Kommune Kujalleq Århus Kommunilu suleqatigiilluarnerminnik nangitsipput

Kommune Kujalleq Århus Kommunilu ukiut 50 sinnerlugit illoqarfittut ikinngutigiinnerminnik nutarteripput. Borgmesterit marluusut Jakob Bundsgaardip aamma Jørgen Wæver Johansenip sapaatit akunnerat kingulleq ataatsimeeqatigiinneranni suleqatigiinnermik nutarterineq tamanna pivoq.
9. maj 2016

Ukiut ingerlaneranni kommunit taakku marluk sorpassuartigut suleqatigiilluarsimapput minnerunngitsumik sulisunik paarlaasseqatigiittarneq eqqarsaatigalugu.

Kommune Kujalleq atorfinni inuttaleruminaatsuni, soorlu kingullertigut isumaginninnermi, sulisunik qassiinik attartortarsimavoq.

Tassunga atatillugu qaammatip matuma naajartornerani Århus Kommunemiit aallartitat Kujataanukassapput, taakkulu tassaapput qinikkat utoqqarnut isumaginninnermullu tunngasunik suliaqartuusut, kiisalu suliassaqarfinni taakkunani pisortaasut aammalu borgmesterip allattoqarfiani atorfilittat.

Suleqatigiinnissamik isumaqatigiissutip nutarterneqarneratigut suleqatigiinneq pitsaasoq ineriartorteqqinneqassaaq nukittorsarneqarlunilu, pingaartumik suliassat pillugit isummersoqatigiittarneq eqqarsaatigalugu. Isumaqatigiissutit allaffissornermut tunngasuinnaanngillat, aammali kommunip suliassaqarfiinut allanut tunngassuteqarlutik.

Århus Kommune assersuutigalugu pikkorissartitsisartunik Kommune Kujalliliartitsissaaq, aammalu suliniaqatigiiffiit, inunnik sullissiviit aammalu innuttaasut suleqatigiiffiisa allat paarlaateqatigiittarnissaat sulissutigineqassaaq ikulturikkut inuiaqatigiittullu ilisareqatigiinnerulernissaq anguniarlugu.

Isumaqatigiissutikkuttaaq illuatungeriit tamarmik nunat tamalaat akornanni inissisimanerat atorluarneqartassaaq, soorlu suliniutit ineriartortitsiviusut innuttaasut atugaat pitsanngorsarniarlugit kommunit iliuuseqarsinnaanerannik toqqaannartumik pitsanngorsaaviusussat aningaasaliisussarsiorneqartarnerat eqqarsaatigalugu.

Borgmester Jørgen Wæver Johansen

 ”Århus Kommunemut isumaqatigiissuterput nutartigaq aammalu suleqatigiinnerput maanna assigiinngitsutigut erseqqinnerusumik timitalersorsinnaanngugarput assut nuannaarutigaarput. Matumani isumaginninnikkut suleqatigiinnerput pingaartillugu immikkut taarusuppara.”

Isumaqatigiiissut nutartigaq ukiuni tulliuttuni sisamani atuutissaaq tamatumalu kingorna nutarterneqassalluni.