Kommune Kujalleq ilorraap tungaanut aallarpoq

Kommunalbestyrelsip ulloq 3. december 2015 isumaqatigiilluni 2016-mut ukiunullu missingersuusiorallarfinnut missingersuutit suliarilluakkat tamarmillu patajaatsumik sinneqartooruteqarfiusut akuersissutigai.

Kommunip aningaasaqarnera 2015-mi pitsannguallassimaqaaq. Siusinnerusukkut aningaasanik tigoriaannarnik amigaateqartarsimaqisugut aammalu ingerlatsinitsinni aningaasartuutivut matussuserniarlugit kassekreditimik atuisariaqartarsimasugut maanna allarluinnarmik inissisimalersimavugut. Taamaalilluta septemberimiit - kommunit kattunneranniit pernaataasumik - nammineq aningaasaativut atorlugit kommunerput ingerlassinnaalersimavarput. Ingerlatsinermut aningaasartuutit sukumiilluinnartumik misissorneqarsimapput, aammalu siorna sinneqartoorutit 5 mio. kr.-it missaannik amerlassuseqarsimagaluit ukioq manna pitsanngoriartinneqartussanngorlutik. Aamma allatorluinnaq periaaseqarluta ileqqaarniarsimavugut, tassami missingersuutit pinngitsoornani aningaasaliiffigisassanut kiisalu piumagaani aningaasaliiffigisassanut immikkoortitersimagatsigit. Pinngitsoornani suliassat inatsisitigut piumasaqaataapput illuatungaanilu piumagaanni suliassat inatsisitigut piumasaqaataanatik. Inatsisitigut piumasaqaataanngitsuni 7,5 procentinik ileqqaaruteqarsimavugut. Ingerlallualeriartornerput taanna siunissami suli pitsanngorsassavarput.

Pitsanngorsaatit taakku atorlugit ukioq manna 20 mio. kr-it missaannik sinneqartooruteqarnissarput naatsorsuutigaarput, aammalu nakkutilliisoqarfiup piumasaqaatai tamakkerlugit, ilami sipporlugit, naammassissagatsigit naatsorsuutigaarput Naalakkersuisuniit annertusisamik nakkutigineqarnerput qimassagipput. Tassunga atatillugu Namminersorlutik Oqartussanik suleqateqarluarsimanerput - aamma tamatumani - qujassutiginiarparput.
Kommunip aningaasaqarnerata ukiuni kingullerni malunnaatilimmik pitsanngoriarnera annermik tallimanik pissuteqarpoq.
Aaqqissugaaneq annertuumik allanngortiterneqarsimavoq allaffissornikkut ileqqaaruteqarnermik nassataqartumik. Allaffissornermi pisortat immikkoortortallu ikinnerulersimapput.
Naalakkersuisut sanaartukkanik siammaasimapput Kommune Kujallermi suliffeqarfiit suliassaqarnerulernerannik nassataqartumik.
Avataani saarullittassat tulaassisussaatitaanermik pisussaaffittalerneqarnissaannik Naalakkersuisut aalajangernerat Kujataanni suliarineqartartut 2013-imi 1.500 tonsiniit ukioq manna tamakkerneqassagunik 11.142 tonsinut amerleriarsimapput.

