Kommune Kujallermi atuarfiit nersualaarneqarput

Kommune Kujallermi Atuartitaanermut ataatsimiititaliami nuannaarutigalugu oqaaseqarfigissavarput kujataani atuarfinni pingasuni, Narsami, Qaqortumi Nanortalimmilu ilinniartitsisut atuartullu suliniuteqarluarnermikkut nuna tamakkerlugu maluginiarneqarsimanerat.
20. december 2016

Narsap Atuarfia  Kalaallit Nunaanni Timersoqatigiiffiit unammisitsinerani eqeersimaarfiusutut toqqarneqarsimavoq, tassungalu atatillugu 25.000 kruuninik akissarsillutik.

Qaqortumi Tasersuup Atuarfiani klasse pujortarfiunngitsoq nuna tamakkerlugu unamminermi 7.c ajugaapput  30.000 kruuninik akissarsisinneqarlutik.

Septemberimiit  novemberip tungaanut arlalinnik suliaqarnikuullutik 18.november nassiussipput paasitinneqarpugullu ajugaasimasut. Assiliarpassuit, filmeeraq, illoqarfimmi ”akerliussutsimik” takutitsillutik aammalu innuttaasunut ataatsimiisitsillutik pinikuupput.

Unammisitsinermi tassanittaaq Nanortallip Atuarfiani 7.a nr. 2-nngorlutik ajugaapput, taamaalillutik aamma 5.000 kruuninik akissarsisinneqarlutik.

Kiisalu nuna tamakkerlugu unammissutineqartuni Tasersuup Atuarfiani Qaqortumiittumi akullerni klassit arlallit peqataanikuupput, tassani atuarnermi nalaani allorarneqqusaallutik pipput, atuarnerup nalaani aalaneq pineqarnerulluni. Tassani sapaatip akunneri marluk atuarnerminni qasseriaq allorsimanersut allattorneqartarput. Taakkulu aamma nassiunneqarlutik. Pingasunngormat kingullermik paasivarput 4.c makitaasimasut 1000 kr-nimillu eqquillutik.

Kujataani atuarfinni atuartut ilinniartitsisullu, atuartunut peqqinnartunik iluaqutaasinnaasunik suliaqarluarsimanerat angusaqarluarsimanerallu Kommune Kujallermi atuartitaanermut ataatsimiititaliami nuannaarutigeqalugu tusarparput, peqataasimasullu sulianillu ingerlatsisimasut suliniuteqarluarsimannerannik qujassuteqarfigalugit, ajugaasimanerannillu pilluaqqullugit.

Neriuutigaarput suliniutit pitsaasut aamma siunissami atuarfinni peqataaffigilluarneqartarumaartut.

Juullisiorluarnissassinnik, ukiumullu nutaamut iserluarnissassinnik kissaallusi inuulluaqquassi,

Narsaq 20. december 2016

Atuartitaanermut ataatsimiititaliaq sinnerlugu

Benjamin Kielsen, siulittaasoq.