Borgmesteri oqalugiaataa jullerpalaartitsinermi, Qaqortoq-mi sapaat 12.december 15

15. december 2015
Asasakka innuttaaqatikka, meerannguit inuusuttut minnerunngitsumillu utoqqartavut, arnat angutillu.

Siullermik Sapaassuit Pingajuanni pilluaritsi.

Periarfissaq manna iluatsillugu kommunalbestyrelsi sinnerlugu maani Qaqortup timersortarfiani Kommune Kujalliup juullerpalaartitsineranut tikilluaqqorusuppassi.

Ullumi maani katersuussimavugut sapaassuit nalliuttorsiutigiumallugit - qanilaarneq ataqatigiinnerlu - illoqarfitta ilisarnaatigisaat, kommunitsinnilu suleqatigiinnitta ilisarnaatigisaat nalliuttorsiutigiumallugit.

Ukiormanna assigiinngitsorpassuit aammalu angusarpassuit nalliuttorsiutissaraavut, minnerunngitsumik ukiumi qaangiutilersumi nunaqqatigut timersortartut angusimasaat ileqquusumik ullumi aamma nalliuttorsiutigissallutigit.

Inuit timersorneq nuannarisaraarput - nuannariuaannarnikuullutigulu. Siuaavut Kalaallit Nunaannut tummaqqaaramilli piniarsinnaajumallutik isorartuumilu angalasinnaajumallutik sungiusarnissaq qasujaallisarnissarlu pisariaqartissimavaat. Aammali nuannariinnarlugu timersortarsimapput, sivisuumik angalanerup nalaani imminnut aliikkusersorniarlutik qanilaarnerlu misiginiarlugu, soorlu aamma uagut suli taamaattartugut. Pingaarnermilli timersornerup peqqinnartumik uninngaannarfiunngitsumillu inooriaaseqarnermik siuarsaasuuvoq pimoorussisinnaanerpullu tassuunatigut siuarsarneqartarpoq – tamanna minnerunngitsumik inuusuttutut anguniagaqartilluni pingaaruteqartuuvoq.

Ukiormanna timersortartuutitta najukkaminni nunatsinnilu timersuutini arlalinni angusat kusanarluinnartut angunikuuaat. Ataasiakkaat nunat tamalaat unammisitsinerini peqataanissartik qilanaaraat, ilaatigut Arctic Winter Games unammisitsinerillu allat peqataaffigissallugit, tamanna immikkut tulluusimaarutigaarput.

Timersorneq peqatigiiffeqarnikkullu eqeersimaartumik ingerlatsineq inuusuttortatsinnut amerlasuunut aqqutissaasutut isigaarput, taamaammat Kommune Kujallermi eqeersimaartumik inuuneq timersornerlu aamma annertuumik salliutissimavarput ukiuni tulliuttuni aningaasanik pingaarnersiuinitsinni. Taamaalillutalu Kujataani illoqarfinni tamani ivigaaraasanik arsaattarfiliortoqarnissaanut kommunalbestyrelsip aningaasaliissutit naammattut immikkoortippaat, aningaasalli taakkua atorneqassappata piumasaqaataavoq najugarisami suleqatigiinnikkut arsaattarfiliornissap piviusunngortinnissaa, tassami najugarisatsinni suleqatigiissinnaanngikkutta ikioqatigiissinnaanatalu - ingerlariaqqinnaviannginnatta. Tamattalu ingerlariaqqissaagut – ilorraap tungaanut ingerlariaqqissaagut.

Tulluusimaarutigaara maani illoqarfitsinni ikioqatigiinneq pikkoriffigigatsigu, maani Qaqortumi inuuneq pitsaasoq pilersikkumallugu suliniutit pitsaasut naammassisaratsigit. Assersuutigalugu suleqatigiissinnaanermut piginnaasaq tamanna peqqutaalluni ukiuunera tamakkerlugu silami sammisassaqartitsinerit peqqinnartut siuarnissaannut QSAP qanimut suleqatigalugu aningaasanik immikkoortitsivugut. Ilimagaara Tasersuarmi Tasersuullu eqqaani sammisassaqartitsissamaarnerit tamatta peqataaffiginissaat qilanaarigipput.

Aammattaaq 2016-imi aaqqissuussaanikkut politikkimi suliniutinut 8 mio. koruuninik immikkoortitsinikuuvugut, meeqqat inuusuttullu pitsaasumik inuuneqarnissaannik siuarsaaniarluni suliniutinut inunnillu isumaginninnerup iluani suliniutinut immikkuullarissunut, aningaasat taakku tassa suliniaqataarusuttunit tamanit qinnuteqarfigineqarsinnaasut, tamatumanilu suliniutit tigussaasumik uuttorneqarsinnaasumillu kinguneqartitsisinnaasut salliutinneqassapput.

Taamaammat periarfissaq manna iluatsillugu innuttaasut peqatigiiffiillu tamaasa maani Kujataani inuuneq pitsaanerusoq tamatsinnut pilersikkumallugu ajunngitsumik iliuuseqarusuttut maannangaaq suliniutit sorliiit aallartisarusunnerlugit eqqarsaatersornissaannik kaammattorusuppassi. Kommunalbestyrelsip tungaanit tamakku piviusunngortinniarlugit suleqatigiinnissarput qilanaaraarput.

Neriuppunga tamatta ilaquttavut, ikinngutivut qanigisagullu peqatigalugit nuannersumik pilluarnartumillu juullisiorumaartugut, tamannali nallertinnagu ualeq manna sapaassuit nalliuttorsiutiginerini immitsinnut timersortartuvullu nalliuttorsiutigigallartigit, aammalu nuannersorpassuit tulluusimaarutigisinnaasavut nalliuttorsiutigalutigit. Tassami nalunnginnatsigu peqatigiilluta sapernata aammalu pitsaasumik allanngortitsisinnaalluta.

Qujanaq