Nivikka

Eqqumiitsuliotoq nutaaliortoq Nanortalimmi siullermeerluni saqqummersitsilerpoq!
6. maj 2016
Nanortallip Katersugaasivianut qaaqquatsigit ulloq 10.maj 2016 nal. 19:00-21:00

Nivikka Abelsen Nanortalimmi inunngorpoq mikisuullunilu pilersitsisinnaaneq qalipaatit ilusilersuinerlu suliarissallugit assut nuannarisimallugit.

Ukiut kingulliit nuannarisaminik aallussinermini ineriartuutilimmik tigussaasuunerusumik aallussilersimavoq, ullumikkullu saqqummiussinermini suliani assigiinngitsut takutissallugit.

Nivikkap suliaasa ilisarnaatigaat, qalipaatit sakkortuut qalipaavissami uumaarititsilersumik atortaramigit pissaaneqartilerlugit (dynamisk), piviusoq takorluukkallu kissalaartumik ataatsimoorfeqartilertarlugit misigissutsinut attuisumik.

Nivikka oqaluttuarpoq, inuunermik nuannarisaqartuulluni, qalipaatinillu atortakkani inuunermi nuannersut, nukissaqarnartut eqqarsarnartullu aallaavigalugit, kiisalu taarmiik qaamanermut saatitsisussatut qalipakkaminullu isumassarsiorfigisarlugit assigiinngitsut soorlu: Pinngortitaq, aqqusinermi ingerlanermi, nipilersorneq, timersorneq kiisalu qitik/tapaq aqqutigalugit.

Nivikka avatangiisiminut malinnaalluartuuvoq peqataasuullunilu misigissutsinilu assigiinngitsutigut atornerisigut ineriartuuteqarluartumik oqariartuuteqartarpq assigiinngitsutigut, tamannalu neriuuteqarnarluartumik eqqumiitsuliornikkut, nassaassarsiullaqqinnermik, nuannaarnermik annertuumik kiisalu eqqumiitsuliornikkut nukittussutigalugu.

Ullumikkut Nivikka 15-nik ukioqarpoq ukiukitsunnguugaluarluni eqqumiitsuliornerup tungaatigut illiniulereerluni. Ukioq manna Nivikka USA –Indianamut ilinniariarluni aallassaaq. Neriuutigaalu siunissami isumassarsiorfiunissaa aammalu attaveqaatinik siammasissunik pilersitsiviginissaa.

Siunissami takorloorpaa, nammineq sulliveqalernissani namminerlu eqqumiitsuliornikkut ineriartortittuarnissani. Saniatigullu sinnattoralugu atisanik ilusilersuinerup silarsuaani akuulernissani nammineq pilersitaminik. Kalaallit ilusilersuinermik ingerlatallit akornanni.

Nivikkap eqqumiitsuliaanik saqqummersitsinissarput qilanaaralugu, siunissamilu takusaqarfigilluartarumaarlugu neriuutigaarput.

Saqqummersitsineq takusarneqarsinnaavoq, katersugaasiviup illuutaani A/14 B/11 aalisakkerivitoqqami.