Ilinniartitsisoq, atuarfiup pisortaa Gerhardt Egede toqukkut qimaguppoq

15. november 2015
Ilinniartitsisoq, Qaqortumi atuarfiup pisortarisimasaa Gerhardt Egede arfininngorneq 14. november 2015 sivisunngitsumik napparsimareerluni toqukkut qimaguppoq.

Gerhardt Egede Igalikumi 1951-mi inuusoq 1975-imi ilinniartitsisutut ilinniarluni naammassivoq kingornalu nunaqarfinni illoqarfinnilu assigiinngitsuni ilinniartitsisuusarluni. Ilinniartitsisutut sulinermi saniatigut timersornermik ingerlataqarluarpoq. Aamma atuartut angerlarsimaffianni kollegiani nakkutilliisuuvoq timersorumatuninilu atorlugu inuusuttunik sammisaqartitsilluartarsimalluni.

Ilinniartitsisut kalaallit namminerisaminnik peqatigiiffeqalernissaannut suleqataalluarsimavoq kattuffiullu isumaqatigiinniussisinnaalernissaanik ilungersuutiginnittunut sallernut ilaasimalluni taamaammallu ilinniartitsisut ullumikkut sulinerminni atugaannut assut sunniuteqarsimalluni.

Inuiaqatigiit ingerlanneqarnerannuttaaq suleqataasarpoq ilaatigut Qaqortup Kommuniani kommunalbestyrelsimut Inuit Ataqatigiit sinnerlugit ilaasortaasimalluni.

Geertilli annermik ilisarisimaneqaataa tassaavoq soraarninngornissami tungaanut ukiorpaalussuarni Qaqortumi Tasersuup Atuarfiani pisortaasimagami. Pisortatut annertuumik piumasaqartartutut taamaattorli naapertuilluartutut ilisarisimarneqarpoq.

Geerti ilinniartitsisutut, ilinniartut angerlarsimaffianni nakkutilliisutut, peqatigiiffilerisutut, qinikkatut, atuarfiup pisortaatut inuiaqatigiinnut minnerutsumilli inuusuttunut ikinngitsunut malunnaatilimmik sunniuteqarsimavoq tamannalu pillugu eqqaamaneqassalluni.

Geertip nulia, qitornai, ernutaalu qamannga pisumik Kommune Kujallermit misiginneqatigaavut.

Eqqaamaneqarnera ataqqinartuuli!


Jørgen Wæver Johansen
Borgmester