Martha Lund Olsenip aamma Jørgen Wæver Johansenip ataatsimut oqaaseqaataat

Ulluni 22. – 25. august 2016 Martha Lund Olsen Qaqortumut tikeraarpoq Kommune Kujallermik suleqateqarluni meeqqanik inuusuttunillu isumaginninnikkut sullissinerup taamatuttaaq isumaginninnermik suliassaqarfiup aaqqissuussaanerata pitsanngorsarneqarnissaa siunertaralugu suleqatigiinnissamik isumaqatigiissutip timitalersorneqarnera kiliffissiorniarlugu.
24. august 2016

Augustip ulluisa 24-ianni Martha Lund Olsen aamma Kommune Kujallermi borgmesteri Jørgen Wæver Johansen ataatsimiipput. Oqaluuserisassani immikkoortoq pingaarnerpaaq tassaavoq Kommune Kujallermi meeqqat inuusuttuaqqallu ikiortariallit isumagineqarnerannik nukittorsaaneq pillugu suleqatigiinnerup killiffianik ilisimatitseqatigiinneq.

Ataatsimiinnerup kingorna Martha Lund Olsen aamma Jørgen Wæver Johansen ataatsimut oqaaseqaateqarput:

”Meeqqanut inuusuttuaqqanullu tunngasutigut Kommune Kujalliup unammilligai oqaluuseriniarlugit ataatsimeeqqatigiinnerput tamatsinnut iluaqutaaqaaq. Immitsinnut neriorsoqatigiippugut meeqqat ikiortariallit pisinnaatitaaffii isumannaarniarlugit suliniarneq ukiuni tulliuttuni anguniakkatsinni pingaarnerpaajussasoq, taamatuttaaq Kommune nuannaartunik, peqqissunik imminnullu naleqartittunik, siunissami unammilligassanut nukissaqarluarlutillu piareersimasunik meerartalik nangittumik ineriartortinneqarsinnaaqqullugu qanimut suleqatigiinnerput nangissagipput.

Kommunimi aammalu namminersorlutik oqartussani sulisut pikkorissut, kiisalu Aarhus Kommunimit ikiuiartortitat meeqqat ikiortariaqallit pillugit suliassat malinnaffigineqarsinnaanngornissaat nukissaqarfigineqalernissaallu anguniarlugu qaammatini kingullerni Kommunimut ikiuussimasut qutsavigerusuppavut. Taamaalilluta nutaamik aallartinnissamut periarfissaqalerpugut, tamannalu suliffeqarfiup aaqqissugaaneranik suliassalerinermillu nukittorsaanitsinni atorluassavarput.”

”Suliassaqarfiup iluani assut siuariartoqarsimasoq maluginiarpara, taamatuttaaq maluginiarpara Kommunip isumaginninnerup tungaatigut aaqqiiniarluni ilungersortoq, ilaatigut siunerfeqaqqissaarluni sulisunik suliaminnut ilinniarluarsimasunik piginnaasaqarluartunillu pissarsiniarluni tamaviaartoq” Martha Lund Olsen ilanngullugu oqarpoq.

”Kommune Kujallermiit ikiorserneqarnissatsinnik kissaateqarnitta Namminersorlutik Oqartussaniit aammalu illoqarfittut ikinngutitsinnit Aarhusimit ilassilluarneqarsimanera assorsuaq nuannaarutigaarput. Taamaalillutami kommunimi isumaginnittoqarfiup aaqqissugaaneranik patajaallisaanitsinni piffissaqalerlutalu nukissaqalerpugut, tamannalu innuttaasunut minnerunngitsumillu isumaginnittoqarfimmi sulisutsinnut iluaqutaaqaaq. Suli suliassarpassuaqarnerput ilisimavarput, nakimanangali oqarsinnaavunga ilorraap tungaanut aallarsimasugut”, Borgmester Jørgen Wæver Johansen tapersiivoq.

Isumaginninneq nukittorsarniarlugu Kommune Kujalliup, Namminersorlutik Oqartussat kiisalu Aarhusip suleqatigiinneranik nukittorsaaneq 2016-imi upernaakkut Kommune Kujalliup suliniuteqarneratigut piviusunngortinneqarpoq.


Martha Lund Olsen                                                Jørgen Wæver Johansen
Isumaginninnermut Naalakkersuisoq               Kommune Kujallermi Borgmesteri

  

 

Tusagassiorfinnut nalunaarut uani takuguk