Naalakkersuisut Kommuni Kujallerlu suleqatigiinnissamut isumaqatigiissutaat nutaaq

Ullumikkut ulloq Naalakkersuisunut Kommune Kujallermullu nuannaarfiuvoq. Kommune Kujalleq, Kommuneqarfik Sermersooq Qeqqata Kommunialu assigalugit, NAKUUSAp suliniutaanut ”Uagut ulluinnarput uagut niperput”-mut ukiuni pingasuni suleqataaniarluni atsiorpoq, suleqatigiinnerlu sivitsorneqarsinnaajumaarpoq.
22. august 2016

”Uagut ulluinnarput - uagut niperput” tassaavoq NAKUUSAp suliniutaasa ilaat, suliniummi Meeqqat Isummersorfii kommunini sisamaasuni meeqqat atuarfiinilu tamaginni Pisinnaatitaaffiit pillugit siunnersoqatigiiffiit Nakuusaaqqanik taaneqartut pilersinneqarnissaat siunertarineqarpoq.

Kommunini Meeqqat Isummersorfii inuusuttuaqqanik 13-18-it tungaanut ukiulinnik inuttaqassapput, taakkulu kommunalpolitikerinut Inatsisartunullu siunnersuuteqartartussaapput.

Atuarfinni Nakuusaaqqat amerlanertigut atuartunik annernik inuttaqartinneqassapput, taakkulu nunatsinni meeqqat tamaasa sinnerlugit oqaaseqartartuussapput.
Naalakkersuisoq Martha Lund Olsen Kommuni Kujalliullu borgmesteria Jørgen Wæver Johansen suleqatigiinnissamut isumalluarput siunissamullu meeqqat oqariartuutigisaannik tusartalernissartik qilanaarilereerlugu:
”Kommuni Kujalliup suleqatiginnikkusunnerput tikilluaqqummagu assut nuannaarpunga, kommuniminni Meeqqat Isummersorfeqalissallutik atuarfinnilu Nakuusaaraqartitilissallutik. Taamaaliornikkut kommuniannit meeqqat oqariartuutigisaat tusaasinnaanngussavagut, tassa Meeqqat Isummersorfiatigut kisiannilu aamma atuarfinni Nakuusaaqqaniit. Naalakkersuisuninngaanniillu meeqqat pisinnaatitaaffiinik qaammarsaajuarnissaq pingaartitaraarput, taamaaliornikkullu tamanna ilaatigut angusinnaallutigu”, Naalakkersuisoq Martha Lund Olsen taamak ilaatigut oqaaseqarpoq.

”Kommune Kujallermut pingaaruteqartorujussuuvoq meerartatta inuusuttortattalu ajunnginnerpaamik atugassaqartitaanissaat qulakkeersimassallugu, taamatuttaaq pingaaruteqarpoq namminneerlutik ulluinnarni qanoq atugassaqartitaanertik pillugu ilusilersueqataanissaat qulakkiissallugu, naatsorsuutigilluinnarparalu suliniut manna Kommunip meeqqanut inuusuttunullu politikkianut pitsanngorsaataassasoq, Borgmester Jørgen Wæver Johansen oqarpoq.
NAKUUSA Kommuni Kujalliup ilinniartitsisuinik aprilimi pikkorissaapput, ukiorlu uani atuarfiusumi kujataani atuarfiit taamaalillutik Nakuusaaqqanik aallartitsisinnaanngorlutik.

Suleqatigiinnissamik isumaqatigiissummik atsiortoqarnerani uppernarsaasutut Kujataani Meeqqat isummersorfiat peqataapput :
Naja-Nuka Bjerge Kristiansen, Ninna Olsen, Julie Tittussen, Helga Kielsen Olsen, Adina Geisler Jakobsen og Johanne Kristiansen (Ingo Miki Petersen peqataasinnaanani nalunaarsimavoq)

Borgmester Jørgen Wæver Johansen, suleqatigiinnissamut isumaqatigiissummut Naalakkersuisunik atsioqateqartuni pingajuuvoq, Qeqqata Kommuniata borgmesteria Hermann Berthelsen taavalu Kommuneqarfik Sermersuup borgmesteria Asii C. Narup siulliusimallutik.

Paasisaqarnerorusukkuit uunga attaveqarit:
Programlederi Arnavaraq Jørgensen, +45 3028 1895, ajoergensen@unicef.dk
Projektmedarbejder Najaaraq Møller, +299 34 66 23, moln@nanoq.gl

NAKUUSA tassaavoq Namminersorlutik Oqartussat UNICEF Danmarkillu suleqatigiissitaliaat 2011imi januarimi aallartinneqarnikoq. Suleqatigiissitaliap siunertarivaa nunatsinni meeqqat inuusuttullu pisinnaatitaaffii patajaallisarnissaat. NAKUUSA amerlanertigut fondiniit aningaasalersorneqarpoq.