Qaqortumi meeqqat inuusuttuaqqallu aalaffissaat/timersorfissaat Multibane atoqqaarfissiortinneqarpoq

Peqatigiiffik Piorsarsimassuseq siuttoralugu Qaqortumi meeqqat inuusuttuaqqallu aalaffissaannik multibanemik pilersitsiniarluni suliniuteqartoqarnera angusaqarfiulluartoq ullumi pisortatigoortumik ammaanersiorluni timitalerneqarpoq.
24. august 2016
Taamaalilluni Qaqortup illoqarfiata qeqqani, ungdomsklub Kaassassuup aammalu Tasersuup atuarfiata ungasinngisaanni, meeqqat inuusuttuaqqallu aalaffigisinnaasaannik Peqatigiiffik Piorsarsimassuseq pilersitsivoq.

Ammaanersiornermut atatillugu Peqatigiiffik Piorsarsimassutsip multibane Kommune Kujallermut ingerlatassanngorlugu tunniuppaa, ingerlaannarlu Kommune Kujalleq sinnerlugu multibanemik tigusisup, Borgmester Jørgen Wæver Johansen-ip, Klubrådimut paarisassanngorlugu ingerlateqqippaa, taamaalillutik meeqqat inuusuttuaqqallu namminneq ingerlatassanngorpaat.

-Timersorfigineqarsinnaasumik pilersitserusussimavugut malugisimagatsigu illoqarfitsinni amigaateqartoqartoq. Siornatigut atuakkanik atorniartarfik maannakkut multibaniulersup eqqaaniittoq ungaloqarnikuugaluarpoq kisiannili atasinnaasimanngillat, meeqqat inuusuttuaqqallu narsaamanermik pinnguarfissaminnik amigaateqarmata. Multibanep inissisimaffiata toqqaviani illu kartoffiliisivikoq peerneqarpoq aalaffissamillu timersorfiusinnaasumik taarserneqarluni, Kent Kielsen suliniummik aallarneeqataasoq oqarpoq.

-Kommune Kujallermit qujavugut innuttaasut kajumissutsiminnik suliaqarnermikkut meeqqanut inuusuttuaqqanullu sammisassat pitsaasut amerlisarmatigit, qularutigineqassanngilarlu kajumissutsiminnik suliniuteqartut sapinngisamik annerpaamik Kommunip piginnaasai tunngavigalugit Kommunemit tapersersorneqartuassasut, borgmesteri oqarpoq, multibanelu meeqqanut inuusuttuaqqanullu ingerlatassanngorlugu tunniullugu.

Peqatigiiffik Piorsarsimassuseq Julius Peter Fly-mit, Lars Lundblad-imit aammalu Kent Kielsen-imit siulersorneqarpoq, multibanellu piviusunngortinneqarnissaanut aningaasanik katersuiniarnermi aqutsisuullutik, nammineq katersiniarnerup saniatigut aningaasaleeqataapput AP Møller Mærsk, Lokale og anlægsfonden, Kommune kujalleq, Namminersorlutik oqartussat, BK Revision aammalu Permagreen.

Kommune Kujalliup sinnerani illoqarfinni nunaqarfinnilu kajumissuseq tunngavigalugu assingusumik suliniuteqartunut Kommune tapersiinissaminut ammallunilu piareersimavoq.


Multibane pillugu paasissutissanik annertunerusunik pissarserusukkaanni saaffissaq:

Kent Kielsen, Peqatigiiffik Piorsarsimassuseq, +299643594 keki@kujalleq.gl