Eqqaaniut

Bent Ole Kleist
12.07.1955 – 08.09.2016
12. september 2016

Qaqortoq, Kujataa Kalaallillu Nunarput tamarmi ernerulluartumik annaasaqarpoq

Aliasuutigingaakkannik paasivara Bent Ole Kleist (Vaava) ippassaq sisamanngornermi 8. september 2016 toqukkut qimagussimasoq. Matumuunalu Kommune Kujallermi Kommunalbestyrelse sinnerlugu nulianut, qitornaanut qanigisaanullu tamanut aammalu politiini suleqataanut misiginneqataangaarnera apuukkusuppara.

Bent Ole Kleist 1978-mi politiinngornermi kingorna toqussi tikillugu politiitut, politeeqarfimmi pisortatut kingullertigullu nunap immikkoortuani politiit pisortaattut sulivoq. Ukiut amerlanerpaat illoqarfimmi inunngorfigisani Qaqortoq aallaavigalugu sulivoq.

Bent Olep immikkut ilisarnaatigai inuttut ilassiuminartuunini, kissalaartuunini, oqaloqatigiuminartuunini tusarnaallaqqittuuninilu. Piginnaasanilu taakku politiitut sulinermini nukittoqqutigisimagai aammalu politiitut sulinermi saniatigut inuiaqatigiinni akuulluarluni peqataalluarnermini sunniuteqarluarsimaneranut pissutaaqataalluinnartoq qularinngilara, Bent Olelu tamanit ataqqisaavoq.

Bent Ole politiitut sulinermi saniatigut pinaveersaartitsinermik annertuumik suliaqarpoq, aammalu nappaassuarmik kræftimik nappaateqartunik ilagisaannillu oqaloqatiginnittartuulluni, taakkuinnaalluunniit ersersippaat Qaqortumiittut, Kommune Kujallermiittut aammalumi Kalaallit Nunatsinniittut tamatta inummik ataqqinartumik inoqatiminullu uummatigissumik annaasaqartugut.

Bent Ole Kleist-ip eqqaaneqarnera ataqqinartuuli!

 

Kommune Kujallermi Kommunalbestyrelse sinnerlugu

 

Jørgen Wæver Johansen
Borgmesteri