Attaveqaatit atorlugit atuartitsineq misilerarneqarpoq

iPadit nutaat kommunimi atuartut tamarmik pigilersimasaat kiisalu qarasaasiatigut periarfissanngorsimasut atorlugit Tasiusap atuarfiata Nanortallullu atuarfiata akornanni attaveqaatit atorlugit atuartisineq misilerarneqarpoq
31. august 2015
Nunaqarfiit atuarfiini atuartitsineq qaffassarniarlugu Kommune Kujallermi atuarfeqarfiup kissaatigaa kommunimi atuarfinni minnerusuni attaveqaatit atorlugit atuartitsineq ingerlanneqalissasoq. Atuartitsissutini ilinniartitsisussaqarfiunngitsuni illoqarfimmi atuartitsinermut atuartut malinnaasarnissaat kissaatigineqarpoq. Atuartut taamaalillutik kommunimi illoqarfiup atuarfiani atuartitsineq pitsaanerpaaq neqeroorutigineqarsinnaasoq malinnaaffigisinnaalissavaat. Suliniut aamma nuna tamakkerlugu malinnaaffigineqarluartpoq tassami Qarasaasianik atuinerulernissamut Naalakkersuisut 2014-17-imi periaasissaanni qarasaasiat atuartitsinermi atorneqarnerulernissaat siunertarineqarmat.

Najukkami misileraaneq
Aallaqqaammut Nanortallup atuarfiata Tasiusallu atuarfiata akornanni atuartitsinermi qarasaasiani atuineq kommunip misileraqqaassavaa. Misileraanerup aallarteqqaarnerani paasinarsivoq internetikkut attaveqaat, attaveqaatit atorlugit atuartitsinermi pinngitsoorneqarsinnaanngitsoq, atorneqarsinnaalluartoq aammalu iPadit atorneqalerneranni atuarfiit atortorissaarusersorneqareersimasut. Atuarneq aallartinniariarpat ilinniartitsisut peqataasussat attaveqaatit atorlugit ilinniartitsinermi atortussat atornissaannut ilinniartinneqassapput tamatumalu kingorna misileraaneq aallartissalluni.

Ilippanaateqarluartoq
Misileraaneq iluatsilluassappat kommunimi atuarfiit akornanni attaveqaatit atorlugit atuartitsineq ingerlanneqarsinnaanngussaaq, atuartitsinerlu taamaallaat illoqarfimmiit nunaqarfimmut sammisinneqartarnavianngilaq, aammali nunaqarfinni ilinniartitsisut illoqarfiit atuarfiini klassinut ilinniartitsisinnaassapput taamalu atuartut tamarmik kommunimi ilinniartitsisunit pikkorissunit pissarsiaqarluarsinnaalissallutik.
Misileraaneq Qarasaasialerinermut Aqutsisoqarfik suleqatigalugu ingerlanneqassaaq, atortorissaarullu atorneqartoq nunatsinni ilinniarfinni arlalinni attaveqaatit atorlugit atuartitsinermi atorneqartareerpoq.