Nanortalimmi politeeqarfitoqaq Utoqqaat Peqatigiiffiannut tunniunneqarpoq

Nanortalimmi B301-mut borgmesteri takkummat utoqqaat isaareersimapput kissartutorfissamillu piareersaalereersimallutik.
Pingasunngornermi 24. februar 2016 nalunaaqqutaq 11.00 tunniussineq pissasoq illoqarfimmi nalunaarutigineqarsimavoq.
2. marts 2016
"Qaammaterpassuit piareersareerluni Kommune Kujalliup maanna nuannaarutigalugu illu nuannaarutissatut, ataatsimiittarfissatut sammisaqartarfissatullu atugassanngortippaa" borgmester Jørgen Wæver Johansen utoqqarnut takkussimasunut oqarpoq. Tamatuma kingorna Isak Petrussen utoqqaat peqatigiiffianni siulittaasoq utoqqaat sinnerlugit kommunimut borgmesterimut kissaatimik piviusunngortinneqarnerannut qujassuteqarpoq.

Tunniussinermut uppernarsaatit marluinngorlugit atsiorneqarput. Uppernarsaatini atuisussaatitaanermi piumasaqaatit erseqqissarneqarput.

"Illu 2016-imiit 2019-mut akeqanngitsumik atugassanngortinneqarpoq.
Nanortalimmi Utoqqaat Peqatigiiffiata ilu ataatsimiittarfittut allatigullu naapittarfittut atussavaa.
Nanortalimmi Utoqqaat Peqatigiiffiata atugassanngortitsinermut atatillugu illumut, aserfallatsaalineranut ingerlanneranullu akisussaaffik tiguaa.
Kommunip neriuutigaa illu innuttaasunut tikeraanullu nuannaarutaassasoq, aammalu kommunimi sunngiffimmi sammisassaqartitsinerup ineriartortinneqarneranut iluaqutaassasoq."

Kaffe, tii sodavandillu sassaalliutigineqarput. Utoqqaat ilaat erinarsuummik siunnersuuteqarmat tamarmik erinarsorput. Taava lagkagerujussuaq eqqunneqarpoq Nanortalillu pillugu erinarsortoqaqqereermat inuit oqaloqatigiilerput ilaasalu borgmesteri oqaloqatigaat, taannalu utoqqaat ilaannit tissinartunik oqaluttuunneqarami illariilingajappoq.