Kommune Kujallermi aatsitassanut tunngasunut siunnersorti nutaaq

Kommunip aatsitassanut tunngatillugu suliaqarnera annertusarniarlugu Kommune Kujalliup geologi tassa nunarsuup pinngoriartorneranik pissusianillu ilisimatooq Ole Christiansen kommunimi aatsitassanut tunngatillugu immikkut siunnersortitut aggustip aallaqqaataa aallarnerfigalugu atorfinitsippaa.
4. august 2016

Ole Christiansen NunaMineralsimi ukiorpassuarni pisortatut aammalu aatsitassanut tunngasunik ilisimatuutut atorfeqarsimanerminit aatsitassarsiornerup silarsuaanut ilisimasaqangaatsiarpoq.

 

Ole Christiansen kalaallinut inuiaqatigiinnut tunngasunik tunuliaqutaqarluarpoq, nunatsinnilu aatsitassarsiornermut tunngasunik immikkuullarissunik ilisimaqarluni.

 

Borgmesterip Jørgen Wæver Johansenip Ole Kommune Kujallermut tikilluaqquaa, Olellu suliaqarnissaanut neriuuteqarfigilluarlugu, ilanngullugu oqaatigaa, "Olep nunatsinni periarfissat nunattalu pinngoriartornera pissusialu ilisimasaqarfigilluarai, taakkuinnaanngitsulli aatsitassanimmi piianermik pisariaqartinneqartut aamma sammisarai. Olep suleqatigilernissaanut qilanaarpunga".

 

Ole Christiansenip oqaartigaa, Kommune Kujallermi sulinissaminut qilanaarluni, "Aatsitassanik piiaaffioriataarsinnaalluartoq, Kujallermullu Nunatsinni kommunini aatsitassarsiorfigineqarnerpaanngortitsisinnaasoq".

 

Ole kommunimi sulisut akornaniilissaaq, Qaqortumilu borgmesterip allaffeqarfiani allaffeqassalluni.