Kommune Kujalliup Danmarkimi illoqarfittut ikinngutiminik suleqateqarnini annertusarpai

Kommune Kujalliup Roskildep Kommunea suleqatigiinnissamut tunngasunik nutaamik isumaqatigiissusiorfigeqqammerpaa, Roskilde tassaavoq Kujalliup illoqarfittut ikinngutaasa ilaat – Kommune Kujalliup Danmarkimi illoqarfittut ikinngutai allat marluk assingusumik isumaqatigiissuteqarfigineqassapput
10. september 2015
Kommune Kujallermi aningaasaqarnermut ataatsimiititaliami ilaasortat Danmarkimeeqqammerput, taakkulu angalanerisa kingunerisa ilaat tassaavoq Kommune Kujalliup aamma Roskildep Kommuneata, 2009-mi kommunit kattunneqarnerat tikillugu taamanikkut Nanortallip Kommuniata illoqarfittut ikinngutigisimasaata, akornanni suleqatigiinnissamut nutaamik isumaqatigiissusiortoqarnera. Kommune Kujalleq kujataani kommunit pingasuugallarmata illoqarfittut ikinngutaasimasut pingasut suleqatigineqarnerannik nangitsiinnarnikuuvoq. 

Suleqatigiinnissamik isumaqatigiissutip nutarterneqarneratigut suleqatigiinnerup pitsaasup inersaqqinneqarluni annertusarneqarnissaa qulakkeerneqartussanngorpoq, pingaartumik suleriaatsit tungaatigut immersoqatigiittarnerit eqqarsaaatigalugit.

Assersuutigalugu Roskildep Kommunea pikkorissaasartunik Kommune Kujallermukartitsitsisassaaq, taavalu peqatigiiffiit, kommunit suliffeqarfiutaasa akornanni innuttaasullu akornanni ilisareqatigiittoqarnerulernissaa kiisalu kulturip tungaatigut inuiaqatigiillu akornanni nalunngeqatigiinnerup annertunerulernissaa siunertaralugit tikeraarfigeqatigiittarnerit aqqutissiuunneqassapput.

- Kommune Kujallermiit nuannaarutigaarput nutaamik isumaqatigiissusiortoqarneratigut Kujalliup aamma Roskilidep akornanni suleqatigiinnerup pitsaasup annertunerulernissaa toqqammavissinneqarmat. Taamaalilluni kommunini taakkunani marlunni siamasissumik suleqatigiittoqarnissaa aqqutissiuunneqarpoq, aamma inussutissarsiornermik ingerlataqartut akornanni aamma kommunini taakkunani marlunni innuttaasut akornanni, Kommune Kujallermi borgmesteri, Jørgen Wæver Johansen, oqarpoq. 

Suleqatigiinnissamik isumaqatigiissut ukiuni tulliuttuni sisamaniugallartoq atuutissaaq. Tassuunakkut ilaatigut aamma atuaqatigiiaat paarlakaallutik tikeraaqqatigiittarnissaat illoqarfittullu ikinngutigiinnermik malunnartitsiniartoqartarnissaa aqqutissiuunneqarpoq. 

  - Immitsinnut ilinniarfigeqatigiissinnaanissarput qularutiginngilara. Soorunami kulturimut inuiaqatigiittullu inooriaatsit pingaarnertut eqqarsaatigalugit, kisianni aamma eqqartukkatsinnut ilaapput inuussutissarsiornerup tungaatigut ingerlataqartut eqqarsaatigalugit suleqatigiittoqarsinnaanera qanoq iliorluta aqqutissiuussinnaaneripput. Tamatta inuusuttut aallartititsiniartut isumassarsiatsialannillu peqartut pitsaasumik aaqqissuussivigineqarnissaat pingaartitaraarput, tamannalu qanoq ineritaqarfiulersinnaanersoq pissanngatigaara, Roskildemi borgmesteri, Joy Mogensen, oqarpoq.

Kommune Kujallermi aningaasaqarnermut ataatsimiititaliami ilaasortat Danmarkimiinnerminni Kujalliup illoqarfittut ikinngutai allat marluk, tassa Gladsaxe aamma Aarhus ilanngullugit tikeraarfigaat. Maannalu sulissutigineqarpoq illoqarfiit taakku aamma piffissami qanittumi Roskildep isumaqatigiissusiorfigineqarneranut assingusumik isumaqatigiissusiorfigineqarumaartut.