Jeremias Hardenberg-Thomsen toqukkut qimaguppoq

21. december 2015
Jeremias Hardenberg-Thomsen, Arsummi 22. september 1934 inunngortoq, tallimanngorneq 11. December 2015 sivisuumik napparsimareerluni toqukkut qimaguppoq.

Jeremias 14 ukioqarluni Qaqortumut ilinniariartorluni nuussimavoq, illoqarfimmut ilisarisimasaqarfiginngisaminut, kisiannili nuannaralugu ukiorpassuarni najugaqarfigiligassaminut, sinerissami piffinni najugaqallatsiarfigisarsimasami saniatigut.

Jeremiap Qaqortumi ilinniarnermi nalaani, 15-nik ukioqarluni, najugaqarfigisamini ikuallattoqarmat inuup inuuneranik naleqartumik, meeqqat pingasut igalaakkut annillugit annaappai, tamatumalu kingorna qatserisartoqalernissaq pingaartitaralugu suliniuteqarsimalluni, pilersinneqareernerisalu kingorna nammineq qatserisartuusimalluni. Jeremias Qaqortumi qatserisartut klubbianni Qamitsi-mi ataqqinaammik ilaasortaavoq.

Jeremias Danmarkimi umiarsualiortutut naammassereernermi kingorna aallartitatut ukiut marluk suliartorluni Qaqortumut uterpoq, nuliassamili naapinnerata kingunerisaanik nunassilluni, ukiunilu tulliuttuni 58-ni nuliani najorlugu.

Jeremias eqeersimaartuuvoq inoqatiminullu ataqqinnittuulluni, 1975-milu Qaqortup Kommuniani kommunalbestyrelsimut ilaasortaalerluni, ukiuni 14-ni atasuinnarmik attataminik, aammalu borgmesterip tullersortaatut inissisimaffigisaminik, ilaatigut isumaginninnermut ataatsimiititaliami siulittaasutut inissisimaatigaluni.

Kommunalbestyrelsimi qinikkatut sulinermi saniatigut Jeremias namminersortutut nutserisartutut suliffimmik ingerlatsivoq, aammalu ukiut ingerlaneranni taxa-nik, lastbil-inik kiosk-imillu ingerlatsisimalluni, soorluttaaq nunatsinni Spejderrådimi aammalu Sulisitsisut Peqatigiiffiata siulersuisuini ilaasortaasarsimasoq, taamaalillunilu nunatta iluani avataanilu ilisarisimannitserpassuaqalersimalluni.

Jeremiap nulia, qitornai, ernutaai ernutaqqiitaalu qamannga pisumik Kommune Kujallermit misiginneqatigaavut.

Jerimias Hardenberg-Thomsen-ip eqqaamaneqarnera ataqqinartuuli.


Jørgen Wæver Johansen
Borgmesteri, Kommune Kujalleq