NI-Qaqortumiit serviceøkonom-it qulit allagartartaarnerat Dimission for 10 serviceøkonomer fra NI-Qaqortoq

Ilinniartut qulit Campus Kujallermi Niuernermik Ilinniarfimmiit angajoqqaat, ilinniartitsisut , Greenland Business-imiit pisortamit aammalu borgmester Jørgen Wæver Johansen-imiit peqataaffigineqartumik soraarummeerput.
24. november 2015
Serviceøkonom-itut ilinniarneq sivikitsumik ingerlariaqqiffiusumik ilinniagaavoq, ukiut marluk affaalu tikingajallugit ingerlanneqartartuulluni.

Ilinniartut aningaasaqarneq, aaqqissuussaaneq aammalu suliniummik aqutsineq, sullissineq kulturimik paasisimasaqarneq, attaveqatigiinneq takornariaqarnerlu pillugit ilinniartitaasarput.



Ilinniartut august 2013-imiit juni 2014 tikillugu atuarfimmi ilinniartitaanikuupput. Juli-august-imi sapaatit akunneri arfineq-pingasut sulinermik misiliinikuupput. Tamatuma kingorna september 2014-imiit – juni 2015 tikillugu atuarfimmi nalinginnaasumik ilinniartitaaqqinnikkuupput. Tamanna sapaatit akunnerini aqqaneq-marlunni sulinermik misiliinermik malitseqarnikuuvoq. Sulinermik misileereernerup kingorna atuaqatigiit septemberimi ukiormanna paasisassarsiorlutik sapaatit akunneri marluk Island-imiipput. Tamatuma kingorna atuarfimmut uterlutik soraarummeerutigalugu allaaserinnipput. November 2015 soraarummeerutigalugu allaaserisartik inaarutaasumik soraarummeerutigaat.



Ilinniakkami tassani ilinniartut Kalaallit Nunaanni sumit tamaanngaanneersuupput, ukiormannalu illoqarfinnit makkunaneerlutik: Nuuk, Narsaq, Sisimiut, Ilulissat aamma Maniitsoq.



Ulloq 20. november 2015 ilinniagartik naammassillugu persuarsiutaasumik naggaserpaat aammalu soraarummersimanermut uppernarsaataat tunniunneqarlutik. Atuarfik sutugassanik nerliuteqarpoq aammalu Rie Oldenburg, ilinniartitsisoq inuiaqatigiinnilu eqeersimaartumik inooqataasoq, tikilluaqqusisuulluni.

”Ilinniagarsi akuleriissillugu ilinniartitaanikkut sulinermillu misiliinikkut ingerlanneqarnikoq maannakkut naammassisimalerparsi. Tassa isumaqarpoq piviusumik sulilerussi atuakkersornermiit sulinermut ikaarsaarneq tupannartutut misiginavianngikkissi”.



Rie oqalugiarnermini inuussutissarsiortunit peqataatitat qutsavigai. ”Ilisseqanngitsuuppat ingerlannneqarsinnaasimanavianngikkaluarpoq”. Ilaatigut qutsavigineqarput Greenland Sagalands, Ulu Travel, Tupilak Travel, World of Greenland, Tasermiut, Blue Ice, Icelandic Mountain Guides aamma Inuk Hostel”.

Tamatuma kingorna ilinniartut allaaserisimasaat naatsumik oqaluttuarai, aammalu misissuisimanerit takornariaqarnikkut inuussutissarsiornermut annertusaaqataasimasinnaasut, Rie-p oqaatigisai naapertorlugit takornariaqarneq 90-ikkuunniit arfinileriaammik annertusinikuulluni.



”Maannakkut takusinnaalereerparput ukiorpassuit sulipiloornikkut – nutaanillu suliniuteqarnikkut – tikeraat amerlanerit nunatsinnukartarlernerat…pingaaruteqarporlu politikkerit takornariaqarnermut soqutiginninnissaat.



Aamma Borgmester Jørgen Wæver Johansen peqataanissamut aammalu soraarummeertunut peqataasunullu oqalugiaateqalaarnissamut qaaqquneqarsimavoq. Oqalugiaataa tusarnaartunit soqutigineqarpoq peqataasunullu arlalinnut sakkortuumik sunniuteqarluni.

Borgmesterip oqalugiaataa ataani atuarsinnaavat



Serviceøkonom Dimission

Qaqortoq, tallimanngorneq 20. november 2015



Asasakka maani Campus Kujallermi Serviceøkonominngortusi, angajoqqaat, ilaqutaasut, ilinniartitsisut, ilinniarfiup pisortai, tamassilu maani ullumi najuuttusi.

Siullermik, Serviceøkonominngornissinni – pilluaritsi. Qujanaq ullumi maanga Kommune Kujalleq sinnerlugu aggersarneqarneqarama. Tulluusimaaqaanga ullumikkorpiaq ilissi maani Campus Kujallermi ilinniagaqarnersi naammassillugu nalliuttorsiutigineqarnerani peqatigisinnaagassi.

Takornariaqarnerup iluani Nunatsinni inerisaaqataalluarnissassinnut maanna piginnaasaqarluarlusi periarfissaqalerpusi. Naluneqanngitsutut ulluni makkunani Inatsisartuni, Nunatsinni nunap immikkoortuini tamani, mittarfeqarnikkut inerisaanissaq annertuumik oqaluuserineqarpoq. Qujanartumik tamatumani amerlanerussuteqartut isumaat malinneqassammat tamanna piviusunngortussanngorpoq. Taamaalilluta takornariaqarnerup iluani kalaallit pisinnaasut, sulisinnaasut piginnaasaqarluartullu pisariaqartinneqartut – suli amerlingaluttuinnartussaapput.

Taamaammat kukkunanga oqarsinnaavunga: Ullumikkut nunarput pisuunnguallappoq – kingumut uppernarsarneqarmat nunatsinni inuusuttorpassuaqartoq piginnaasanik ulikkaartunik. Nunaqqatissinnut maligassiuivusi, takutipparsi piumassuseq nukiusoq, piumagaannilu anguniagaq sunaluunniit anguneqarsinnaammat.

Tamakku immaqa aamma eqqarsaatigalugit taalliortorsuatta ilaat, Augo Lynge, ilaatigut ima taalliami ilaani allappoq:



”Suli isumaqarpit

sapersuassasut

inuiaat kalaallit

inortuassasut?

Siutitit matukkit

sapersorisunut.

Ilumut upperaagit?

Sapinngivippugut!”



Ilumut sapinngivippugut – ilumut sapinngivippusi.



Qanortoq ingerlariaqqinnissassinni – sumuungaluarnersoq – angusaqarusussuseq maani Qaqortumi takutissimasarsi attattuarisiuk.

Qanortoq ikinngutigiillusi suleqatigiissinnaassuseqarneq maani takutissimasarsi inerisartuarisiuk – suleqatigiissinnaassuseqarnermi kisimi ilumoortumik angusaqarfiusarpoq.

Tamassi qamannga pisumik – ilaquttasilu pilluangaaritsi – ingerlalluarisilu.



Qujanaq.