Qulliit qamikkit

19. marts 2016 qulliit qamikkit – nunarsuarlu tamakkerlugu silaannaap allanngoriartornera pillugu paasisitsiniaaneq Earth Hour tapersersorlugu
11. marts 2016

Earth Hour nunarsuarmi silaannaap allanngoriartornera pillugu paasisitsiniaanerit annersaraat. Ukiumut ataasiartumik nal. akunnerani nunarsuarmi tamarmi inuit milliuunilikkaat suliffeqarfiillu tuusinntilikkaat nunarsuaq tamakkerlugu qullitik qamittarpaat, tamatumunnga ilisarnaataasoq tassaavoq kalerriutigissallugu nunarsuup silaannaata allanngoriartornera pillugu iliuuseqartoqartariaqalernera.

Ukioq manna Kommune Kujalleq peqataassaaq!

Kommune Kujalleq kommuniuvoq minguitsoq, kommunillu tapersersorusuppaa silaannaap pitsanngoriaateqarnissaa. Manna periarfissaavoq, suliffeqarfiit, pisortat suliffeqarfii inuillu ataasiakkaat kissaatigisaminnik malunnartitsisinnaanerannut, tassalu silaannatta paarineqarnissaa. Taamaattumik kommunip kikkulluunniit tamaasa kaammattorusuppai Earth Hour tapersersoqqullugu. Ataatsimoorluta kalerriutigisinnaavarput, silaannaap allanngoriartornera pimoorukkipput, aamma suleqataarusuttugut silaannatsinnut iluaqutaasussamik.

Silaannaap allanngoriartornerata kingunerisai ersarissut takusinnaareerpagut. Nannut uummaanarnissaat ulorianartorsiortinneqarpoq ingammik silaannaap allangoriartornerani nunarsuaq kissakkiartuinnarmat. Silaannaap allanngoriartorani immikkut sakkortuumik Avannaarsuani maluginiarneqarpoq, kissassutsip silarsuup sinneranit annertunerusumik qaffakkiartorneragut. Tamassuma immap sikua, sermersuup aammalu nunap qeriuaannartoq sunnermagu – aammalumi nannut.

Earth Hour tassaavoq inuit ataasiakkaat tamarmik aalajangeeqataasinnissaat nunarsuarmi silamut unammilligassanut tunngatillugu. 19. marts 2016 nal. 20:30 - 21:30 qulliit qaminngatinnerisigut nunarsuarmi inuit milliuunilikkaat kalerriutigissavaat iliuuseqartoqartarialernera. Tusagassiutinik eqeersaaqataalersitsissaaq oqallitsitseqataalersitsillunilu, nunarsuarmilu politikerinik ilungersornerulersitsissaaq.

Kommune Kujalliup silap allanngoriartornera pillugu paasisitsiniaaneq tapersersussavaa Qaqortumi, Narsami Nanortalimmilu aqquserngit qulliisa qaminneqarnerisigut. Kommune Kujalliup neriuutigaa, aqquserngit qulliisa qaminneqarneri eqqarsalersitsilissasut qaammaqqutit amigaataalernerisigut. Aqquserngit qullii ulluinnarni inuunitsinnut ilaalluinnalersimapput, kisiannili tassa piviusut tunngavigalgit pisortat innaallagissiorfiat siulleq Nuummi atoqqaartinneqarpoq 26. oktober 1949, taamanikkuulli innaallagissamik atuineq annertusiartuaaginnavissimavoq, ulluinnarnilu innuttaasut inuunerannut ilaalluinnalersimalluni.

Nunarput inissisimallualersimavoq

Nunarput – tassalu Kalaallit Nunaat – nunarsuarmi nunat ataasiakkaat ilagaat ataavartumik nukissiuuteqarnikkut angusaqarnerpaasimasoq. Ukiut kingulliit 10-20-t ingerlaneranni erngup nukinga atorlugu nukissiuuteqarnerup ineriartortinneqarsimanerannit angusaasimavoq, ullumikkut erngup nukinganit pilersorneqarnitta 70 % sinnerlugu erngup nukinganeermat, taamaalillunilu silamut aserorterisumik CO2-mik aniatitsisoqarpallaarani. Kujataani nukissiuutit minguitsut 80 %-tingajaapput, maannakkullu misissorneqarpoq kommunimi illoqarfiup kingulliup Nanortallip imermik nukissiuuteqalersinnaanera aammalu pilersaarutigineqarluni Qorlortorsuarmi erngup nukinganik pilersuinerup annertusineqarnissaa imermik pilersuiffiup annertusineratigut.

Qaqortumi Narsamilu nal. akunnerani ataatsimi qullernik qaminngatitsineq takutitsineruinnaassaaq. Illoqarfiimmi taakku Qorlotorsuarmi imermik nukissiuummit innaallagissamik pilersugaapput. Illoqarfilli kiserngoruttoq nunaqarfinnilu innaallagissamik pilersorneqartut uuliamik ikummateqarput, tassalu piviusoq malillugu qullernik qaminngatitsineq iluaqutaasussaavoq. Avatangiisunut iluaqutaasussaavoq sapinngisamik amerlasuut peqataassappata.

Earth Hour tapersersoruk -Taammaaliornikkut silap qanoq issusia tapersersussavat!


Sila pillugu ataatsimoorluta iliuuseqarnissatsinnik isumassarsiaammat, piukkunnartuuvoq ikinngutit ilaquttallu ilagalugit naneruutinik qaammaqquserluta aliannaarsaarluta unnussiuaarujoornissatsinnut, oqaluuserilaarlutigulu sila pillugu qanoq iliuuseqarsinnaanerput.
Kommune Kujalleq ilinnit tusagaqarusuppoq. Assinik, video-nik imaluunniit eqqarsaatersuutinik il.il., Earth Hour aamma silap allannguutaanut tunngasunik teknik@kujalleq.gl –imut nassitsit, imaasinnaavoq illit silaannaap qanoq issusianik eqqartuinermut ilanngussat kommuunip quppersagaanut ilanngunneqartoq.

Qujanaq silarput eqqarsaatigigakku!