Toqqissisimalluni peroriartornermut angerlarsimaffiup pingaaruteqarluinnarnera - Kommune Kujallermi isumaginninnermut ataatsimiititaliap ataatsimeersuartitsinera

Ineqarnerup pingaarluinnassusia - Kommune Kujallermi meeqqat inuusuttuaqqallu toqqissillutik ineriartortinneqassapput" qulequtaralugu Kommune Kujallermi isumaginninnermut ataatsimiititaliaq 16. oktober 2015 Qaqortup katersortarfiani ataatsimeersuartitsivoq.
23. oktober 2015

Toqqissisimalluni peroriartornermut angerlarsimaffiup pingaaruteqarluinnarnera - Kommune Kujallermi isumaginninnermut ataatsimiititaliap ataatsimeersuartitsinera  

"Ineqarnerup pingaarluinnassusia - Kommune Kujallermi meeqqat inuusuttuaqqallu toqqissillutik ineriartortinneqassapput" qulequtaralugu Kommune Kujallermi isumaginninnermut ataatsimiititaliaq 16. oktober 2015 Qaqortup katersortarfiani ataatsimeersuartitsivoq.



Ataatsimeersuarnermut pilersaarummi aaqqissuisut allapput: "Kommune Kujallermi meeqqat inuusuttuaqqallu ilaat peroriartornerminni sumiginnarneqartarput angajoqqaatik meeqqaminnik paarsisinnaaneq ajormata, ilaatigut imigassamik ikiaroornartumilluunniit ajornartorsiuteqarnertik pissutigalugu, meeraqarpoq inuusuttuaraqarlunilu kinguaassiutitigut innimiilliorfigineqartartunik aamma inuusuttuaqqat akornanni imminortoqartarpoq. Kommune Kujallermi inuttut ajornartorsiutit ilarpassui tunngavimmikkut inissaqannginnermik pissuteqarsinnaapput.



Meeqqat pillugit Siunnersuisoqatigiit MIO-p siulittaasua Sermitsiaq.ag naapertorlugu Kommune Kujalliup suliniarneranik nersualaarivoq allallunilu:



”Meeqqanut inuusuttunullu pisariaqartitsisunut kommuni iliuuseqarnissaminut suliniummik aallartisaanera takullugu nuannaarutigivara. Taamak iliuuseqarneq meeqqat pisinnaatitaaffiisa malinnissaannut alloriarneruvoq pitsaasoq, Aviâja Egede Lynge erseqqissaavoq.”





Kommune Kujallermi isumaginninnermut ataatsimiititaliap siulittaasuata Stine Nørbækip alloriarneq pisariaqavissutut isigaa.



"Sullissiveqarfiit assigiinngitsut naapipput innuttaasut taakkorpiaat sullitarigatsigit. Ataatsimeersuarnitsigut siunissami sullissiveqarfiit assigiinngitsut ajornannginnerusumik suleqatigiissinnaaleqqullugit nukivut eqiterpavut.



Inuit taama amerlatigisut katersoratsigit eqimattakkuutaat suleqatigiikkuutaallu pitarlugit eqqarsarnissamut piareersalertariaqarpugut."



Ataatsimeersuarnermi siunertarineqartoq oqaluttuarilaarsinnaaviuk?



”Imigassamik ikiaroorniutinillu atornerluinerup aammalu aningaasanoorajunnerup ajornartorsiutaanerat qanoq unitsinneqassanersoq paasiniarniassallugu siunertaraarput. Ullumikkut ajornartorsiutinik qamiterisutullusooq ittarpugut, siunissamilu allatut eqqarsartariaqalerpugut - suliassaqarfiit assigiinngitsut pitarlugit eqqarsartariaqalerpugut. Ajornartorsiutit inuillu taakkorpiaat immikkoorluta sulinitsinni ikiorniartarpavut, immikkoorlutali sulisimavugut. Akornatsinni ilaqutareeqarpoq ikiorneqarnissaminnik pisariaqartitsisunik. Sullissiveqarfiit assigiinngitsut pitsaanerusumik ataqatigiissaarisariaqarput kikkut tamarmik ullumikkornit pitsaanerusumik sulilernissaat siunertaralugu.



Alloriaqqinnissaq suliniutillu sapanginneqassanngitsut assut isumaqatigiissutigineqarpoq, katersuuttullu sinnerlugit politiit ataatsimeersuarnermik tullermik aaqqissuisuunissaat ilimanarpoq.




Ataatsimeersuarnermi qulequttat pingasuupput:



Ineqarnerup inuttut atukkanut pingaassusia



Meeqqat inuusuttullu sumiginnakkat.



• Imminut toquttarneq.



Ataatsimeersuarnermi siunertaasut:



Peqqissusermut inuttullu atukkanut ineqarnerup pingaassusianik ilisimatitsineq



Meeqqanik inuusuttuaqqanillu sumiginnaaneq pillugu ilisimatitsineq



Imminortarneq pillugu ilisimatitsineq



Sullissiveqarfiit suleqatigiiffiinik, peqqinnerulersitsiniarnermik - nappatsaaliuinermik, pinerlutsaaliunermik aammalu tarnikkut ikiuinermik Kommune Kujallermi innuttaasunik suliaqartut kikkuunerinik paasisimannilernissaq.



Suleqatigiissitat suleqatillu akornanni ilisimasanik agguaaqqatigiinneq



Isumaginninnermi suliniutinik ingerlareersunik ineriartortitsineq ataqatigiissaarinerlu







Kommune Kujallermi isumaginninnermut pisortaq, Bodil Svare, aamma isumaqarpoq ataatsimeersuarneq pissarsiaqarfiulluarsimasoq.



