Borgmesterip Nanortalimmi ilinniartitsisut naapisimaarpai

December 2015 borgmester Jørgen Wæver Johansen-ip illoqarfinni pingasuusut atuarfiisa tikeraarnissaat aallarnerlugu Narsap Atuarfiani ilinniartitsisut ataatsimeeqatigai, aammalu meeqqat atuarfii pillugit eqqartuinissamut atatillugu ulloq 23. februar 2016 Nanortaliliarluni Nanortallip Atuarfiani ilinniartitsisut aqutsisullu ataatsimeeqatigalugit
18. marts 2016

Atuarfimmi siunnersorti Magdalene Geraae borgmesterimik tikilluaqqusivoq, aallarniinermini meeqqat atuarfiisa pitsaasumik ineriartornissaanni ilinniartitsisut sulinerisa pingaaruteqarnera iserfigalugu.

"Ilisimasassituut kommunalbestyrelsi aalajangernikuuvoq piffissap qinigaaffiusup sinnerani meeqqat atuarfiisa pitsaanerusumik ingerlalernissaat qitiutinneqassasoq. Tamanna tamanut tunngavoq, angajoqqaat suleqatigineqarneriniit meeqqat atuarfimmit naammassinerminni karaktererisaannut tunngalluni. Innuttaasutta sapinngisamik amerlanerpaat imminnut ilaquttaminnullu pilersorsinnaalernissaat tunngavissiuukkusupparput. Ilinniagaqarneq pitsaanerusumik siunissaqarnissamut sakkussatsialaavoq. Taamaammat atuarfimmi angusat ullumikkut periuserisatsinniit qanoq iliorluta pitsaanerulersinnissaanni ataatsimoorluta suussusersinissaat pisariaqartipparput. Tikkuutaasinnaasut tassaapput ingerlariaqqinngitsoortartut, tamanna Kommune Kujallermiinnaanngitsoq Kalaallit Nunaat tamakkerlugu ajornartorsiutaavoq, ingerlariaqqinngitsoortartulli ikilinissaat kissaatigeqaarput. Inuusuttut inersimasunngorlutik imminnut pilersorsinnaanissaannut naammaginartumik piareersarnissaat iluatsinneq ajorparput. Uani pineqarpoq atuagarsornikkut pikkorissut ingerlariaqqinnissaannut aqqutissiuunnissaat, aammalu assassullaqqissut allanillu piginnaasallit pikkoriffiinut ingerlariaqqinnissaannut aqqutissiuunnissaat, borgmesteri ilinniartitsisunut takkussimasunut naatsumik saqqumiinermini taamatut aallarniivoq.

2015 ukiaanerani borgmesteri atorfilittani peqatigalugit innuttaasunik ataatsimiisitsisarsimavoq, takkussimasullu meeqqat atuarfiat qulequttat pingaarnersaasa ilaattut taakkartortarsimavaat. Inuusuttut arlallit meeqqat atuarfianni atuartitaaneq qanoq misigisarnerlugu taakkartorpaat, ilaatigullu ilinniartitsisut peqanngittarnerujussuat naammagittaalliuutigalugu.

"Siorna innuttaasunik ataatsimiisitsinitsinni inuusuttuniiit tusarparput meeqqat atuarfianniit inuusuttunik ilinniartitsivinnut ingerlariaqqikkaangamik kulturchok misigisarsimasaat, borgmesteri oqaluttuarpoq.

Borgmester Jørgen Wæver Johansen-ip tikeraaqattaarnermini ilinniartitsisut inuuniutaanni pingaaruteqartumi tapersersornissaat aammattaaq isumaasa tusarnissaat kissaatigaa.

"Kommunalbestyrelsimi atuarfimmut ataatsimiititaliamik ukiormannamiit atuutilertumik Benjamin Kielsen-imit siulittaasuuffigineqartumik pilersitsinikuuvugut, meeqqallu atuarfii pillugit suliniut nukittorserumallugu sapinngisamillu amerlanerpaat ingerlariaqqittarnissaat qulakkeerumallugu taamaaliorpugut. Sulineq tamanna aallarnerniarlugu illoqarfinni tamani meeqqat atuarfii ataatsimeeqatigeqattaarpakka. Meeqqatta siunissaannut tunngavoq. Ullumikkut maaniippunga tamanna pillugu ilissi eqqartueqatigerusullusi", borgmesteri ilinniartitsisunut katersuussimasunut eqqartueqatiginnikkiartorlutik ilinniartitsisut inaannut takkussimasunut oqaatsini naggaserlugit taamak oqarpoq. 

Nanortallip Atuarfiani ilinniartitsisut amerlasuunik oqaaseqaateqarlutillu isumassarsiaqarput. Ingammik amerlasuut ulluinnarni atuartitsinermi unammilligassatut misigisartakkatik iserfigaat. Arlallit ataqatigiissaarisoqarnissaanik pisariaqartitsineq taakkartorpaat, aammalu atuartitsinerup pitsanngorsarneqarnissaanut suliniutip nukittorserneqarnissaata pisariaqartinneqarnera taakkartorlugu. Atuarfimmi nerisitsisarnermik aaqqiissutit sipaarutigineratigut atorunnaarsinneqarnikuuvoq, tamanna qulequttatut eqqartorneqarpoq. Ilinniartitsisut suli meeqqat kaattut nukissaqanngitsullu naammattoortarpaat, tamanna eqqarsaqqissaarsinnaanerannut ajoqutaavoq. Ilinniartitsisut ilaata tikkuutigaa ilinniartitsisut immaqa piffissap affaa ilisimasanik piginnaasanillu atuartunut tunioraasartut, piffissallu sinnerani eqqissisimasoqarnissaa isumagineqartartoq, inunnik isumaginnittutut imaluunniit meeqqanut angajoqqaatut pissuseqarnermut piffissaq atorneqartarluni. 

Ilinniartitsisut aamma oqarput namminneq ilinniartitsisutut eqeertariaqarlutik, atorfinitsinneqarnerminnilu isumagisassatik suliarisariaqarlugit, eqeersimaartariaqarlutik aammalu angajoqqaat soqutiginninnissaannik piumasaqarfigineqartariaqartut. 

Borgmesterip kingusinnerusukkut atuarfimmut ataatsimiititaliap siulittaasua aammalu atuarfeqarnermut ingerlatsivik peqatigalugit ataatsimiinnermit allakkiat pillugit eqqartueqatigiumaarpai.