Inuiaqatigiinni sulilluarsimasoq, umiartortoq Abel Silassen, Abilleeraq, toqukkut qimaguppoq.

20. november 2015


Inuiaqatigiinni sulilluarsimasoq, qajavissuaq, umiartortoq Abel Silassen, Abilleeraq, toqukkut qimaguppoq.

Umiartortoq, Abel Silassen, Abilleeraq, pingasunngorneq 18. november 2015 toqukkut qimaguppoq.



Abel Silassen, Abilleeraq, 1925-mi inuusoq inuiaqatigiinni assigiinngitsorpassuarnik peqataalluni inooqataasimavoq, sulerusussuseqarneq aammalu angusaqarusunneq qitiutillugit; taamaalilluni peqatigiiffippassuarni ilaasortaasimalluni sullissisimallunilu, soorlu utoqqaat peqatigiiffianni, qinikkatullu ilagiit sinniisaanni aammalu Nanortallip kommunalbestyrelsiani ilaasortaasimalluni. Inuusunnermini timersornermik nuannarisaqartuusimavoq qajartullaqqissuusimallunilu, kujasinnerusumi qaannamik allakkisartut kingullersaraat, Ikerasassuaq ”Prins Christian Sund” silasiorfik tikillugu allakkisartarsimalluni, silarsuullu angallavigittuaannannginnerata aamma misillertittarsimavaa.



Abel Silassen, Abilleeraq, ukiorpassuarni umiartortut inuuvoq, nakorsap angallataani naalagaasimalluni.

Abel Silassen, Abilleeraq, partii Siumut-mi ataqqinaammik ilaasortaavoq, aammalu Namminersornerusut saqqarmiulittagaannik sølvimik saqqarmiuligaasimalluni.



Inuk nukittooq, ataqqinassusilimmik pissuseqartuusoq, isummaminik ersarissumik annitsisartoq taamaalilluni toqukkut qimaguppoq.

Abel Silassen-ip, Abilleeqqap nulia, qitornai, ernutaai, ernutaqqiiitaalu qamannga pisumik Kommune Kujallermiit misiginneqatigaavut.



Qajavissuaq Aabilleeraq eqqaamaneqarnera ataqqinartuuli.





Borgmester Jørgen Wæver Johansen