Qaqortumi innuttaasunik ataatsimiititsinermi isumassarsiat pitsaasorpassuit.

Aaqqissugaanermut politikki kiisalu kommunimut pilersaarut pillugu innuttaasunik ataatsimiititsineq 28. september 2015 Qaqortup katersortarfiani ingerlanneqarmat 30-it sinnillit assigiinngitsunik utoqqaassusillit inuussutissarsiutillillu peqataapput. Takkuttut amerlagisassaanngikkaluartut peqataasut isumassarsianik pitsanngorsaatissanillu amigaateqanngeqaat.
1. oktober 2015
Naggasiullugu innuttaasut katersortarfimmi nunap asserujussuanut nipitissuillutik suliniarfissanik tikkuartuipput siunnersuuteqarlutillu. Siunnersuutit apeqqutillu atorfilittanit katersorneqarput 2022-ip tungaanut kommunimut pilersaarutissap kommunalbestyrelsimit oqaluuserineqarnissaanut atorneqassallutik.

Borgmester Jørgen Wæver Johansen aallarniilluni Kommune Kujalliup killiffianik nassuiaateqarpoq taavalu aaqqissugaaneq pillugu politikki aammalu kommunimut pilersaarut pillugu isiginnaagassiat tulliullugit isiginnaartinneqarlutik. Videnik saqqummiinerit kingorna oqallittoqartarpoq.

Innuttaasut Kommune Kujallermi akileraarutit, atuarfiit, Kangilinnguani savaateqarneq kiisalu kommunit inissiaataani piginnittut pissarsiassaannik naatsorsuisarneq kiisalu kommunip Nuummut sanilliullugu ineriartorneq pillugu apeqqutissaqarput. Kommunip inukilliartornera eqqarsaatigalugu utoqqaat atugaat innuttaasunit eqqasuutigineqarnerat saqqummiuteqqinneqarpoq.

Sammisat assigiinngitsut pillugit borgmesterip saqqummiussai innuttaasunit tusarnaarluarneqarput kaffisornermik nipilersornertalimmik akunnilerneqarlutik.

Oqallitsitsisarnerni siunertaasoq tassaavoq aaqqissugaaneq pillugu politikkimut ukiunilu tullerni sisami kommunimut pilersaarutissaq pillugu innuttaasut ilanngukkusutaat tusarniassallugit.

Innuttaasunik ataatsimiititsinerit 25. september 2015 Narsami, ataasinngorneq 28. september 2015 Qaqortumi kiisalu Nanortalimmi 29. september 2015 ingerlanneqarput.