Kujataani ikkannersuarni aalisalernissamut aalisartut periarfissinneqarusupput!

TUSAGASSIORFINNUT NALUNAARUT / PRESSEMEDDELELSE
Qaqortoq, 13.december 2015
Kujataani piniarneq aalisarnerlu pillugit isumasioqatigiinneq
11-12 december 2015
13. december 2015
Kujataani kangerlunni aalisagaqangaanngilaq, Kujataatali avataani ikkannersuarni saarulleqaqaaq. Taamaammat avataani aalisarnissamut Kujataani aalisartut periarfissinneqarusupput. Tamanna Kujataani aalisarnermi ajornartorsiutinik qaangiiniutissatut isigineqarpoq, taamaammallu kujataani saarullinniarnermi raajarniarnermilu kujataamiut immikkut pisassinneqartalernissaat kissaatigineqarpoq.

Taama inerniliipput aalisartut piniartut, aalisakkanik tunisassiortut, Pinngortitaleriffik, KNAPK, Grønlandsbanken, kommunalbestyrelsimut Inatsisartunullu qinikkat kiisalu Kommune Kujallermi atorfilittat Qaqortumi tallimanngorneq arfininngornerlu 11.-12. december piniartut aalisartullu atugaat pillugit isumasioqatigiinnermut peqataasut.

Ikkannersuarni aalisarnissamut periarfissaq
Pinngortitaleriffik aalisartullu Kujataani massakkut aalisarneq pillugu assigiimmik isumaqarput, tassalu kujataani kangerlunni saarulleqanngitsorujussuusoq, kisiannili avataani ikkannersuarni saarulleqarluartoq. Avataanili aalisarneq kujataani aalisartunut matoqqavoq pisassat angallatillu aningaasaliiffigisariaqartut pisariaqartinneqarmata. Aningaaseriviit oqarput aningaasaliisoqassappat qularnaveeqqutit pisariaqartut, qularnaveeqqutit pineqartut assersuutigalugu tassaasinnaapput pisassinneqarnissamik neriorsuutit, ajornanngippallu pisassiissutit ukiunut arlalinnut atuuttariaqarlutik.

Aalisartut 3 sømilinik killeqarfiup avatinnguani saarulleqarluarneranik maluginiagaqarput, pingaartumik ukiassakkut ukiakkullu nalliusimaartartunik, kisiannili sinerissami aalisarnissamut akuersissut atorlugu killeqarfiup 3 sømilip avataani aalisarneq ajornarpoq. Aalisartut oqarput "Kujataani sinerissamut qanittumi aalisarnissamut akuersissutillit pisuussutinik taakkuninnga atuisinnaasariaqarput".

Aalisartut aamma aalisakkanik tunisassiortuniit tapersersorneqarnissaminnik kissaateqarput, taamaammallu aalisartitseqatigiiffimmi Arctic Prime Productionimi pisortaq oqarpoq "aalisartut killeqarfiup 3 sømili avataani saarullinniarsinnaanngoortuuppata pitsaalluinnassagaluarpoq, aammalu aalisartut kattullutik ningittagarsuutitaarlutik avataani saarullinniarsinnaalissappata pitsaalluinnassagaluarluni".

Kujataani raajarniaqqilernissamut periarfissaqarpoq
Aalisartut oqaluttuarput Kujataani raajarpassuaqartoq, nangipullu "ukiuni kingullerni raajarniarnerup unitsinneqarneranut pissutaasoq tassaavoq kujataani tunisassiorfiit matoorarneqarsimanerat, pisuussutilli suli tamaaniipput, iluaqutigineqaratillu uninngaannarnissaat akuerisinnaanngilarput". Aalisartut oqarput Kujataani aalisartut avataani pisassineqartariaqartut, pisatsinnillu tigusisussanik tunisassiorfeqanngippat taava uutiteriviit anginngitsut taavalu nunami poortuiveqarlutillu qerititerivillit aalluttariaqarpavut.


