Tusagassiutitsigut nalunaarut: Siornali nassuerutigaarput pasilliineq pinnagu suleqatigiinnissaq piumanerugatsigu

Tupigusuutigalugu Naalakkersuisup Sara Olsvigip Kommune Kujallermi meeqqat sumiginnakkat inissisimaffiat pillugu tusagassiutitigut nalunaarutaa atuarpara.
7. februar 2017

Kommunimi maani kialluunniit meeqqat inuuneri navianartorsiortinnianngilai. Ilisimaaraara Sara Olsvigip naalakkersuisoqarfianit atorfilittat ilaata kommunitsinnut ikiuiartorluni atukkiussaasup akuersornanngitsumik tamanna oqaatigisimagaa, tamassumalu Naalakkersuisumit ivertinneqarlaamit erseqqissaassutigineratigut eqqornerulersitsinneqarnavianngilaq. Tusagassiutitigut nalunaarutini marluugallartuni saqqummiunneqartut allallu aalajangiullugit kukkusumik oqariartuutigineqartut kommunip akuerinngilai. Siusinnerusukkut tusagassiutitigut nalunaarutigineqarsimasut marluk ilanngunneqarput.

Borgmesteritut tamanna tulluarsorinngilara arlaatigulluunniit ataqqinninnermut suleqatigiinnissamulluunniit iluaqusiinani, qineqqusaalereerfiusungasumimi innuttaasut akornanni toqqissisimannginnermik pilersitsisumik meeqqat sallunaveeqqutitut atorneqarmata. Taarsiullugu piviusorsiortumik tunngaveqarluta qineqqusaarneq ingerlatsigu.

Sara Olsvigip puiorsimassappagu upernaalli siuliani ajornartorsiuteqartoq nassuerutigaarput! Tamanna peqqutigalugu ikiorneqarnissamik noqqaassuteqarniarluta  Ilaqutariinnermut Naalakkersuisoqarfimmut saaffiginnippugut. Taamaattumik sooq siornali upernaakkut nassuerutigeriikkatsinnik nassueruteqassaagut? Sooq tamakku pasilliinerit uteqqiattut? Angusassanik toraagaqarluta suleqatigiinnikkut ajornartorsiutit iliuuseqarfigaavut, ilaatigut Naalakkersuisoqarfiup illoqarfittullu ikinngutitta Århusip ikiuunnerisigut.

Piffissaq tamaat suliniummi matumani kommunalbestyrelsip tamakkiisumik tapersersorpaativut, aammalu isumaginnittoqarfimmi, ilagalugu meeqqanut inuusuttunullu tunngatillugu, sulisut 70 procentinik amerlineqarnissaat akuersissutigisimallugu, taannalu ilutigalugu aqutsisut nakussassarneqarlutik, aamma isumaginnittoqarfimmut tunngatillugu immikkut annertuunik aningaasaliisoqarpoq (10-12 mio. kr.-t). Suliat ingerlapput ajornartorsiutillu qaangerniarlugit suleqatit isumaginniinnermut ataatsimiititaliaq suleqatigalugu angusassanik toraagaqarlutik sullipput.

Kommune atorfinnik akuerisaareersunik tunngaveqarluni sulisussarsiorpoq, qujanartumillu nutaanik ilinniarsimasunik atorfinitsitsinerit iluatsissimapput. Kisianni sulisussarsiornermi ajornartorsiuteqaratta suli atorfiit inuttaqanngitsut arlaliupput.  Naatsorsuutigaara Naalakkersuisunut ilaasortap ilisimassagaa Namminersorlutik Oqartussat isumaginninnikkut siunnersortinik pisariaqartinneqartunik naammattunik ilinniartitsisannginnera sulisussarsiornermi ajornartorsiuteqarnermik kinguneqartoq.

Taamaattorli nuannaarutigaarput kommune immikkut aningaasaliillunilu atorfinnik nutaanik AKUERSISSUTEQAREERSOQ Naalakkersuisunut ilaasortap maluginiarsimammagu. Tamannali 2016-ip aasaanerani Naalakkersuisoqarfiup kinguneqarluartumik suleqatiginerata malitsigisaanik iliuuseqarfigereersimavarput, tassa Sara Olsvigip Naalakkersuisunut ilaasortanngornissaa sioqquterujussuarlugu. Kisianni ajoraluartumik suut tamarmik siveqarput, taamaattumik aningaasaatit pisariaqartinneqartut pigineqareeraluartut piareersaatitullu suliat tamarmik naammassineqareeraluartut imaanngilaq ingerlaannaq ajornartorsiutit qaangerneqarsinnaasut.  Kommunalbestyrelsip ataatsimoortup isumaqatigiittullu novembarip 30-anni 2016 isumaginnittoqarfiup aaqqissuussaanermut pilersaarutaa nutaaq akueraa, IA ilanngulluni.

Kommunip sulisuisa ajornartorsiutillu aaqqiiviginiarneranni angusassanik toraagaqarluni suliniutit nikanarsaannarnagit akisussaasutut Naalakkersuisunut ilaasortap suliniut suli annertunerusumik tapersersortariaqaraluarpaa, suleqatigiinnerlu pissarsinarluartoq siorna misigisarput nangillugu.  

Taamaattumik isumaginninnermi ajornartorsiutit qaangerniarneranni kommunimik uteqqiilluni pasilliinerit piunnaarlugit suleqatigiinnissaq kajumissaarutigissavara. Akisussaasutut Naalakkersuisup kommunip isumaginninnikkut namminersorluni aqutsisinnaanera upperinngippagu ersarissumik nalunaaruteqarnissaa kissaatiginarpoq, nunamimi maani kommunituaannginnatta isumaginninnikkut unammilligassaqartut."


Jørgen Wæver Johansen

Borgmesteri