Kommunalbestyrelsip Narsarmi ataatsimiinera 01-2016

Pingasunngorneq ulloq 16. marts 2016 Kommune Kujallermi kommunalbestyrelsi Narsami ataatsimiippoq
22. marts 2016

Ullup siuliani ilaasortaasut aallarniillutik aaqqissuussaanikkut politikki pillugu isumasioqatigiipput, tassani ilaqutariit sanngiitsut aammalu pisortanit ikiorsiissutitigut kommunip aningaasartuutai pillugit kommunalbestyrelsi saqqummiussivigineqarpoq. Ilaqutariit sanngiitsut qanoq nukittorsarniarlugit suliniartoqarsinnaanera pillugu kommunalbestyrelsi eqqartuivoq, aammalu qanoq iliorluni pisortanit ikiorsiisarnermiit sulinissamut suliniutinik taarserneqarsinnaanersoq eqqartorlugu. Kommunalbestyrelsimi oqallinneq tunuliaqutaralugu misissueqqissaarnerit ingerlaannassapput. Tamatumani ilaatigut misissorneqassaaq inuusuttut tamarmik uninngaannarlutik pisortanit ikiorsiissutisisarnermiit sulilernissamut neqeroorfigineqassappata qanoq aningaasartuuteqarnerulertoqartigissanersoq.

Narsami isumasioqatigiinneqAtaatsimiinnermut atatillugu kommunalbestyrelsimi partiit pingasut akornanni suleqatigiinnissamik isumaqatigiissutaaqqaarsimasup saniatigut Siumut aammalu Atassut ilassutitut isumaqatigiissusiorput. Siuliani kommunalbestyrelsip ataatsimiinnerani IA-p isumaqatigiissutaaqqaarsimasumi suleqataajumajunnaarnerata kingunerisaanik taamaaliortoqarpoq.

Aningaasaqarnikkut killiffik kommunalbestyrelsimit sammineqarpoq. Kommunip aningaasaqarnera assorsuaq pitsanngoriarsimavoq, kommunilu maannakkut annertusisamik nakkutigineqarunnaarluni.
Taamaalilluni 2015-imut ukiumoortumik naatsorsuutit ersersippaat sinneqartoorutit 30,2 million koruuniusut, aallaqqaammut 10 million miss. koruuniusussatut missingersorneqarnikuusimagaluarlutik.

Kommunalbestyrelsip ataatsimiinnerani sammineqartoq pingaarutilik aamma tassaavoq nalunaarusiaq "Naligiimmik Siunissaqarneq". Nalunaarusiaq februarimi saqqummertoq, tassaasoq borgmesterit pingasut illoqarfimmit pingaarnermit pisortat suliffiutaasa ilaat sinerissamut nuunneqarnissaannut siunnersuutaat, kommunalbestyrelsimi partiinit tamanit tapersersorneqarpoq. Nalunaarusiap taassuma malinnaavigineqarneranik suliaq tamatuma kingorna Qeqqata kommunia aammalu Qaasuitsup kommunia suleqatiginerisigut nanginneqassaaq.

Kommunalbestyrelsi NarsamiKommunalbestyrelsip ataatsimeereernerata kingorna borgmester Jørgen Wæver Johansen-ip oqaatigaa: "Ataatsimiinnermi uani 2016-imi suleriaqqinnissaq toqqammavissilluarparput. Tamatumani kommunerput ineriartorteqqikkumallugu aammalu innuttaasut pitsaanerpaamik atugaqarnissaat qulakkeerumallugu Siumut aamma Atassut akornanni siunniussaqarluta suleqatigiinneq nangissavarput. Suleqatigiinnermi sukkulluunniit IA aamma peqataanissaminut tikilluaqqusaavoq. Aningaasaqarnerup aalajaallisarneqarnerata nanginnerani innuttaasoq qitiutinneqassaaq. Atuarfeqarfik suli qitiutipparput, ukiumi aggersumi sulinissami meeqqat, utoqqaat aammattaaq innuttaasut atugarliortut pingaarnertut siunniunneqassallutik.

Seek On Radio suleqatigiinnissamik isumaqatigiissusioqatigineqarsimaneratigut ataatsimiinneq Narsami Qaqortumilu toqqaannartumik raatiukkut aallakaatinneqarpoq, teknikkikkut ajornartorsiuteqarnera peqqutigalugu Nanortalimmut toqqaannartumik aallakaatitsisoqanngilaq. Kingornani ataatsimiinneq Nanortalimmi aallakaatinneqarumaarpoq, aammattaaq kommunip nittartagaani pissarsiarineqarsinnaalissalluni.

Paasissutissat sukumiinerusut uannga pissarsiarineqarsinnaapput: Jørgen Wæver Johansen, mobil 55 96 72.

 Imaqarniliaq uani aanneqarsinnaavoq.