Kîstat Lund-imut eqqaaniut

Kalaallit Nunarput eqqumiitsuliortumik nunarsuarmi tusaamasaasumik annaasaqarpoq
9. januar 2017 Allattoq: Borgmester Jørgen Wæver Johansen, Kommune Kujalleq

Eqqumiitsuliortoq, ilinniartitsisoq, atuakkanut ilusilersuisartoq, Kunngikkormiut ataqqinaammik nersornaasiuttagaannik pigisalik, Nunatsinni eqqumiitsuliortunut nersornaammik pigisalik, Kîstat Lund, inuusoq 11. oktober 1944 Ammassivimmi, arfininngornerup sapaatillu akornanni 8. januar 2017 Qaqortumi qitiusumik Napparsimmavimmi. Taamaalillunilu Kalaallit Nunarput eqqumiitsuliortorsuarmik nunarsuaq tamakkerlugu tusaamasaasumik annaasaqarpoq.

Kîstat Narsap atuarfiani 1975-miilli ilinniartitsisuuvoq, qularutiginngilaralu meerarpassuit piffissap ingerlanerani atuartissimasai, eqqumiitsuliornerup tupinnartup inuttullu pisuunngornartup silarsuaanik paasinnissinnaanermik annertuumik ilikkagaqarsimassasut, Kîstap annertuumik ilisimasaqarnera piginnaasaqarluarneralu iluaqutigalugu.

Meeqqat atuarfianni atuartitsinermi saniatigut, Kîstap nammineq eqqumiitsuliortutut piginnaasani, annertuumillu ataqqineqaatigisani  inerisarsimavaa, piginnaasaalu taakku inuppassuit nunatsinniittut, Danmarkimiittut aammalumi nunarsuatsinni sumi tamaniittut kusanassutsimik takunnittarnermikkut iluaqutissarsiffigilluarsimagaat qularutissaanngilaq. Kîstammi eqqumiitsuliortutut tamatigoortuullunilu annertuumik suliaqarpoq, ilaatigut titartaasartutut, uulialimmik qalipaasartutut, imilertakkanik qalipaasartutut, pappiaqqanik qiortaasartutut, ilusilersugartalinnik qalipaasartutut, iikkanilu ikaartitikkat qalipagartaanik suliaqartartutut ilisimaneqarpoq.

Kîstap eqqumiitsuliai eqqumiitsuliaapput nunarsuarmi eqqumiitsuliortut pitsaanerpaanut akuupput, taamaammallu Kîstap suliai piumaneqartupilussuupput, ilaatigut pisortat allaffeqarfiisa ilinniartoqarfiillu pinnersarneqarnissaanni iminneqarluartarpoq, uangalu tanngassimaarlunga innersuussutigisinnaavakka Kîstap qalipagai Qaqortumi Kommunip ataatsimiittarfianiittut, aamma innersuussutigisinnaavakka eqqartuussivissuarmi Østre Landsretimi qalipagai tivasut ilusilersugartallit.

Pisortat allaffeqarfiinik ilinniartoqarfinnillu pinnersaasarnerup saniatigut, saqqummersitsisarnerni Kîstat annertuumik peqataasarpoq. Taamaalilluni nammineq Kalaallit Nunatsinni, Islandimi Danmarkimilu saqqummersitsisarpoq, aammalu eqqumiitsuliortoqatini peqatigalugit Kalaallit Nunatsinni, Danmarkimi, Scandinaviami naalagaaffinni, Canadami, Alaskami, Tysklandimi, Japanimi il.il., saqqummersitsisarpoq.

Kîstat eqqumiitsuliortorsuartut piginnaasaqarnini tunngavigalugu Namminersornerullutik Oqartussat eqqumiitsuliortunut nersornaasiuttagaanik 1989-mi tunineqarpoq. Taamatuttaaq Kunngikkormiut nersornaasiuttagaannik 1997-mi tunineqarnermigut Ridder af Dannebrog-itut toqqagaavoq.

Kîstat maqaasissavatsigit, toqussat tikillugu Narsamut aammalu Kommune Kujallermut tamarmut sinniisuulluarputit. Taamaattorli tuppallersaatigaarput, taarserneqarsinnaanngitsunik eqqumiitsulianik   kusanarluinnartunik, amerlasuunik annertuunillu qimatsivigigatsigut, taakku paarilluassavagut taakkulu aqqutigalugit eqqaamaneqarnerit maanna qaqugumullu uumajuassaaq.

Qitornannut Aka Lundimut aammalu Milan Vraamut kiisalu illit uummatinnut qanittunut tamanut uummammit pisumik misiginneqataanera matumuuna apuuppara.

Eqqaaneqarnerit ataqqinartuuli.