Qaqortumi akerliussutsimik takutitsineq

Qaqortumi upernarissuarmi, innuttaasut aatsitassarsiorneq aqqutigalugu suliffissanik pilersitsinissamut tapersersuisut, aammalu uranisiornissamut akerliusut, eqqissisimasumik akerliussutsimik takutitsipput.
20. april 2016

Eqqissisimasumik akerliussutsimik takutitsisoqaraluartoq politiit tamakkiisumik sulisoqarlutik najuupput - taamaaliornerminni suliniutip ajunngitsumik ingerlanissaa qularnaarpaat.

Akerliussutsimik takutitsisut, uranisiornissamut tapersersuisut akerliusullu tamarmik ataatsimik aallartitaqarput oqalugiartumik. Uranisiornissamut akerliusunit Kommunalbestyrelsemut ilaasortaq Stine Egede Nørbæk (IA) oqalugiarpoq, oqalugiarnerminilu uranisiortoqaleraluarpat avatangiisimut sunniutissai ernumanartut pillugit kiisalu akerliusunit isummat oqalugiaatigai. Tamatuma kingorna Qaqortumi Siumumi siulittaasoq Marie Lyberth Mathiassen aatsitassarsiorneq pillugu oqalugiarnermi aatsitassat qaqutigoortut , 0,035%-mik uranimik qalluinissap saniatigut tunisassiarinissaa pillugu oqalugiarpoq.

Kommune Kujallermi borgmesteri Jørgen Wæver Johansen suliniummut pitsaasumut oqalugiarluni qujassuteqarpoq. Siusinnerusukkut oqaatigeriikkattut siumoortumik itigartitsisoqarneq ajorpoq, massakkuugallartorlu Kuannersuarni aatsitassarsiornissamut akuersaarnissatsinnut itigartitsinissatsinnulluunniit tunngavissaqanngilagut - ingerlatseqatigiiffik suli pisortatigoortumik qinnuteqaammik nassiussaqarsimanngimmat.

Oqalugiaanni nangillugu oqarpoq qinnuteqaammik qinnuteqartoqarpat qanoq periaaseqartoqassanersoq:

  1. Suliarineqarneralu inatsisitInatsisartut ataatsimoorlutik akuersissutigisimasaat tunngavigalugit pissaaq.
  2. Tassa imaappoq annertuumik tusarniaasoqartassaaq innuttaasunillu peqataatitsisoqassalluni.
  3. Tamatuma saniatigut Ingerlatseqatigiiffik, Namminersorlutik Oqartussat kiisalu Kommune ataatsimoorlutik Sunniutissat Iluaqutissallu pillugit Isumaqatiginninniassapput,
  4. Illuatungeriit isumaqatigiilereerpata aatsaat Naalakkersuisut aalajangerumaarput.
  5. Taakku tamarmik piumasaqaatit aammalu inatsit malillugu aalajangiisoqassaaq.

Ilanngullugu paasititsissutigaa, Kommune Kujallermi innuttaasut ikileriarneri kiisalu suliffissaaleqinermik appartitsiniarneq ajornakusoortuusoq.

Tamakku aaqqinniarlugit pitsaanerpaamik toqqammaviliisoqassaaq inuussutissarsiutitigut ineriartornissaq anguniarlugu, taamaaliornikkummi suliffissanik nutaanik aningaasatigut isertitsiffiulluarsinnaasunik pilersitsisoqassammat.

Borgmesterip oqalugiaanni nangillugu isummaminnik nittarsaassisut kajumissaarpai oqallinnermik siammasinnerulersitseqqullugit tunngavilersuilluaqqullugillu, aamma taamaalilluni periarfissat allat oqaluuserineqarniassammata. Oqallinnermi nukiit nillianermut atoqqunagit, kiisalu oqallisigisap tunngavilersugaanissaa ilanngullugu kajumissaarutigaa.

Inuit amerlanerusut imminut isumagisinnaanerulernissaat kommunalbestyrelsemi ilaasortat tamanna taperseraat paasititsissutigaa.  Aatsitassarsiorneq eqqartorneqartillugu avatangiiseq peqqinnerlu pineqatillugit kommunalbestyrelsemi ilaasortat amerlanerussuteqartut akuersaaginnarnavianngillat.  Kujallermi isumaqatigiittoqarpoq suliniutit taamaattut aatsaat avatangiisinut ajoqusiinngippata, tassa inuit uumasullu peqqissusaannut ajoqutaanngippat akuerineqarumaartut.  Aamma inatsimmi ilaatigut aatsitassat qaqutigoortut qallorlugit saniatigut tunisassiarineqarnissaannut tamanna atuuppoq.

Borgmesterip oqalugiaanni ima naggaserpaa; ” Ukiuni siuliini uppernarsinikuuarput, ataatsimoorussigaangatta angusaqarnerusartugut– avissaartuunnata, kujataanili pitsaanerpaanik aaqqiissutissanik ataatsimoorussilluta aaqqiiniaasa”.