Ilinniartut 100 sinnillit borgmesterip oqalliseqatiginissaanut takkupput


Campus Kujallermi atuartut 100 sinnillit kommunip siunissaa pillugu borgmester Jørgen Wæver Johansenip oqaloqatiginissaa siunertaralugu innuttaasunik ataatsimiititsinermut takkupput.
Suliniutinik kinguneqartitsisarnernillu, illutigut atugassarititaasunik pitsaanerusunik meeqqallu atuarfiata assorsuaq pitsaanerunissaanik kissaateqarput.
27. november 2015
Ullup atuartitsiviusup naalernerani ataatsimiititsineq ingerlanneqaraluartoq GU-p ataatsimoortarfiani ilinniartut ilinniartitsisuilu taama amerlatigisut takkussimanerat borgmesterimit suleqataanillu tupaallaatigineqarpoq.

Pingasunngorneq 18. november 2015 ualikkut kommunimut pilersaarummik aaqqissugaanikkut suliniutinik aammalu innuttaasut atugaannik sammisaqarfiusumik Kommune Kujallermi suli innuttaasunik ataatsimiititsisoqarpoq.

Ataatsimoortarfik ilinniartunik nerrivinni igalaalluunniit saanni issiffattunik ulikkaavippoq, katersorsimasullu akornanni tamatigut tamaana ilinniartitsisut siammarsimasut takuneqarsinnaallutik. Nerrivimmi kaffeqarpoq, imeqarluni kaagiaraqarlunilu aammalu nunap assingi kommunimoortut saqqumillutik. Allaatit isumassarsianik siunnersuutinillu allattuinissamut atugassat aamma saqqumipput.
Tassa innuttaasunik ataatsimiititsiniartoqarpoq Kommune Kujalliup siunissaa pillugu, peqataappullu borgmester Jørgen Wæver Johansen, pilersaarusiornermut pisortaq Birger Kristoffersen, oqalutsit Kelly aamma Nuka Marie, aammalu allaffeqarfimmi ataqatigiissaarisoq.
Ataatsimiinneq pingasut tooraa aallartippoq borgmesterip minutsini qulini saqqummiineranik, kingorna kommunimi aaqqissugaanermut politikki pillugu video meeqqat inuusuttuaqqallu, suliffissaaleqisut kiisalu utoqqaat atugaannik pitsanngorsaaniarnermut tunngasoq takutinneqarpoq.
Videop takutinneqarnerata kingorna borgmesteri inersuarmi oqallinnermik ammaavoq qasseerpassuarnillu apeqquteqaateqarfigineqarluni, ilinniartullu apeqqutinik isumassarsianillu sakkortuunik uisaallannartunillu saqqummiussaqartarlutik.
Qiimmassimaarneq ataatsimiinnermi malunnarpoq aammalu alapernaassuseq soqutiginninnerlu kikkorpassuarni misinnarput tassami seqersitsivimmut borgmesterimullu alartaaserluaqimmata.

Meeqqat atuarfianni ilinniartitsisut isornartorsiorneqarput.
Pingaartumik meeqqat atuarfiat isiginiarneqarpoq. Tamatumani inuusuttut qassiit misigisartakkaminnik oqaluttuarput. Qassiit meeqqat atuarfianniit ilinniarnertuunngorniarfimmut niuernermilluunniit ilinniarfimmut ikaarsaarnerminni qanoq uisaallassimatigalutik oqaluttarput, inuusuttullu isornartorsiuineranni meeqqat atuarfianni ilinniartitsisut assorsuaq isornartorsiorneqarput.
Inuusuttut oqalliseqataasut naapertorlugit ilinniartitsisut amerlanerit suliaminnut tunniusimaneq ajorput sulinngitsuukulavallaartarlutillu. Ilinniartitsinngippallaartarput piumasakippallaartarlutillu. Inuusuttut nassuiaapput ilinniarnertuunngorniarfimmi niuernermilluunniit ilinniarfimmiilernerminni ilinniagassarpassuarnik piumasaqaaterpassuarnillu nalaataqaleraangamik qanoq tupaallatsigisarlutik.
Meeqqat atuarfiat pillugu oqallinneq inituvoq, borgmesterillu inuusuttut peqatigalugit nassuerutigaa meeqqat atuarfiat immikkut suliniarfigisariaqarmat. "Meeqqat atuarfiat assut isiginiarparput, nukinnillu pisariaqarnera malillugu atuiffigineqarnissaa qularnaassavarput", borgmesteri nassuiaavoq.

