Innuttaasunik ataatsimiisitsineq kingulleq Inuili-mi Narsami ingerlanneqarpoq

4. januar 2016
Kommune Kujallermi innuttaasunik ataatsimiisitsinerni arlaqartuni kingulleq borgmesteri Jørgen Wæver Johansen-imit ingerlanneqartoq Inuili-mi Narsami ingerlanneqarpoq.
Takkuttuni 70-it missaanniittuni amerlanersaat tassaapput atuartut inuusuttut Inuili-mut aammalu Piareersarfik-Narsamut attuumassutillit, taakku kommunip pilersaarutaa aammalu aaqqissuussaanermut politikki pillugu video-liat marluk soqutiginnillutik isiginnaarpaat, tamatumalu kingorna inip iluani kommunip pilersaarutaanut assit nivinngaassorneqarsimasut siunnersuuteqarfigalugit allattuillutik.
Ataatsimiisitsinerup ingerlanneqarnerani unillatsiarnermi Inuili-p iggaviani ilisimalluarneqartumi sananeqarsimasunik kaffillertoqarpoq, saftit kaagillu.

Innuttaasunik ataatsimiisitsinernit ingerlanneqarsimasunit tamanit siunnersuutit tamarmik pilersaarusiornermut pisortamit Birger Kristoffersen-imit suliaapput, aammalu kommunalbestyrelsimi ataatsimiinnissani borgmesterip kommunip pilersaarutaanut tunngatillugu saqqummiussassaanut ilanngunneqartussaassallutik.