Kommunip inissiaatai inuinnarnit pigineqalerput

Kommune Kujallermi Kommunalbestyrelsit arlallit pisortanit attartortinneqartut inuinnarnut tunniunnissaat annertuumik soqutigisarsimavaat. Suleqatigiinnissamik isumaqatigiissummi maannakkut atuuttumi kommunalbestyrelsip kommunip inissiaataani attartortuunermiit piginnittunngornissamut periarfissaqarnissaat, attartugassat inoqanngitsut tuniniarnissaat, aammattaaq ilaatigut piginnittut peqatigiiffiannik pilersitsinissaq salliutissimavai.
28. april 2016
Århusvej-imi kusanartumi attartortut "attartortumiit piginnittumut" aaqqiissummik neqeroorfigineqarsimapput, inissiarpaaluillu inoqanngitsut annerpaamik neqeroortunut tuniniarneqalersimallutik. Taamaalilluni inissiani 36-iusuni inissiat 20-it inuinnarnit pigineqalersimapput. Attartukkat sinneri 16-iusut inuerukkaangata privatinut aamma tuniniarneqartarumaarput. "Attartortumiit piginnittumut" tuniniarneqanngikkunik annerpaamik neqeroortunut tuniniarneqartassallutik.

November 2014-imi utaqqiisaasumik piginnittut peqatigiiffiat siulleq pilersinneqarpoq, aammalu ulloq 25. april 2016 nal. 19.00 Århusvej-imi Piginnittut Peqatigiiffiat" pilersitsiviusumik ataatsimeersuarnerat siulleq kommunimi qinikkat ataatsimiittarfianni ingerlanneqarluni. Kommunip pigisaanik taammatut aaqqissuusineq eqqarsaatigalugu tamanna siullerpaamik pivoq, neriuutigineqarporli kingullersaassanngitsoq.

Ataatsimiinnermi saqqummiunneqarpoq Kommunalbestyrelsip kissaatigimmagu peqatigiiffimmi siulersuisut piginnittuusunit inuttalersorneqassasoq, siulersuisunilu Kommunimiit ataatsimik ilaasortaatitaqarpoq, taamaalilluni annertunerusumik aalajangeeqataasinnaaneq namminersorsinnaanerlu pilersikkumallugit. Aammattaaq Kommune Kujalliup kissaatigaa teknikkeqarnermut ataatsimiititaliap siulittaasua siulersuisuni ilaasortaatinneqassasoq, aammalu allattoqarnikkut ingerlatsineq teknikkeqarnermut ingerlatsivimmeersumit isumagineqassasoq.

Pilersitsiviusumik ataatsimeersuarnermi piginnittut, kommunalbestyrelsi sinnerlugu teknikkimut avatangiisinullu ataatsimiititalip siulittaasua aammattaaq kommunimiit atorfilittat peqataatitaqassapput. Ataatsimiinneq pitsaasumik ingerlanneqarpoq soorlu aamma siulersusisunit ivertitsisoqartoq, siulittaasunngorpoq Bibi Mølgaard siulersuisunik ilaasortanik sisamanik ilaqalerluni.


Kommune Kujallermi kommunalbestyrelsi ataatsimoorussamik siunniussaqarpoq, tassa kommunip inissiaatai sapinngisamik amerlanerpaat tuniniarneqarnissaat, siunissamilu tassunga tunngatillugu annertunerusumik suliniutigineqarumaarpoq.