Qinnuteqaat UNESCO-imut tunniunneqartoq: Kujataa – Kalaallit Nunaata Kujataani nuna kulturimut tunngasoq

Sumiiffiit nutaat UNESCO-mut nunarsuarmioqatigiinnut kingornutassiussaatut eriagineqartunut ilanngunneqarnissaat pillugu qinnuteqaat maanna ukiunik qulinit piareersareerlugu tunniunneqarpoq. 2017-mi UNESCO sumiiffinnik nutaanik nunarsuarmioqatigiinnut kingornutassiussaatut eriagisassatut allattorsimaffiannut allassimasussanik toqqaassapput, Kalaallit Nunaanni naasorissaanikkut kulturiat Kujataani sumiiffiit tallimaasut makku allattorsimanissaannit isummerfigineqassapput: Qassiarsuk, Igaliku, Sissarluttoq, Tasikuluulik aamma Qaqortukulooq nunarsuarmi kingornussassatut eriagineqartussatut allattorsimaffimmiinnissaat assut ilimanaateqarpoq.
3. februar 2016
Kalaallit Nunaata Kujataani subarkisk-milu naasorissaanikkut nunatat, oqaluttuarisaanikkut ukiut kingumut 1000-t piusut, neriuginartumik akimanartorsuit ilaatigut makku Egyptenimi Pyramidersuit, New Yorkimi Kiffaanngissutsimik Ilisarnaat Ilulissanilu Sermermiut peqatigalugit akornanniissinnaalersinnaapput. Namminersorlutik Oqartussat Kommune Kujalleq Nunattalu Katersugaasivia kinguneqarluartumik suleqatigiinneranit maanna januaari qaammataagaa 2016 qinnuteqaasiornerat naammassineqarpoq.

»Nuannaarutigeqaara nunarput UNESCO-mut qinnuteqaammik tunniussisinnaalersimammat isumaqarpungalu neriuuteqarluarnissamut pissutissaqarluartugut. Allaaserisaq assut kusanartumik suliarineqarsimasoq takuneqarsinnaavoq isumaqarpungalu toqqaaniarnermi isigineqarumaarluta« Nivi Olsen Kultureqarnermut Naalakkersuisoq oqarpoq.

Naasorissaanikkut Kujataani nunat pineqartut Kalallit Nunaanni aappassaanik UNESCO-mi nunarsuarmioqatigiinnut kingornutassiussatut ilanngunneqassapput Ilulissani Sermermiut tulleralugit. Qinnuteqaat maanna Naalagaaffeqatigiit sinnerlugit Kultureqarnermut Ministerip Berthel Haarderip atsiorpaa Parisimullu UNESCO-mut nassiullugu. Kujataaniit qinnuteqaat Naalagaaffeqatigiinnit ukioq manna kisiartaavoq maannalu tassa naammagittarluta utaqqisariaqarpugut; ilimanarpoq aappaagu aatsaat allattorsimaffimmut ilanngussimanersoq paasitinneqarnissarput.

»Nunarsuarmioqatigiinnut kingornutassiussatut eriagineqartut allattorsimaffiannut allassimasut nunat assigiinngitsut iluanni Isaaffissuartulli pitsaassutikkut ataqqinartigaaq kommunitsinnut ajunngilluinnaqqissaartoq, tassa uagutsinnut Kommune Kujallermi najugaqartunut nunarsuarmioqatigiinni pingaarluinnartumik kingornutassaqalernitsigut. Kiisalu aamma piffimmi inuiaqatigiinnut ineriartornikkut pingaaruteqarluinnartutut isigaara. Takornariaqartitsineq tassaassaaq sukarsuit ilaat Kujataani aningaasaqarnikkut tunngaviusussaq,aamma nunarsuarmioqatigiinnut kingornutassiussaqarnitsigut manna tikeraassallugu pilerinarluinnarnerunissaanit pilerseqataassaaq «borgmesteri Jørgen Wæver Johansen oqarpoq.

Kommune Kujalliup takornariaqartitsineq maani innuttaasunut iluaqutaanissaa ukkappaa.
»Aammattaaq nunarsuarmioqatigiit kingornutassiuussaqalernissaanut atatillugu maani inuussutissarsiortut iluaqutiginissaat qulakkeerneqassaaq taamaattumik savaatillit takornariaqarnermullu suliallit maani qanittumi ingerlaannartumik peqataatinneqartarput.« Jørgen Wæver Johansen oqarpoq.

UNESCO-mit ilisimatuut aasamut Kalaallit Nunaata Kujataa tikeraassavaat ilimagineqarporlu 2017-mi Kalaallit Nunaanni nutaamik nunarsuarmioqatigiit kingornutassiuussaqalernissaat naggataarutaasumik aalajangiiffigineqarumaartoq.

Kontakt i Kommune Kujalleq: Økonomidirektør Kenneth Høegh Keho@kujalleq.gl