeni) atugassarititaasut Kommune Kujallermit pitsanngorsarneqarput
20. marts 2017

Kommune Kujallermi meeqqat nunagisartik qimallugu atuariartortartut angerlarsimaffianni Nanortalimmiittumi pisortap, Oline Augustinussen-ip tusagassiuutitigut oqaaseqaatai innersuussutigalugit Meeqqanut Kulturimullu ingerlatsivimmiit ilumoornerassavarput Atuartut nunaqarfimmiit tikittartut ilaat imaannanngitsumik nammataqarlutik tikittarmata, kiisalu ilumoorneqassavarput ullumikkut atuartunit elevhjemmimi najugaqartunit 24-iusunit marluk annertusisamik immikkut atuartinneqarnissamik pisaqariaqartitsisut elevhjemmemi najugaqarmata.

Taamaattumik ukioq atuarfiusoq 2016-17 ingerlanerani elevhjemmemi ningiuusoq  sulisoqarneq pillugu atuarfimmut, Mk-ingerlatsivimmut kiisalu inunnik isumaginnittoqarfimmut saaffiginnissuteqarsimavoq. Tamakkulu saaffiginnissutit aallaavigalugit tværfaglig-imik suleqatigiilluta makkuninnga maanna ingerlatsivugut:

  • Elevhjemme sulisut atuartunik nakkutiginninnerunissaat siunertaralugu elevhjemmemi allaffissorneq annikillivarput. Allaffissornerullu annerpaartaa atuarfimmiit aqunneqalerluni.
  • Elevhjemmemi atuartunik isumaginnittussat sulisut tallimat piffissaq suliffigisartagaat atuartut angerlarsimanerata nalaani tulluarsarlugit inissinneqarput. (pissuserissaarnissaq pillugu erseqqissaatigissavarput atuartunik isumaginnittussat taakku tallimat saniatigut sulisut tallimat meeqqat ulluinnarni inuunerissaarnissaannik isumaginnissallutik angerlarsimaffimmi suliassanik suliaqartut aamma tallimaammata)
  • Elevhjemme ningiua suleqatigalugu atuartut namminneq toqqakkaminnik sulisumik attaveqaateqartarnerat suliniutigineqarpoq.
  • Isumaginnittoqarfik suleqatigalugu atuartut imaannanngitsumik nammatallit pisariaqartitsinerat aallavigalugu piffissami qanilisukkulluunniit inunnik isumaginnittoqarfimmiit  oqaloqatiginnittarnissaminnut periarfissaqarput. Periarfissarlu taana  atuartunit atorluarneqarpoq.
  • Støtteperson-imik kommunemut qinnuteqarnermi inunnik isumaginnittoqarfik Mk-ingerlatsivillu suleqatigiillutik qinnuteqarnermi tunngavilersuutigisat nalilersoqqissaarlugit aalajangiisoqartarpoq.

Taamatuttaaq nalunaarutigissavarput meeqqat nunagisartik qimallugu atuariartortartut pillugit Meeqqat Oqaaseqartartuata kaammattuutai tusaatissatut tigugatsigit, taamaalillutalu kinguarsaanertaqanngitsumik pitsanngorsaanitta saniatigut sutigut allatigut malinnaatilimmik pitsanngorsaaqqissinnaanerluta, pingaartumik meeqqanut isumaginninnikkut annertuumik qajannartumik inissisimasunut tunngatillugu, maannangaarlu pitsanngorsarsinnaasarput tassaavoq nunaqarfinni atuarfiit, angajoqqaat aammalu atuartut angerlarsimaffiisa akornanni attaveqaqatigiinnerup pitsanngorsarneqarnissaa.

Inussiarnersumik inuulluaqqusillunga,

Jens Korneliussen
Meeqqanut Kulturimullu ingerlatsivimmi pisortaq