Kujataani umiatsiat inuussutissarsiutit nutaat pisariaqartinneqarput:
Aalisartut piniartullu oqarput "Kujataani umiatsiaaqqat inuussutissarsiutit nutarterneqarnissaat pisariaqalersimaqaaq umiatsisarpassuit nallinnarsiinarlutik umiuinissamut ulorianarsisimammata." Siunnersuutigineqarpoq umiatsiat inuussutissarsiutit eqqarsaatigalutit Naalakkersuisut Kujataa immikkut sammissagaat, kisiannili namminersorlutik oqartussat tapiissutaasa saniatigut aningaasanik pissarsiarneq ajornartorsiutaasarpoq.

Simon Simonsen (S) Kommune Kujallermi Inuussutissarsiornermut Suliffeqarnermullu Ataatsimiititaliami siulittaasoq oqarpoq "Umiatsianik inuussutissarsiutinik nutarterinissaq Kommune Kujallermiit tapersersorneqassaaq, aammalu aningaasaliissutissat sinnerinik matussuseeqataanissamut periarfissanik misissuisoqassalluni".

Nannut umimmaallu piniarneqarnerat
Kujataani nannut amerliartorput Nunallu Isuata eqqaani nunaqarfiup Aappilattup eqqaani aalajangersimasumik najugaqartoqalersimavoq, ukiumullu taamaallaat nannut sisamat pisassiissutigineqartartillugit nannut ajornartorsiutaajartuinnarput. Taamaammat nannut pisassiissutigineqartartut amerlineqarnissaat nannullu savaateqarfinni pisarineqartut pisassanit ilanngaatigineqartarunnaarnissaat kissaatigineqarpoq. Aamma aarrit kommunitsinnut aqqusaartut pisarineqarsinnaanngortariaqarnerat piniartunit oqaatigineqarpoq.


Nunaqarfinni tunisassiorfiit ammarneqartariaqarput:
Kujataani nunaqarfinni tunitsiviit ajoraluartumik matoqqapput, pingaartumik ukiualuit matuma siorna AGF-ip akiliisinnaajunnaarnerata kingornatigut, kisianni nunaqarfinni aalisarneq piniarnerlu amerlanertigut aningaasarsiutissatuaasarmata nunaqarfinni tunitsiveqarnissaq aalisartunit piniartunillu pinngitsoorneqarsinnaanngilaq. Simon Simonsen (S) oqarpoq "Tunisassiorfiit ammatinnissaannut kiffartuussinissamik isumaqatigiissusiornikkut Inatsisartut Naalakkersuisullu nunaqarfinni tunisassiorfiit ammarneqarnissaat isumagisariaqarpaat".
Borgmester Jørgen Wæver Johansen (S) oqarpoq nunaqarfinni aalisarnermut iluaqusersuutissat Kommune Kujallermiit aallunneqarmata kommuni nunaqarfiit aalisartoqarfiusuni annerpaani marlunni Aappilattuni Alluitsup Paanilu 2016-imi Namminersorlutik Oqartussat suleqatigalugit umiatsianik iluarsaassisarfiit marluk tamarmik 144 m2-iusut sananeqassasut.

Kista Isaksen (IA) inuussutissarsiornermut suliffeqarnermullu ataatsimiititaliami siulittaasup tullia oqarpoq "nunaqarfinni tunitsivinni ukioq naallugu suliffissaqartitsineq qularnaarniarlugu nunaqarfinni tunisassiorfeeqqat assersuutigalugu panertuliassanik tunisassiassaqarnissaat, ikkanersuarni aalisartut suleqatigalugit qularnaarneqartariaqartoq.

Aalisarnermut piniarnermullu nunap immikkoortuani siunnersorteqarneq:
Kujataani aalisarneq ineriartortinneqarsinnaavoq, aalisarnerli ineriartorteqqinneqassappat pilersaarusiorluarneq aningaasaliisartunullu attaveqarluarneq pisariaqarput. Taamaammat isumasioqatigiinnermi erseqqissumik kissaatigineqarpoq Kujataani aalisarnermut siunnersorteqarfeqalissasoq. Aalisartut oqarput "Savaatilinnut siunnersorteqarnermut assingusumik pilersitsiniartoqartariaqarpoq, aammalu siunnersortit taakku suleqatigineqarsinnaapput".

