Asasara atuartussaq,

Kommune Kujalliup nittartagaanut tikilluaritsi.

Kommune Kujallermut Kujataata tamarmi ilaavoq. Ataatsimoorluta Kujataa tassaalersinniarparput massakkut innuttatsinnut siunissamilu innuttarilerumaakkatsinnut, nunaqqatitsinnut tikeraartutsinnullu sullissinissamut nukissaqarnerpaaq kajungernarnerpaarlu. Kommune Kujalleq nunatsinni naggorinnerpaajullunilu qorsuunerpaajuvoq. Kujataani pinngortitap pisuussutai pinngortitamilu misigisassat assigiinngitsorpassuupput. Ataasiussusermik nukittuumik peqartutut misigisarpugut, ilisimavarpullu tikeraavut tikilluaqqusaasutut ilumut misigisimasartut.

Kujataani pinngortitaq najugarput immikkuullarilluinnartuuvoq immikkuullarissunillu kulturikkut misigisassaqarfiulluni. Kujataani pinnersunik qalipaatigissunillu naasoqarpoq, kangerlunnilu immakkut nunakkulluunniit angalaguit savaateqarfinnguit tikissinnaavatit sermitarsuillu qanimut takusinnaallugit.

Naasut ilulissallu saniatigut alutornarluinnartunik arsarneqartarpugut qulitsinni qilammi qalipaaginnartuusisartunik.

Aamma Kujataani alutornaqisunik sikorsuaqartarpoq. Sikorsuit sikuijuitsup imartaani pinngortarput sarfamillu kujataani sineriammut pissunneqartarlutik. Sikorsuit puisinik arfernillu, timmissanik nattoralinnillu nassataqartarput. Taakku sineriatsinni qeqertaraarpassualimmi kusanaqisumi aalajangersimasumik takkuttartuupput.

Kujataamiuusugut assigiinngitsunik inuussutissarsiuteqarpugut taakkunanngalu piniarneq aalisarnerlu pingaarnernut ilaallutik. Kalaalimineerniarfinni aalisakkat neqillu nutaat ukioq kaajallallugu pissarsiassaasarput.

Savaatilittatta savaaqqat qaqqatsinni pinngortitami minguitsumi mattusimaneqaratik alliartorsimasut neqaannik pissaqartittarpaatigut.

Qaqqavut immikkuullarissunik sananeqaatillit aatsitassanik assigiinngitsorpassuarnik peqarput. Qaqutigoortunik aatsitassarpassuaqarpoq eqqumiitsuliortortatsinnit pinnersaasiarineqarlutillu atortussiarineqartartunik.

Siunissaq inuussutissarsiornikkut assigiinngitsorpassuarnik periarfissaqarfiuvoq. Ukiuni makkunani suliffeqarfiit angisuut mikisullu misissueqqissaarnissamut akuersissummik tunineqarsimasut kujataani aatsitassarsiorfiusinnaasunik misissuipput.
Kujataani illoqarfiit nunaqarfilllu qulimiguullit angallatilluunniit atorlugit tikikkuminartuupput. Taamaammat sivikitsunnguamilluunniit maaniissagaluaruit illoqarfiit nunaqarfiillu, sermitarsuit oqaluttuarisaanerlu minnerunngitsumillu kalaallit kulturiat misigisaqarfiginissaannut periarfissaqarluarputit.

Kujataamiut pitsaanerpaamik sullinneqarnissaat aalajangiusimavarput.

Neriuutigaarput nittartagaq manna innuttatsinnik sullissinermut ilapittuutaassasoq.

Aammaarlungalu Kommune Kujalliup nittartagaanut tikilluaqqoqqippassi.