Kujallermi aalisarneq qanoq pissava?

Taamak qulequtsiilluni Nanortalimmi Qaqortumilu innuttaasunik ataatsimiitsitsisoqalerpoq.
Ataatsimiitsitsinerni eqqartorneqassaaq Kommune Kujallermi aalisakkanik suliffissuarni sulisussaaleqisarneq qanorlu iliorluni anigorniarneqarsinnaanersoq.
23. august 2016

Innuttaasunik ataatsimiitsitsinermi saqqummiussisuussapput Borgmester Jørgen Wæver Johansen, Inuussutissarsiornermut Suliffeqarnermullu Ataatsimiititaliami Siulittaasoq Simon Simonsen aamma Arctic Prime Fisheries sinnerlugu Ole Aggo Markussen.

Innuttaasunik ataatsimiitsitsinissaq sioqqullugu Borgmesteri, Jørgen Wæver Johansen, imatut oqaaseqarpoq:
- Innuttaasut sulisinnaasut sapinngisamik amerlanerpaat suliffeqarlutik imminnut pilersornissaat Kommune Kujallermut pingaaruteqartorujussuuvoq. Innuttaasunut ataasiakkaanut naleqarluartumik pitsaasumillu inuuneqarnissaannut aqqutaaginnarani aammali suliffeqarfiit sulisussaqarnissap tungaatigut naatsorsuutiginnissinnaallutik inerisaasinnaanissaannut annertuumik pingaaruteqarpoq, taamaammat Arctic Prime Fisheriesip Kommune peqatigalugu innuttaasunik ataatsimiititseqatiserinninnera nuannaarutigaarput ilassilluarlugulu.

Ataatsimiititaliap siulittaasua, Simon Simonsen, isumaqataavoq:
- Kommuni inuussutissarsiornikkut ingerlalluassappat tamatta kivitseqataasariaqarpugut, immitsinnuinnaq pinnata kingulissagulli aamma eqqarsaatigalugit. Taamaammat suliffissaaleqinerup annikillisarnissaanut suliffeqarfiillu naammattumik sulisussaqarnissaannut qanoq annerpaamik qulakkeerinnissinnaanerluta qanimut tikilluta oqaloqatigiissutiginissaa piffissanngorpoq. Najugaqarfipput tamattaa ineriartortikkusupparput, nalunngilarpullu tamanna taamaallaat sulinikkut pisinnaasoq.

Arctic Prime Fisheries sinnerlugu ataqatigiissaarisoq, Ole Aggo Markussen, imatut oqaaseqarpoq:
- Kujallermi suliffissuit akilersinnaasunngortinniarsarinerannut atatillugu sulisut aalaakkaassut atorfissaqartinneqarput. Sulisut soorunami qitiulluinnarlutik inissisimasuupput, taakkulu naatsorsuutigineqarsinnaatinnagit ineriartortitsisoqarsinnaanngilaq. Taamaattumik kissaatigisimavarput qanoq aaqqiissoqarsinnaanera sammillugu ammasumik oqaloqatigiinnissarput, Ole Aggo Markussen oqarpoq, nangillunilu: Suliffeqarfiup iluani periarfissaasinnaasutut eqqartorneqartarsimasoq tassaavoq sulisussanik tikisitsinissaq. Taamak iliornissaq akisuujuvoq, aamma allatigut periarfissarsiorluni aaqqiissuteqarsinnaaneq ujartoqqaarneqartariaqarpoq, sapinngisamik najugarisami sulisussat aallaavigalugit.

Qaqortumi ataatsimiitsitsineq pissaaq sisamanngorneq 25. August nal. 19:00 Katersortarfimmi
Nanortalimmi ataatsimiitsitsineq pissaaq arfininngorneq 27. August nal. 15:00 Qujanartip Illuani

Annertunerusumik paasisaqarusukkaanni saaffissaq:
Jensine Berthelsen Paasissutissiinermut pisortaagallartoq +299645359