Inaarutaasumik oqaatigiumasat
”Kangerluvut saarullininniarpasinnginnerat nassuerutigisariaqarparput, taamaammat Kommune Kujallermi aalisarneq ineriartussappat avataasiorluni aalisarneq aqqutissarpiaavoq" Kista Isaksen oqarpoq. Aalisarneq Kommune Kujallermi atugarissaarnermut suli pingaaruteqaqaaq, sinerissalli qanittuani aalisarneq ukiuni kingullerni qulikkaani ajornartorsiorfiujuarsimavoq, pisuussutilli atorluarneqassappata aalisartut suli annerusumik suleqatigiittariaqarput, Kista Isaksen nangippoq.

Inatsisartut ilaasortaasut assigiissumik oqarput Kujataata avataani saarulliit kujataani aalisarnermik ineriartortitsinermut kiisalu Kommune Kujallermi suliffissanik ataavartunik pilersitsinermut atorneqartariaqartut: "Kommunitta avtaani saarullippassuaqarneq assortugassaajunnaarsimavoq, aalisagarpassuillu taakku maanna Islandimiit imartatsinnut illuarsimalersut atorluartariaqarpavut, saarullinniarnerlu kujataamiut iluaqutigisariaqarpaat".

Borgmester Jørgen Wæver Johansen Suka Frederiksenip, Vivian Motzfeldtip kiisalu Simon Simonsenip naliliineri isumaqatigalugit tapersiivoq: "Pisassiissutit aalisartitsisut annerit minnerillu tulaassisussaatitaanerinik suliareqqiisussaatitaanerinillu pisussaaffittallit pissarsiarineqarnissaat pingaarnerpaajuvoq. Massakkut taanna piviusumik periarfissatuaavoq, tamatumali peqatigisaanik namminersorlutik oqartussanut kaammattuutigissavara pisuussutinik aqutsineq kommuninut tunniunneqassasoq taamaaliornikkummi pisassiisarneq uagut nammineq annerusumik aqussinnaanngussagatsigu taamalu pisuussutitta aningaasatigut iluaqutigineqarnerat nalittorsarneqarnerallu aqussinnaanngussagatsigu.

Suka Frederiksen aamma Kujataani aalisarnerup ineriartortinneqarnera pillugu inatsisartuni ukiakkut oqallinnermik ilisimatitsissuteqarpoq, Kommune Kujallermilu immikkut ineriartortitsiniartoqarnissaanik tikkuaasoqarmat tamanna piffissami aggersumi Naalakkersuisunit malersoqqinneqassalluni.


Partiit akornanni isumaqatigiinneq
"Saarulliit avatitsinnut utersaarsimapput, ningittagarsuutillu avataani ikkannersuarni ulikkaapallattalersimapput - aalisartullu kujataamiut amerlanerusut ikkannersuarni aalisalertariaqarput", Simon Simonsen inerniliivoq. Ilanngullugu Simon Simonsen oqarpoq aalisartitsisut, annerusumik nalittorsaanissamik angallatinissallu pissarsinissamik kissaateqartut ukiunut amerlanerusunut atuuttunik pisassinneqartariqartut.

Taamaammat Kommune Kujallermi qinikkat partiinit tamalaaneersut kissaatigaat Kujataani saarullittassiissutit immikkut isiginiarneqalertariaqartut aalisartut kujataamiut avataani pisassanik atuisinnaanngorlugit, pisassiissutillu kommunimi aalisakkanik tunisassiorfinnut tulaassinissamik suliareqqiinissamillu pisuussaaffittaqartariaqartut.


Sukumiinerusumik paasisaqarumalluni attavissat:

Borgmester Jørgen Wæver Johansen 559672, jwj@kujalleq.gl
Ataatsimiititaliap sulittaasua Simon Simonsen: 493317, sisi@kujalleq.gl
Medlem af Inatsisartut Suka Frederiksen: 497423, suka@ina.gl
Inuuss. ineriartort. pisortaq Kenneth Høegh: 565604, keho@kujalleq.gl