Socionom Arne Lund toqukkut qimaguppoq

29. januar 2016
Socionom Arne Lund sivisuumik napparsimareerluni 2015-mi januaarip ulluisa 24-ianni toqukkut qimaguppoq.

Arne Lund, 1952-imi inuusoq, kalaallinilu siullersaalluni socionomitut ilinniarsimasoq ukiut ingerlaneranni pisortani sulisarsimavoq, tassa sulisutut, pisortatut aammalu kommunimi qinikkatut, kiisalu piffissap ilaani namminersorluni nutserisutut oqalutsitullu sulisimavoq.

Arne Lund pisortani sulinermini soqutigilluakkani, isumaginninneq, suliffigisimavaa ilaatigut sullissisutut, isumaginninnermi pisortatut aammalu isumaginninnermi ataatsimiititaliami siulittaasutut. Aamma pinerluuteqarsimasunik isumaginnittoqarfimmi ukiuni qassiini sulivoq illersuisuusarsimallunilu.
Arne Lund assigiinngitsorpassuarnik soqutigisaqarnini piginnaaneqarninilu pissutigalugu aamma akiliisitsiniartarfimmi pisortatut sulisimavoq.

Taaneqareersut saniatigut Arne Lund qinikkatut sulisimavoq, tassa Qaqortup kommuniani kommunalbestyrelsimut Siumut sinnerlugu qinikkatut, qinigaaffinnilu allani sinniisutut.

Piginneqatigiinneq eqqarsaatigalugu Arne Lund Kalaallit Nunaanni Brugsenimi sulilluarsimavoq, nuna tamakkerlugu siulittaasuusimalluni, kingullermi Qaqortup immikkoortortaani siulersuisuni allattaasimalluni.

Taamaalilluta Arne Lundip toquneratigut inuk inuiaqatigiit atugaannik sorpassuarnik pitsanngorsaaniarluni innuttaasunik ilungersorluni sullissisimasoq annaavarput.

Matumuuna Arne Lundip nulianut ilaqutaanullu qamannga pisumik misiginneqatiginninnerput apuukkusupparput.

Ataqqillugu eqqaaneqartarili!