TN: Kujataa angallannikkut ataqatigiissumik aaqqissugaasariaqarpoq

15. september 2016

Kalaallit Nunaata iluani ilaasunik, allakkanik nassiussanillu angallassinermut kiffartuunneqarnissamik isumaqatigiissutit pineqartillugit, Kommune Kujallermit ataasiaannarata tikkuartarparput pingaaruteqarluinnartoq kommunip aammalu kommunimi inuussutissarsiornermik ingerlataqartut akuutinneqartarnissaat. Taamatuttaaq siusinnerusukkut neqeroorutiginikuuarput nunap immikkoortuanut uagut inuuffigisatsinnut tunngatillugu isumaqatigiinniarnerit ingerlattalerumallugit, tamannalu pisinnaanngippat, kommuni isumaqatigiinniarnerni peqataasassasoq.

Isumaqatigiinniarnerit isertuussassaanerarlugit, nunallu immikkoortuini ataasiakkaani ataatsimoortumik akikillisaasinnaanerit ataqatigiinnerarlugit, aammalu innersuussutigineqartarluni kiffartuussinissamut isumaqatigiissutit Namminersorlutik Oqartussat kisimiillutik akilertaraat, Namminersorlutik Oqartussat tungaannit itigartinneqartarpugut. Tamanna isumaqarpoq kiffartuussinissamik isumaqatigiissutissat pillugit isumaqatigiinniarnerit, kommunit aammalu kommunini inuussutissarsiornermik ingerlataqartut peqataatinnagit ingerlanneqartartut.

Inuiaqatigiit Kalaallit, ineriartornermik annertuumik pisariaqartitsisut, akissaqanngillat iluaqutaanngitsumik nerriviup qaavanut piimiannguarluni isumaqatigiinniarnernut, isertorluni ingerlanneqartartunut, naggataatigullu qularnartumik angusaqarfiusartunut. Maanna taamatoqqissaaq inissinneqaqqippugut, tassa kommune, kommunip innuttai aammalu minnerunngitsumik kommunimi inuussutissarsiornermik ingerlataqartut angallannikkut ajornerusumik inissinneqartussanngorlugit isumaqatigiissuteqartoqarluni, tamannalu pivoq toqqaannartumik eqqugaasussat suminermilluunniit atugariligassaminnut sunniuteqartinneqaratik taamaalillutillu isumaqatigiissutit inernerannik isaassiffigigineqaannarlutik.

Ajuusaarutigalugu poortunngilluinnarluguli inissisimatitaalernitsinni ernumalersitaanerput aammalu iliuusissaarutsitaanerput taamak oqaasertalertariaqarparput. Isumaqatigiissutigineqartummi nutaat tunngavigalugit ilaasut angallanneqarnissaannut tunngatillugu pissutsit atuutsinniarneqartut najoqqutaralugit, aningaasaliissutit ullumikkut 28 mio. kr.-iusuniit aningaasanut inatsisissatut siunnersuummi nutaajusumi taamaallaat 24,1 mio. kr-inngortinniarneqarmata.

Naalakkersuisut polikikkikkut siunertarisimanngippassuk aningaasatigut atukkatigullu ajorseriaateqartitsinissaq, sakkortunerpaamik noqqaassutigisariaqarparput isumaqatigiissutit nutaat allannguuteqartitsinikkut iluarsiiffigineqassasut, taamaalilluni ataani allassimasut iluarsiivineqarsinnaaqqullugit:

  1. Ilaasunik angallassinissanik taamaatitsisariaqarnerni kinguaattoornernilu uninngatitaanermi aningaasartornerulertitaanermi ajornartorsiutaalersussat aaqqiivigineqarnissaat.
  2. Billetsinik inniminniiniarnerni angallassisut assigiinngitsut akornanni ataqatigiissaarisoqarnissaa.
  3. Angallaffinni assigiinngitsuni tamani aallartussat tikittussallu pilersaarutigineqarnerisa ersarissuutinneqarnissaat.
  4. Allakkat poortukkallu assartorneqartarnerisa aaqqiivigineqarnissaat.
  5. Kiffartuussinissamik isumaqatigiissutit nutaat atuutilernerisa kingunerisaanik sumiiffinni ataasiakkaani sulisut suliffissaarutsinneqartussat amerlassusaasa nassuiarneqarnissaat.

Taamatuttaaq noqqaassutigaarput, Namminersorlutik Oqartussat aammalu kommunip atorfilittaasa akornanni ataatsimeeqatigiinnerit pinasuartumik kinguarsaanertaqanngitsumillu aallartinneqassasut, tassani siunertarineqassalluni isumaqatigiissutit nutaat malitsigisaanik kingunissaasussat aammalu taakku qanoq aaqqiivigineqarsinnaaneri pillugit siunnersuusiortoqarnissaa ajornartorsiutaalersinnaasullu suussusersineqarnissaat.

Angallannikkut kingumut nalunarluinnartumik inissinneqaratta, Naalakkersuisunut kaammattuutigaarput matumani piumasaqaativut kissaativullu tusaaniarneqassasut taamaaliornikkullu uppernarsarneqarsinnaasunik itisiliissutaasunik aammalu minnerunngitsumik toqqissisimalersitsissutaasunik nassuiaasinnaanissaq aammalu aaqqiissutissanik Kujataani inooqataaffigineqarsinnaasunik toqqammavissiinissaq anguneqarsinnaaqqullugu.

Inussiarnersumik inuulluaqqusilluta

Jørgen Wæver Johansen                                                                      Simon Simonsen
Borgmesteri                                                                                           Inuuss. ataats. siulittaasoq