Franskeq qalipaasoq Nanortalimmi saqqummersitsivoq

Saqqummersitsineq oktoberip 20-ata tungaanut ingerlassaaq maannamullu takusarluarneqaqaluni kalaallinit takornarianillu assut soqutigineqarpoq
4. september 2015
Sapaat 6. september Nanortallup Katersugaasiviata franskip qalipaasup Isabelle Vasseurip qalipagaanik saqqummersitsinersuaq ammarpaa. Takusaasut kaffisorlutillu tiitorsinnaapput kaagisorsinnaallutillu, aammalu eqqumiitsuliortoq eqqumiitsuliorneq kiisalu nunarput Frankrigilu pillugit oqaloqatigisinnaallugu.

Isabelle Vassuerip eqqumiitsuliani nunatsinnut tunngasut Tunumi Tiniteqilaami suliaralugit aallartissimavai. Taamanerniillu nunatsinni piffinnut assigiinngitsunut angalasarpoq saqqummersitsisarlunilu.

Eqqumiitsuliortup nunatsinnut misigissuseqarluinnarnera saqqummersitani erseqqilluarpoq saqqummersitaanimi kulturi pinngortitallu nukinga sunniutaalu saqqumilaartuartarmata qalipaatillu sakkortuut atorlugit sinnattuinnarpaluttumik ersersinneqartarlutik.

Isabelle Vasseurip Nanortaliminniinnermini atuarfimmi 7.a pulaarpai meeqqallu Frankrigimik oqaluttuuppai iikkamilu qalipagarsualiorlutik.