Nanortalimmi innuttaasunik ataatsimiititsineq unneqqarissumik tunngavilersorluakkamillu oqalliffiusoq

Naak akissarsiffiugaluartoq, katersortarfimmilu bingortoqaraluartoq Nanortalimmi innuttaasunik ataatsimiititsineq assut ornigaluarneqarpoq. Nanortalimmi atuarfimmi ataatsimoortarfik 29. september 2015 innuttaasunit 70 sinnilinnit orninneqarpoq, taakkulu aamma Borgmester Jørgen Wæver Johansenimut oqaasissaqarput.
2. oktober 2015
Borgmesteri Kommune Kujalliup aningaasartuutaannik inuisalu allanngoriartornerannik naatsumik oqaaseqareermat aaqqissugaanermut politikki kommunimullu pilersaarut pillugit videonik takutitassiat takutinneqarput. Videonik saqqummiinerit kingorna oqallittoqartarpoq.

Nanortalimmi innuttaasut isertuaallutik eqqarsaatiminnik saqqummiussuipput sorpassuillu pillugit tunngavilersorluakkamik borgmesterimut isornartorsiuillutik. Siunnersuutit apeqqutillu atorfilittanit katersorneqarput 2022-ip tungaanut kommunimut pilersaarutissap kommunalbestyrelsimit oqaluuserineqarnissaanut atorneqassallutik.

Kujataani pisuussutit atorneqanngitsut, inuusuttut praktikkerfissaat amerlanerusut, ilaatigut sakkutooqarfinnut isumaqatigiissuteqarnerit aqqutigalugit, kiisalu innaallagissiorfik pillugu innuttaasut apeqquteqartarput. Oqaatigineqarpoq inuussutissarsiutitigut ingerlatat ikiliartuinnarmata, aammalu aalisakkerivik inuussutissarsiutivinni annerusuni kisiartaalermat.

Utoqqaat qassiit paaserusuppaat utoqqaat illuat sooq suli allilerneqannginnersoq, arlallillu politeeqarfitoqqap utoqqaat ornittagaattut atorneqalernissaanik kissaateqarlutik.

Nanortalimmi aqquserngit qalliusertariaqarnerat aammalu eqqagassalerinermut anartarfilerinermullu akit qaffasippallaalersimanerat innuttaasunit tikkuarneqarpoq. Aqquserngit sinaanni kuuffiit salinneqarnissaat ujartorneqarpoq kiisalu ineqarnermut akit qaffasippallaalersimanerat tikkuarneqarluni.

Qinikkat illoqarfimmeersut isornartorsiorneqarput iliuuseqarfigineqartariaqartullu pillugit tusartikkuminaallutik. Innuttaasut ilaat innuttaasut atsiornerinik borgmesterimut tunniussaqarpoq neriuutigalugu taamaalilluni Nanortalik sammineqarnerulissasoq, aammalu siunnersuutigineqarpoq Nanortallup soqutigisaanik sammisaqartussamik najukkami ataatsimiittartoqatigiinnik pilersitsisoqassasoq.

Sammisat assigiinngitsut pillugit borgmesterip saqqummiussai innuttaasunit tusarnaarluarneqarput kaffisornermik nipilersornertalimmik akunnilerneqarlutik.

Borgmester Jørgen Wæver Johansenip atorfilittani qinnuigai innuttaasut isumassarsiaannik oqaaseqaataanillu allattueqqullugit, suliassallu ilaasa piaarnerpaamik malersoqqinneqarnissaannik piumasaqarluni. Kommunimut pilersaarut, aaqqissugaanermut politikkikkut suliniutit aammalu innuttaasut atugaat oqaluuseriartorlugit borgmesteri Nanortalimmut tikeraaqqikkumaarpoq.

Naggasiullugu innuttaasut katersortarfimmi nunap asserujussuanut nipitissuillutik suliniarfissanik tikkuartuipput siunnersuuteqarlutillu.

Oqallitsitsisarnerni siunertaasoq tassaavoq aaqqissugaaneq pillugu politikkimut ukiunilu tullerni sisami kommunimut pilersaarutissaq pillugu innuttaasut ilanngukkusutaat tusarniassallugit.

Innuttaasunik ataatsimiititsinerit 25. september 2015 Narsami, ataasinngorneq 28. september 2015 Qaqortumi kiisalu Nanortalimmi 29. september 2015 ingerlanneqarput.