Kommunit isumaginninnermut ilaqutariinnermullu ataatsimiititaliaasa Naalakkersuisunut ammasumik kaammattuutaat:

Tuaviupilunneq kingunerlutsitsisarpoq, taamaammat meeqqanik ikiorsiisarneq pillugu Inatsisartut inatsisissaattut siunnersuut kinguartinneqarli!
12. september 2016

Qularutigineqassanngilaq Kommunit Isumaginninnermut aammalu Ilaqutariinnermut ataatsimiititaliaat inatsisissatut siunnersuummut tusarniaanerni marluusuni akissutissanik sukumiisunik tunniusserusullutik nukippassuit atorsimammatigit.

 

Inatsisissatut siunnersuummi siunertarineqartut Kommuninut aammalu Kommunit isumaginninnermik suliaqarlutik atorfilittaannut qanoq kinguneqassanersut nalilersorluarsinnaniassagatsigit naatsorsorsinnaaniassagatsigillu siunnersuut sukumiisumik qulaajarniarsimavarput. Tassunga aamma sanilliunniarsimavarput ullumikkut inatsisit atuuttut naapertorlugit, sulisussanik suliassaminnut ilinniarsimasunik najumminninniartarnitsinni pissarsiniartarnitsinnilu ajornartorsiuteqarnitsinnut qanoq sunniuteqassanersoq.

 

Unikallalluta nassuerutigisariaqarparput, inatsisissatut siunnersuut annertoorujussuaq taassumalu ilassutitai aamma annertoorujussuit pillugit akissuteqarnissatsinnut naammaginartumik suliarinissaannut piffissaliussaq sivikippallaarujussuarpoq, aarleqqutigaarput meeqqanik ikiorsiisarneq pillugu inatsisitigut sinaakkusersuinissami siunertat pitsaagaluaqisut, siunnersuummi pineqartumi Inatsisartunullu saqqummiunniarneqartumi naammassineqarsinnaanavianngitsut, taamaammallu maanna mianersoqqusivugut!

 

Inatsit taamak iluseqarluni atuutsilersinneqassappat, Namminersorlutik Oqartussat aammalu Kalaallit Nunatsinni Kommunit arlalissuartigut inatsisip atuutsinneqarnerani naammassinninniartarnissaat, taamaalillutillu innuttaasunik sullissinissaat ilaannakuussasoq aarleqqutigaarput.

 

Sakkortuumik kaammattuutigaarput Naalakkersuisut Namminersorlutillu Oqartussat suliamut tunngatillugu kigaallassasut, inatsisisatullu siunnersuut sukumiisorujussuaq piffissaqartitsilluarluni suliarineqalissasoq, suliarinninnerullu ingerlaqqinnerani attuumassuteqartut ullumikkumit annertunerusumik tusaaniarneqassasut.

 

Amigaataasunik inatsisissatullu siunnersuummi teknnikkikkut ajornartorsiutaasunik matumani taakkartuisinnaagaluarpugut, taamaaliornatali matumuuna imatut siunnersuteqarpugut:

  • Inatsisissatut siunnersuut UKA16-mit peerneqassasoq
  • Namminersorlutik Oqartussanit Kommuninillu inuttalikkamik inatsisissap piareersarnerani suleqatigiissitaliamik pilersitsisoqassasoq
  • Inatsisissatut siunnersuut UKA17-mi Inatsisartunut siullermiigassanngortillugu piareersarneqassasoq

 

 

Taamaassinnaanngippat

  • Tusarniaaneq sivitsorneqassasoq, taamaalilluni siullermeerneqarnera Inatsisartut upernaakkut 2016-mi ataatsimiinneranni siullermiigassanngortinneqassasoq

 

 

Kommunit Isumaginninnermut Ilaqutariinnermullu ataatsimiititaliaat sinnerlugit

 

Inussiarnersumik inuulluaqqusilluta

 

 

Karla Egede Bisgaard (S)               Poul Hansen (D)                               Alfred Olsen(S)                               Kristian Jeremiassen (S)
Kommune Kujalleq                        Kommuneqarfik Sermersooq      Qeqqata Kommunia                      Qaasuitsup Kommunia

Siulittaasoq                                     Siulittaasoq                                      Siulittaasoq                                      Siulittaasoq