Narsami innuttaasunik ataatsimiititsineq oqallinneq uummaarissoq

Narsami katersortarfik tallimanngorneq 25. september 2015 narsarmiunit 40-it missaanniittunit ornigarneqarpoq, amerlanerit utoqqaapput qassiillu sulisinnaaffimmissut ukioqarlutik.
28. september 2015
Borgmester Jørgen Wæver Johansen aallarniilluni Kommune Kujalliup killiffianik nassuiaateqarpoq taavalu aaqqissugaaneq pillugu politikki aammalu kommunimut pilersaarut pillugu isiginnaagassiat tulliullugit isiginnaartinneqarlutik. Saqqummiinerit kingorna oqallittoqartarpoq.

Siusinaartumik pensionisiat, namminersorlutik oqartussat akitsuutinik qaffaaniarnerat, taakku utoqqaat inuunerannut qanoq sunniuteqarnissaat kiisalu kommunip inukilliartornera pillugit innuttaasut apeqquteqaateqartarput. Innuttaasut qassiit paaserusuppaat sooq Narsaq suliffissanik amerlanerusunik tunineqarsimannginnersoq, aammalu Qaqortup kisimi ineriartortinniarneqarnera ilumoornersoq. Innuttaasut ilaata nunaqarfiit mikisorpassuit eqqartorpai, aammalu kommunit aningaasartuutaannik appaaneq pinnagu taakku minnersaannik qaqugu matusisoqassanersoq eqqartorlugu. Aalisarnerup inuussutissarsiutitut nappataasutut pingaassusia innuttaasut qassiit erseqqissarpaat.

Unillatsiarnertalimmik akunnerni marlunni oqallinnermi sammisat taakku marluk pillugit borgmesterip nassuiaatigisartagaanut innuttaasut naalaarluartarput.

Naggasiullugu innuttaasut katersortarfimmi nunap asserujussuanut nipitissuillutik suliniarfissanik tikkuartuipput siunnersuuteqarlutillu. Siunnersuutit apeqqutillu atorfilittanit katersorneqarput 2022-ip tungaanut kommunimut pilersaarutissap kommunalbestyrelsimit oqaluuserineqarnissaanut atorneqassallutik.

Oqallitsitsisarnerni siunertaasoq tassaavoq aaqqissugaaneq pillugu politikkimut ukiunilu tullerni sisami kommunimut pilersaarutissaq pillugu innuttaasut ilanngukkusutaat tusarniassallugit.

Innuttaasunik ataatsimiititsinerit 28. september 2015 Qaqortumi kiisalu Nanortalimmi 29. september 2015 ingerlanneqassapput.