Inuusuttut borgmesteri peqatigalugu Narsarsuarmi orpinnik ikkussuinerat

Suliaq Kommune Kujallermi Piareersarfiit aammalu Nødebo-mi orpilerinermik atuarfiup suleqatigiinnerisigut ingerlanneqarpoq
16. september 2015
Kommune Kujalleq nunatsinni isseqannginnerpaavoq taamalu sumiiffinni arlalinni orpinnik naatitsinissamut periarfissaqarluni, 1950-ikkuunniillu kommunimi orpeqarfiit anginngitsut arlalinnguit pilersinneqarsimapput. 

Inuusuttut arlallit kommunitsinneersut Danmark-imeersullu suleqatigiillutik siusinnerusukkut suliat nangillugit piffissami 8-20/9 orpinnik ikkussuipput, ilaatigut Narsarsuup nunaqarfiani ikkussuissallutik.

Suliaq Kommune Kujallermi Piareersarfiit aammalu Nødebo-mi orpilerinermik atuarfiup suleqatigiinnerisigut ingerlanneqarmat Piareersarfinniit inuusuttut aqqanillit kiisalu orpilernermik atuarfimmiit inuit arfineq-pingasut suliamut peqataapput.

Borgmester Jørgen Wæver Johansen-ip orpinnik ikkussuisut sisamanngornermi septembarip 10-ani Narsarsuarmut tikeraarpai, tassungalu atatillugu borgmesterip Piareersarfimmi atuartoq Nichlas Rasmussen (Narsaq) orpimmik ikkusseqatigalugu. Taamaalilluni Narsarsuup mittarfiata eqqaani anginngitsumik orpeqarfiliortoqarpoq, lærkenik, graninik aamma poppeltrænik ikkussuiffigineqarsimasumik. 

Borgmesterip orpinnik ikkussuineq siunissaq isigalugu suliaasutut isigisani nuannaarutigaa, sulilluartoqarnissaanillu kissaassilluni unnerpoq "anguniakkat Kommune Kujalliup siunissaanut pingaaruteqarluinnartuusut".

Katillugit orpiit 19.000-it ikkunneqassapput, pingaarnertulli engelmannsgran aammalu sibirisk lærk ikkussorneqassallutik. Narsarsuarmi ikkussuinerup saniatigut Qaqortumi Saqqaarsiip tunuani orpinnik ikkussuinerit ingerlanneqassapput, aammattaaq Tasermiut kangerluani Kuussuarmi ingerlanneqarumaarlutik.

Suliaq Nordplus Junior-imiit (Nunat Avannarliit Siunnersuisoqatigiivisa ataanniittumit) kiisalu Namminersorlutik Oqartussaniit taperserneqarluni ingerlanneqarpoq.