Niels Lange-mut eqqaaniut

24. november 2015
Niels Lange, Nanortallip Kommunerisimasaani kommunalbestyrelsimi ilaasortaasimasoq, toqukkut qimaguppoq ataasinngorneq 23. november 2015, utoqqarsuanngorluni 88-inik ukioqarluni.

Niels Nanortallip Kommunalbestyrelsianut ilaasortaasimavoq 1975-79.

Niels, 1. april 1927 ingunngortoq, ukiorparujussuarni Nanortallip Atuarfia pedelitut aalajaalluni sulisimavoq, soraarninngornissami tungaanut.

Tamatuma siorna inuusunnermi nalaani suliffeqarfinni nunatsinnit avammut tunngasuni, soorlu Ivittuuni Ikerasassuarmilu, sulisimavoq.

Suliaminik ataqqinnilluarluni ingerlatsisimavoq, saniatigullu inuiaqatigiinni peqatigiiffeqarnikkut sunniuteqarluarsimalluni. Innuttaasutut inoqamminut maligassiulluartuuvoq, tassami ukiorpassuarni iminngernaveersaartunut ilaasortaavoq.

Utoqqalinerminittaaq peqatigiiffilerineq attatiinnarpaa, utoqqaat peqatigiiffiani ukiorpaalunni suleqataasimavoq, tatigineqarluni.

Niels Lange, Nanortallip Kommunitoqaani ataqqinaamik innuttaavoq.

Kommune Kujalliup Nielsip qimatai, meerai, ernutai ernutaqqiutaalu qamannga pisumik misiginneqatigaavut.

Eqqaaneqarnera ataqqinartuuli.

Borgmester

Jørgen Wæver Johansen