2017-imut missingersuutit

2017-imut missingersuutit matumani saqqummiunneqartut ukiunullu 2018-imiit 2020-p tungaanut aningaasartuutissatut missingersuutit kommunalbestyrelsip siullermeerinnilluni oktobarip 19-ianni 2016 ataatsimiissutigai. Aappassaaneerinnilluni naggataarutaasumillu aalajangiineq novembarip 30-anni 2016 pivoq. Missingersuutit oqallisigineqarneri imatut ingerlanneqarsimapput ingerlatsinermut aningaasartuutit nalinginnaasut saniatigut kissaatit tamarmik immikkut ataatsimiititaliani oqallisigineqarsimallutik.
8. december 2016

Pineqartut tassaapput 2017-imut missingersuutit aningaasartuutissatigut isertitassatigullu oqimaaqatigiissut. Atugassatut missingersuutigineqartut 547,3 mio. kr.-upput isertitassallu 548,5 mio. kr-unissaat naatsorsuutigineqarluni. Kommunimut ataatsimoortumik akileraarummut procentip 28 procentiunissaa kommunalbestyrelsip aalajangiuppaa, taamaalilluni 2016-imut sanilliullugu akileraarummut procenti allannguuteqanngilaq.

Isumaginnittoqarfiup sulisoqarnikkut qaffaavigineqarnissaa kommunip salliutissimavaa. Isumaginnittoqarfimmut missingersuusiatut killiliussat 6,5 %-imik annertusineqarput, 2016-imi missingersuutigineqartunit 188 mio. kr.-niit 2017-imi missingersuummut killiliussamut 200,3 mio. kr.-nut. Tamanna politikkikkut pingaarnersiuinermik aallaaveqarpoq, peqqutigalugu isumaginninnikkut akisussaaffitta pitsaanerusumik isumaginissaa kissaatigigatsigu. Aammattaaq atorfiit katillugit 19-it pilersinneqarnerisigut isumaginnittoqarfimmi sulisoqarnikkut amerlisaasoqarpoq.

Kommunalbestyrelse aamma aalajangersimavoq nammineq kajumissuseq toqqammavigalugu suliniuteqarnermut atugassat pilersinneqassasut, 5 mio. kr.-llu tassunga immikkoortinneqarsimallutik, taakku kultureqarnermut, utoqqarnut, nammineq kajumissuseqarluni suliniuteqarnermut timersornermullu tunngatillugu immikkut suliniuteqarnermi atugassatut qinnuteqarnissamut periarfissaqalerpoq. Nammineq kajumissuseq toqqammavigalugu suliniuteqarnerup iluani tulleriiaarinerit aaqqissugaanermut politikkimit aallaaveqarput, matumani innuttaasut imminnut ilaquttaminnullu pilersortut amerlisarnissaat anguniagaalluni. Taamaattumik ukiut siuliinisulli sammiviit pingasut pingaarnersiukkat tassaapput:

  1. Meeqqat & inuusuttut.
  2. Suliffeqarnerup avataaniilersut sanngiitsumillu inissisimasut inuiaqatigiinnut peqataalerseqqinneqarnissaat.
  3. Utoqqarnut immikkut iliuuseqarneq, ingammik utoqqaat akornanni peqqinnissap immikkut sammineqarneratigut

Aammattaaq kommunimi ilaqutariit meerallit isumagineqarnissaat qinersimavarput, matumani meeqqerivinnut akiliutigineqartartup appartinneqarneratigut, tassa annerpaamik 1.500 kr.-nngortinneqarneratigut. Ilaqutariit meerallit tassaapput kommunitsinni pisuussutivut, taamaattumik Kommune Kujalleq meeqqanit, inuusuttunit angajoqqaavinillu kommunip najugaqarfigissallugu pilerinartunngortinnissaa kissaatigaarput.

Missingersuusiamut saqqummiunneqartumut immikkut saniatigut suliniutissatut ilaatinneqartussatut kommunalbestyrelsip 2017-imi ivigaasanik arsaattarfiliornissat pingasut aningaasaleeqataaffigissallugit toqqarsimavaa. Suliniutip taassuma meeqqatta inuusuttattalu inuunermik eqeersimaartumik inuuneqarnissaannik sunngiffimmilu peqqinnartunik sammisassaannik periarfississavai.

Aammattaaq inissiarsuaatitta inissiallu attartortittakkatta pitsaassusaat qaffassarniarlugu kommunip inissiat attartortittakkat oqummik eqqorneqarsimasut ingitsiternissaat ingerlateqqissallugu kissaatigaa. Siunertamut tassunga 6,1 mio. kr.-t atugassatut missingersuusiarineqarput. Utoqqarnut inissiat immikkut pingaartinneqarput, assersuutigalugulu 2017-imi Qaqortumi utoqqaat inissiaat qulit sukumiisumik nutarsarneqassallutik.

Tulleriiaarinermi pingaarnertut innuttaasunut sapinngisamik pitsaanerpaamik kiffartuussinissaq anguniarneqassaaq. Qanilaassuseq peqataatitsinerlu pingaartinneqarput, aamma inuussutissarsiutit eqqarsaatigalugit. Tassunga tunngatillugu kommune immikkut iliuuseqarnikkut innuttaasut peqataatinneqarnissaat siuarsarniarlugu iliuuseqarpoq, 2017-imummi missingersuummi tulleriiaarinermi aalisartut piniartullu inuussutissarsiutaannut, tassalu ineriartortitsinissamut peqatigiiffiannut aningaasanik illikartitsimmat. Peqatigiiffiup, kujataani aalisartut piniartullu peqatigiiffiisa siulersuisuisa kommunillu aaqqissugaata illoqarfinni pingasuni kalaalimineerniarfiit, umiatsialeriviit kiisalu sulianut attuumassuteqartunut tunngatillugu siunnersuisarnissamut kiffartuussinissaq ingerlatissavaa. Tamatuma saniatigut peqatigiiffiup inuussutissarsiutip iluani ineriartortitsinissamut aningaasaliissutit aqutarissavai.

 

Pitsaasumik akiliisinnaassuseqarnermik aalajangiussaqarneq aamma patajaatsumik aningaasaqarnikkut innuttaasunut pisariaqartunik kiffartuussinissanik sukumiisumik ukkatarinninnissaq kommunalbestyrelsip pingaarnertut kissaatigaa. Siunissami kommunip kiffartuussissutai nangitamik ineriartortinneqarsinnaassappata tamanna pitsaasumik patajaatsumillu aningaasatigut inissisimanissamik piumasaqaatitaqarpoq.

Missingersuut akuerineqarsimasoq uani aaguk

Oqaatsit naalisakkat nassuiaataat

Jørgen Wæver Johansen,

Borgmesteri