Suliffissaaleqisut sulilersinniarneqassapput.
Sammisat annertuut allat tassaapput suliffissaaleqineq piitsuussuserlu. Suliffissaaleqineq eqqarsaatigalugu inuusuttut qassiit erseqqissivissumik isumaqarput suliffissaaleqisut sulilersinniarneqartariaqarmata aammalu massakkornit annerusumik inunnik sullissivinni kommunimilu suliffeqarfinni atorluarneqarnerusariaqarmata.
Suliffeqarnerup avataaniiginnalernerit suliffissaaleqisullu pikkorissarnernik suliffissanillu tigooraasinniarlugit qanoq iliuuseqartoqartariaqarpoq.
Borgmesteri suliffeqarfinnut tunisassiorfinnullu pulaartarnerminit paasisaminik oqaluttuarpoq inuusuttullu isumaqatiginerarlugit inuit suliffimmik paarsineq suliartortuarnerlu ilinniartariaqarmassuk. Kommune aqqutigalugu sulilersinniarneqassapput, aammalu piginnaanngorsartinneqartassallutik. Borgmesteri oqaluttuarpoq kommune tamakkuninnga suliniuteqalereersimammat, kingullermillu suliffissaaleqisut suliinarnissaat suliffissanillu tigusinissamut piareersarnissaat pillugu inuussutissarsiortut peqatiserineqarsimallutik.

Nalunaaqqutaq sisamat kingorna inuusuttut angerlakaallutik aallartipput, kisiannili oqallinnermi uummarissumik ingerlaannarpoq.

Naluttarfiit kulturikkullu pisartut amerlanerusut Kujataa soqutiginarnerusunngortissavaat.
Sammisassaqarfiit amigaataanerat inuusuttuniit borgmesterimut assut eqqartorneqarpoq.
Sammisassaqarfissat sammisassallu Kujataanut kajungernarsaataasussat amigaatigineqarput. Innuttaasut illuat, isiginnaartitsisarfik filmertarfilluunniit pitsaasut pisariaqartinneqarnerat oqaatigineqarpoq. Ilinniartoq inuusuttoq isumaqarpoq naluttarfik kommunitsinnut assut ullumikkornit kajungernarnerulersitsissasoq. Inimit pattaanneqarpoq Borgmesterip inuusuttut isummanik nutaanik tunioraanerannik nersualaarpai nassuiaallunilu isumassarsiat ilarpassuit kommunalbestyrelsimi allaffeqarfimmilu oqaluuserineqartareermata, aningaasaqarnerli aamma ajornakusoorsimavoq massakkulli pitsanngoriartulersimalluni.
Qinikkat allat suleqatigalugit isumassarsiat sulissutigineqarnissaat oqaluuserineqarnissaallu borgmesterip isumagissavaa, tassa kulturikkut sammisaqarfissat tulluusimaarutigisinnaasavut qanoq piviusunngortissinnaanerivut.


Borgmester Jørgen Wæver Johansen aammalu pilersaarusiornermut pisortaq Birger Kristoffersen suliaqaqatigiikkuutaanut ataasiakkaanut sammisumik, soorlu meeqqat atuarfianni Piareersarfimmilu ilinniartitsisunut atuartunullu kiisalu inuussutissarsiorfinni assigiinngitsuni atorfilinnut sammisumik ataatsimiititsisalernissamik pilersaaruteqarput.