Borgmesteri Nanortalimmi innuttaasunik atsiortitsinermut akissuteqarpoq

1. januar 0001

Borgmesteri Nanortalimmi innuttaasunik atsiortitsinermut akissuteqarpoq  

Borgmester Jørgen Wæver Johansen ulloq 29.9.2015 Nanortalimmi innuttaasunik ataatsimiititsinermi innuttaasut atsiornerinik borgmesterip kommunillu saaffiginnissutinik akissuteqartarnissaanik kajumissaarutaasunik tigusaqarpoq.

Borgmesterip atsiornernik tunniussisoq suliniarsimaneranik qutsavigaa oqarlunilu saaffiginnissutit suut kommunimit akineqartarsimanngitsut pisimanerai nalornisigigini. Atsiornerit tunniunneqarnerisa kinguninngua atorfilittanit qinikkanillu paasineqarpoq innuttaasup inuttut mailikkut borgmester Jørgen Wæver Johansenimut allakkani pigai.

Mailit ilarpaalui tamakku inuttut oqaatsinik nuanninngitsunik nalinginnaasumillu akuersaarneqarsinnaasinnaanngitsunik imaqarput. Taamaammat borgmesteri taakkununnga akissuteqarsimanngilaq maililli allat qujarussimallugit.

Borgmesterip innuttaasunik ataatsimiititsinerup ingerlanerani najuuttut tusaatillugit inummut tassunga oqaatigaa saaffiginnissutit borgmesterimit namminermit atorfilittanilluunniit akineqartarmata.

”Innuttaasut Kommunimut saaffiginninnerminni nalinginnaasumik akineqartarput, innuttaasullu kajumissaarpavut kommunip siunissaa - tamatta siunissarput - pillugu oqallinnermut peqataalluaqqullugit. Innuttaasuniit saaffiginnissutit pissuserissaartumik nikassaataanngitsunillu imaqaraangata qujaruttuaannarpakka”, Jørgen Wæver Johansen, Kommune Kujallermi borgmesteri oqarpoq.