Inuttaa pinnagu arsaq malersorsiuk IA!

Tusagassiorfiit aqqutigalugit maluginiarpara, Kommune Kujallermi Inuit Ataqatigiit Kommunalbestyrelsemi ilaasortaatitaat tusagassiuutitigut nalunaaruteqarsimasut, tassani ersersinneqarluni kommunaldirektør Frank Hedegaard Jørgensen-imut tatiginninginneq.
23. august 2016
Soorunami IA-p nammineq aalajangissavaa, qinikkatut sulinermi nukini inunnut ataasiakkaanut tunngasunut atorlugit killiffimmini uninngaannassanerluni, taamaattorli IA qutsavigissavara kommunitsinni pissutsit ilorraap tungaanut saatinniarlugit sulinitsinni killiffipput pillugu erseqqissaateqarnissannut periarfissimmanga.

Ataatsimut isigalugu, Kommunimut pitsaasumik inissisimavugut. Naak massa suliassavut suli imaannaangikkaluartut, pingaartumik isumaginninnermut suliassat tungaatigut, isumaqarluinarpunga Kommune, allaffissornerup tungaaatigut, aammalu sutigut tamatigut pitsaasumik nalimmassartoq. Kommunip allaffissornikkut suliassaanut sulisunik suliaminnut ilinniarluarsimasunik pissarsiniarnerput maanna kinguneqarlualeriartorpoq. Inunnik isumaginninnerup iluani sulisutta Isumaginninnermullu Ataatsimiititaliap akornanni, taamatuttaaq Namminersorlutik Oqartussat aallartitaannik aammalu Aarhus Kommunemi sulisunik attartukkatsinnik suleqatiginninneq ingerlalluarpoq. Isumaqarluinnarpunga pissutsit taamaannerat Kommunalbestyrelsep qaqugukkulluunniit issiasup qinikkatut kissaataanik naammassinninniarnermut tunngavissiilluartoq, aammalu tamanna isumalluarlungalu tanngassimaarutigaara taamaalilluta – aamma tassuunatigut ineriartorneq pitsaasup tungaatigut saatikkuartoratsigu.

Taamaattumik IA´p nalunaarutigisaanut assut paatsuungavunga. Tassami IA´p, immaqa qinikkatut politikkikkut anguniagassaaleqinermik aallaavilimmik, allaffissornikkut suliaqartunut allaffissornikkullu aaqqissuussaanitsinnut saassissiuarnera ingerlaannassappat, aarleqqutigaara pissutsit kissaatiginanngeqisut killiffigeqqissagigut, taamaalillutalu aalaakkaasumik ingerlatsisoqarnissaanik sulissutiginninnerput maangaannaqqissasoq taamatullu sulisunik suliaminnut ilinniarluarsimasunik pissarsiniaraluarnitsinni Kommunerput qaangiinnarneqartaleqqissasoq, tamannalu eqqaasitsissutigalugu, IA kaammattussavara maanamit annertunerusumik, Kommunip innuttaanut Kommunillu pitsaasup tungaanut ineriartorninniarneranut sinaakkutassat pitsaasut toqqissisimanartullu pilersinniarneqarnerannut peqataaqqullugu.

Taamatuttaaq tupigutsaqqallunga, IA eqqaasittariaqarpara, IA-p 29. januar 2016-mi apeqquteqaateqarnera aallaavigalugu 1. februar 2016-mi isumaginninnermut pisortaasimasoq pillugu nassuiaammik nassiussinikuugatta, nassuiaallu taanna IA-mit qujassutigineqarnikuummat.

Matumanissaaq aningaasatigut ingerlatsinermut tunngatillugu annertuumik sukumiisumillu qaammaasaqarneq piumasaqaataanngilaq paasissallugu, Kommunip aningaasatigut piginnaasai ukiuni kingullerni allannguuteqarnikuummata– qujanartumik pitsaasup tungaanut, tamatumalu malitsigisaanik periarfissat annertusitinneqarnikuummata. Tamanna aamma tanngassimaarutigisariaqarparput – angusaammammi ataatsimoorluni suleqatigiinnikkut, taamatullu angusaqarneq soorunami allaffissornikkut piareersaalluni sulisoqarluarnerata kingunerivaa.

Taamaammat aningaasaqarnermut tunngatillugu aammalu inunnik isumaginninnermut tunngatillugu pitsaasup tungaanut nalimmassaanermik suliaqarnerput ingerlarsorpoq, nukiit nammineq pigisagut, taamatuttaaq avataaniit ikiorneqarnerput, pingaartumik Isumaginninnermut Naalakkersuisoqarfimmiit, minnerunngitsumillu isumaginninnermut pisortamik nutaamik pikkorissumik atorfinitsitsisoqarsimaneranik aallaaveqarpoq.

Taamaammat qularutigineqassanngilluinnarpoq, kommunaldirektørip sulinera tatigilluinnarakku. Frank Hedegaard Jørgensen pikkorissuuvoq atorfilittullu misilittagartuujulluni, tamannalu Kommunitsinni annertuumik iluaqutigaarput.

Kiisalu assut tupigusuutigaara, IA-p naammagittaalliutigisinnaammagu, misilittagartuumik aammalu pikkorissumik – minnerunngitsumillu kalaallisut oqaluttumik ujarassiuumik atorfinitsitsisimagatta, aatsitassarsiorneq pillugu siunnersortissatsinnik. Atorfinitsitsineq soorunami atorfinitsitsisarnermi periaatsit atorlugit qinnuteqaateqartullu nalilersoreerlugit pivoq, tamannalu alloriarneq pivoq aatsitassarsiornerup tungaatigut Kommunip periarfissaasa annertuut aallunneqarluarnerunissaat siunertaralugu.

Taamaammat IA-mut kaammattuutigissavara: Inuttaa pinnagu arsaq malersorniarsiuk – peqataaniaritsilu Kommunitta pitsaasup tungaanut ineriartorneranut.


Inussiarnersumik inuulluaqqusillunga,


Jørgen Wæver Johansen
Borgmesteri