”inuppassuit tunniusimalluartut peqataapput, ataatsimeersuarnerullu ingerlaavartariaqarnera qularutissaanngilluinnarpoq. Sullissiveqarfiimmi assigiinngitsut akornanni ataqatigiissaarineq ingerlateqqinneqartariaqarpoq”



Ataatsimeersuarneq neriuutigineqartutut ingerlava?



"Ataatsimeersuarneq aaqqissorniarlugu nukippassuit atorsimavavut, soorunalumi tamaasa nalilersorumaarpavut, ataatsimulli isigalugu isumaqarpunga saqqummiisut piviusullu suliavut imminnut assut ataqatigiissut."



Ataatsimeersuarnermi pissarsiat annersaattut suna isigaajuk?



"Isumaginninnermi suliniuterpassuit ajornartorsiutip ersernerinik iluarsiiniarnerusarsimapput, maannalu meeqqanik inuusuttuaqqanillu sumiginnaasarnermut pissutaasut qanoq iliuuseqarfiginialerpavut. Aanngajaarniutinik atornerluinerit toqqissisimanartunillu inissaqannginneq meeqqat inuusuttuaqqallu peroriartornerannut assorujussuaq sunniuteqartarpoq.





Upernaaq manna aqutseqatigiinnik pilersitsisoqarpoq napparsimaveqarfimmiit, isumaginnittoqarfimmit, atuarfeqarnermut meeqqeriveqarnermullu suliaqarfimmit politiinillu peqataaffigineqartumik. Ataatsimeersuarneq napparsimaveqarfimmiut, meeraaqqerisut, atuarfiup isumaginnittoqarfiullu kiisalu politiit sulinerminni ataqatigiissaarinermik nangitsinissaannut aqqutissiuiffiuvoq.





Napparsimaveqarfiup, isumaginnittoqarfiup politiillu akornanni aqutsisoqatigiit qanimut suleqatigalugit ataatsimeersuarneq Kommune Kujallermi Isumaginninnermut Ataatsimiititaliamit aaqqissuunneqarpoq.





Upernaaq manna aqutseqatigiinnik pilersitsisoqarpoq napparsimaveqarfimmiit, isumaginnittoqarfimmit, atuarfeqarnermut meeqqeriveqarnermullu suliaqarfimmit politiinillu peqataaffigineqartumik.



Napparsimaveqarfiup, isumaginnittoqarfiup politiillu akornanni aqutsisoqatigiit qanimut suleqatigalugit ataatsimeersuarneq Kommune Kujallermi Isumaginninnermut Ataatsimiititaliamit aaqqissuunneqarpoq.





MISI - perorsaaneq tarnikkullu atukkat pillugit siunnersuisarfik - meeqqat atugaat pillugit suleqatigiinnerulernissaq anguniarlugu sullissivinnut allanut suleqatigiinnissamik isumaqatigiissusiortalernissamut qilanaarpoq.



Liselotte Hansen MISI-Kujallermi psykologiuvoq ataatsimeersuarnermullu peqataalluni. Ataatsimeersuarnermi siunertanut isumaqataalluarnerminik ersersitsivoq.



”Paasissutisseeqatigiiffiusumik isumassarsioqatigiiffiusumillu katersuunnermut Kommune Kujallermi meeqqanik inuusuttuaqqanillu sullissisut tamangajalluinnarmik peqataanerat misigisaavoq nuannersoq. Tamatta ataasiakkaarluta meeqqanik inuusuttuaqqanillu ajornartorsiulersinnaasunik sullissinerput ilisimassallugu pisariaqarpoq.



Ataatsimeersuarnikkut tamakku ersersinneqarput, suliallu ingerlaavarnissaat tamanit isumaqatigineqarmat sammisat ilaat februar 2016-imi ataatsimeersuarnermi nutaami nangeqqinneqarumaarput.





Suliaqarfinnit assigiinngitsunit immikkullu ilisimasanik pigisaqarfiusunit assigiinngitsunit ataatsimeersuarnermut peqataasut 48-iupput.



Kommune Kujallermi Politiit pisortaat Bent-Ole Kleist ataatsimeersuarnermut peqataasut pingaaruteqarluinnartut ilagaat. Maluginiagai erseqqilluinnarput, tassa nukiit katersornissaat isumatusaarnerusoq.



”Ataatsimeersuarneq peqataasunut pissarsiaqarfiulluarpoq. Ukiorpaalunni Kommune Kujallermi meeqqanik inuusuttuaqqanillu sullissisut katersuussimanngillat. Pissutsit pitsanngorsarneqarsinnaasut qallorpavut. Isumaginninnermut ataatsimiititaliamiit suliarineqartoq pitsaasuuvoq. Siunissami iluaqutigisassatsinnik saqqummiussuisoqarpoq."



Ataatsimeersuarneq politiit sulinerannut pitsaasumik kinguneqassava?



"Meeqqat inuusuttuaqqallu atugaannik qanoq ataatsimoorluta pitsanngorsaasinnaanitsinnik suleqatitta qaninnerit saqqummiussinnaanerat politiinut iluaqutaajuaannarpoq."



Angusat tigussaasut suusinnaappat?



Pinaveersaartitsineq pillugu qanimut suleqatigiilersinnaavugut taavalu suliassanik suleriaatsinillu agguataarisinnaalluta. Aamma ataatsimeersuarnerit taama ittut sulisut pissutsinik paasisimasaqarnerulernerannik nassataqartarmata pitsaasarpoq.



Politiit tullinnguullutik aaqqissuisuussappat?



”Aap, februar 2016-imi Politiit tulliullutik qaaqqusisuussasut oqaatigaarput.”