Narsami atuarfiup aqutsisui Nivi Olsenimut allagaqarput

Nivi Olsen, Ilinniartitaanermut Naalakkersuisoq inatsisartut ataatsimiittarfianniit Narsami atuartut angusaannik isornartorsiuivoq angusallu agguaqatigiissillugit appassinnerannik tikkuaalluni, oqarlunilu misilitsittut tamarmik angusinngitsoorsimassagunartut. Taama saqqummiinera pissutigalugu atuarfiup siulersuisui kiisalu atuarfiup pisortaa Ivalo Motzfeldt sakkortuumik qisuariaateqarput.
28. oktober 2015

Narsami atuarfiup aqutsisui Nivi Olsenimut allagaqarput 

Nivi Olsen, Ilinniartitaanermut Naalakkersuisoq inatsisartut ataatsimiittarfianniit Narsami atuartut angusaannik isornartorsiuivoq angusallu agguaqatigiissillugit appassinnerannik tikkuaalluni, oqarlunilu misilitsittut tamarmik angusinngitsoorsimassagunartut. Taama saqqummiinera pissutigalugu atuarfiup siulersuisui kiisalu atuarfiup pisortaa Ivalo Motzfeldt sakkortuumik qisuariaateqarput.

Allakkat matumunnga ilanngussat atorlugit siulersuisut pisortarlu atuarfimmi ajornartorsiutinik Nivi Olsenimut nassuiaateqarput.

Inatsisartut ataatsimiittarfianni Nivip isornartorsiuinera innuttaasunit qassiinik puffaammissutigineqarpoq atuarfimmullu saaffiginnissutigineqarluni.

"Atuarfik innuttaasut ilaanni Narsami atuarfimmik Nivip isornartorsiuineranik tusarnaarsimasunit sianerfigineqarpoq." Narsami atuarfiup pisortaa Ivalo Motzfeldt nassuiaavoq. "Isumaqarpugut Nivi inatsisartut ataatsimiittarfianni taama sakkortutigisunik aammalu atuarfipput pillugu oqaaseqartinnani misissuilluarsimasariaqaraluartoq uagutsinnullu saaffiginnissimasariaqarluartoq."



Atuarfiup ajornartorsiuteqarnera aammalu angusat pitsaannginnerat atuarfiup pisortaata Ivalo Motzfeldtip ilumoornerarpaa, kisiannili atuartut tamakkerlutik angusinngitsoorsimanerat ilumuunnginnerarlugu.

"Takusinnaavarput angusat agguaqatigiissinneri appasimmata, imaanngilarli tamarmik angusinngitsoorsimasut" Ivalo oqaluttuarpoq.

Allakkat atuarfiup aqutsisuisa siulersuisuisalu ataatsimoorlutik allagaraat atsiugaralugillu.

"Nivimut allakkatsinni nassuiaavugut atuarfimmi angusat pitsaannginnerat ilumoormat, aammalu nassuiaavugut sorpassuarnik ilungersuutissaqaratta.

Ukiut kingulliit pingasut-sisamat aqutsisut taarseraassimapput. Assersuutigalugu ukiut pingasuinnaat ingerlaneranni pisortat tulliisa arfinilissaat massakkut atuuppoq. Inissiat akisuallaarlutillu pitsaanngippallaarmata ilinniartitsisut amerlasuut aallartarput nuuttarlutilluunniit. Illoqarfimmi suliffissaaleqineq annertoqaaq, tamannalu atuartut atuarfimmi suliumassusiannut taamalu angusaannut toqqaannartumik sunniuteqartarpoq. Atuarfik sananeqartoq kinguaattoorfiulluni suli naammassineqanngimmat atuartut ininiit ininut nooqattaartariaqartarput.

Ukioq manna klasse immikkut atugaqarsimavoq agguaqatigiissillugit angusanik appartitsisunik, ukiullumi tamaasa klassit assigiinngitsunik angusaqartarput." atuarfiup pisortaa Ivalo Motzfeldt Nivi Olsenimut allakkaminnik eqikkaanermini oqarpoq.







Ivalo Motzfeldt atuarfimmi pisortanngoramili ajornartorsiutinik taakkuninnga atuarfeqarnermik ingerlatsivimmik Inerisaavimmilu siunnersortinik isumalioqateqarluni siunnersorteqarlunilu aaqqiiniarluni ilungersorsimavoq.

Inerisaavimmik suleqateqarluni atuarfimmik inerisaaneq unikaallassimavoq, atuarfimmili namminermi ineriartortitsinermik suliaqarpugut. Assersuutigalugu oqaatigisinnaavara ukioq atuarfiusoq naatinnagu Narsap Atuarfiani suliffeqarfimmut pilersaarusiortussaagatta. "Aamma atuartut ilinniartitsisullu takkutinngitsoortarnerat sukateriffigisimavarput, atuartut angajoqqaavi suleqatigaavut iliuusissanillu pilersaarusiorluta."







Atuarfik inuiaqatigiinni qitiusorujussuuvoq, amerlaqisullu atuarfimmi pissutsinit sunnerneqartarmata suleqatigiittoqartariaqarpoq. Nutaamik alloriarnertut atuarfiup aqutsisui isumasioqatigiisitsinissamik suliniuteqarput.



"Illoqarfimmi isumasioqatigiinnermut aggersaassaagut ima qulequtalimmik "Narsami ulluinnarni inuuneq qanoq pitsanngorsassavarput" Ivalo Motzfeldt naggasiullugu taama oqarpoq.

Meerartatta atugarissaarnerulernissaat siunertaralugu illoqarfimmi kikkut tamarmik suleqatigiillutik iliuusissanik pilersaarusiornissaat pingaaruteqarpoq. Ataatsimoorluni aaqqissuisoqartarnissaa aammalu pinnguartarfiup allineqarnissaa kissaatigaarput.