Kommune Kujalliup Namminersorlutik Oqartussanut aningaaserivinnullu akiligassami erniaat isumaqatigiinniutigeqqippai erniallu malunnaatilimmik apparneqarnissaat angusinnaasimallugu.
Ukiorpassuanngortuni ilungersortoqareersorlu kiisami kommunit akornanni naligiissaarineq naammaginarnerusoq anguneqarsinnaasimavoq.
Aamma tamakku saniatigut 2016-imi sanaartugassat annertuut pilersaarutigineqarput, aamma namminersorlutik oqartussaneersut. Kommunip sanaartornermut missingersuutai ukiorpassuanngortuni aatsaat taama amerlatigilerput, ilaatigut Nanortalimmi utoqqaat illuat aningaasaleeqataaffigissavarput kiisalu 20-20-60 atorlugu inuit namminerisaminnik illuliornerannut aningaasaliissalluta. Kommune Kujallermi sanaartukkat qassiit ingerlallualerput ukiullu tulliani nanginneqassallutik, soorlu Campus Kujalliup allineqarnera, Narsami atuarfiliorneq kiisalu Qaqortumik nutaamik inissialiorneq.
Aamma kommunimi tamarmi inissianik oquttunik iluarsaassinissamut 18,8 mio. kr.-it immikkoortinneqarput, pingaartumillu utoqqarnut inissianik iluarsaassinermut atorneqassallutik.
Anartarfiit kuuffiinik nutarterinermut aningaasanik immikkoortitsisoqarpoq, naatsorsuutigineqarporlu 2016-imi ikuallaaviup nutarterneqarneranut aningaasat ikigisassaanngitsut atorneqassasut. Aamma aalajangerneqarpoq Qaqortumi asfaltiliorfik nutarterneqassasoq.
Kommunalbestyrelsi timersornikkut kulturikkullu siuarsaanissaminik kissaateqarnini naapertorlugu 2016-imi 2017-imilu 6 mio. kr.-inik ivigaasanik arsaattarfinnut aningaasaleeqataassutissaminik immikkoortitsivoq, tamatumanilu naatsorsuutigineqarpoq illoqarfinni pineqartuni innuttaasut peqatigiiffiillu namminneerlutik suliat taakku naammassineqarnissaannut peqataassasut.
Meeqqat atuarfianik pitsanngorsaanermut atatillugu atuarnermi atukkat pitsanngorsarumallugit kommunalbestyrelsip atuarfeqarneq ukioq 2016-imi immikkut ittumik suliniuteqarfiginiarlugu aalajangerpoq.
Meeqqat inuusuttuaqqallu, inuusuttut suliffissaaleqisut kiisalu utoqqaat immikkut suliniuteqarfiginiarlugit 2016-imi 8 mio. kr-it immikkoortinneqarput, taakkulu suliassaqarfinni taakkunani politikkikkut anguniakkat timitalerneqarnissaannut atorneqassapput.
Kommunip sullissinerinut akiliutit allanngussanngillat, kiisalu akileraarut 28 procentiuinnassalluni.
Campus Kujallermik piginnaanngorsaaneq pillugu suleqateqarnermut atatillugu kommunimi sulisut pikkorissarneqarnissaannik isumaqatigiissusiortoqarpoq, pikkorissaaqattaarnerillu nalilersorneqareerlutik ukiup tulliani ingerlaqqissasut naatsorsuutigineqarluni.
Suliffissaaleqisut piginnaanngorsarneqarnissaannik atorfinitsinneqarnissaannillu isumaqatigiissuteqarnissaq siunertaralugu inuussutissarsiortut sukumiinerusumik suleqatigineqalernissaat Kommune Kujallermit siunniunneqarpoq.
Ineqarneq eqqarsaatigalugu kommunalbestyrelsi kommunip inissiaataani ineqarnermut akiliutinik appaaniarpoq. Tamanna anguniarlugu ilungersortoqarsimavoq kommunip inissiaataanik attartortartut aningaasatigut atugarissaarnerulernissaat siunertaralugu. Ineqarnermut immikkoortortap sumiissusia apeqqutaalluni ineqarnermut akiliutit 1,3 aamma 13,4 procent akornanni appariaateqassapput.
Missingersuutit akuerisani atorlugit kommunip aningaasaqarnini patajaallisarpaa siunissamullu piareersimalerluni. Kommunalbestyrelsip naatsorsuutigaa 17,8 mio. kr.-inik 2015-imi sinneqartooruteqassalluni.
Ilorraap tungaanut aallarpugut siunissamullu ingerlariaqqinnissatsinnut tunngavissarissaalerluta.


Jørgen Wæver Johansen
Borgmesteri
jwj@kujalleq.gl