Angallannermut kiffartuussinermut isumaqatigiissutit pillugit

Kommune Kujalleq ukiuni qassiinngortuni ilaasunik angallassinermi isumaqatigiissusiornermi aalajangeeqataasarumalluni taamalu isumaqatigiissutigineqartunut akisussaaqataajumalluni noqqaasaraluarluni Naalakkersuisooqatigiinnit paarlakaattunit itigartinneqartarpoq.
27. april 2016

"Maanna ingerlatseqatigiiffiit neqerooruteqaqquneqartut neqerooruteqarsimalermata matumuuna erseqqilluinnartumik oqaatiginiarparput neqerooruteqartut inaarutaasumik isumaqatiginiarneqalersinnagit ukioq manna aalajangiiniarnermut peqataatinneqarnissatsinnik ilimasukkatta.

 

Ukiuni kingullerpaani 2012-imi S-61-it atorunnaarsinneqarneranniit Kujataani timmisartuussineq ajorseriarsimaqaaq, pingaartumik qulimiguullit pisoqqat Bell 212 atorneqalernerat pissutigalugu taakkumi usinik ilaasunillu assartuisinnaassusiat killeqaqimmat. Bell 212 assaannarmik usilersorneqartarput, tassa usit palletsinut poortukkat assartorneqarsinnaanngillat. Tamatuma inuussutissarsiortunut ajoqutaanera paatsuugassaanngilaq. Qulimiguullit Bell 212-it ukiunik 35-43 pisoqaassuseqaramik sapernoqqajaanerupput, ajorteqqajaanerullutik kiisalu nutaalianik atortoqaratik.

 

Ajoqutit sapernunerillu pissutigalugit angalanngitsoornerit amerlaqisut takuneqartartut aarleqqutigineqarput. Tassa Bell 212-it apummik, anorimik taarmillu sapernoqqajaasarput. Aamma Bell-212-iy anorimut isivikkivilunneranullu sapernoqqajaanerupput aqqutissartik isissaatillugu taamaallaat timmisinnaasaramik. 

 

Taamaammat Kommune Kujalliup naatsorsuutigaa Naalakkersuisut angallassisussat sorliilluunniit qineraluarunikkit qulimiguulinnik Bell 212-itoqqaniit nutaaliaanerusunik neqeroorutiminni angallatissaqartunik toqqaajumaartut. Pissutsit massakkutut ingerlaannarnissaat akuersaarneqarsinnaanngilaq."

 

Inussiarnersumik inuulluaqqusillunga

Med venlig hilsen,

 

 

Jørgen Wæver Johansen

Borgmester